Tsiq eeq 75
Yalkhaq dal nail gaq neq, Heeqphaq Miqyail pevq nail teevq-eel ngaol
1 Miqyail-ol
nv juq naoq bhai tsiq eeq nail ngaol.
Naol nv juq nail aqjail bhai jaol nail ngel-i mail
naoq bhai tsiq eeq nail ngaol.
Tsaol-aq yaq juq
naoq-i mail nl dov-ai thaq nail
noeq-u maq dov nail ganl juq bhai
ge gaiq bhiq nail ngaol.
2 Miqyail neq, niail hai ge nail ngaol:
''Yal khaq dal nail aqyanq bhai
ngal noeq ceiv-ai thaq nail ngaol.
Ngal neq, tsaq nail daol nail lavqkhoel nee
yalkhaq dal nail ngaol.
3 Miltsaq khi mail
aqdoevq khal doevq nail tsaol-aq iqsanl mail
dao lal khi ngaol-aoq, ngal neq
miltsaq nail daoqthaoq bhai
ivq dao dai, bhi jiav nail gaq pevq nail ngaol.
4 Ngal khaoqsail he nail juq bhai
niail hai daoq bivq nail ngaol:
'Khaoq sail he nail naq lai yaoq.
Haq eiv nail juq bhai iqsanl
niail hai daoq bivq nail ngaol:
'Haq eiv nail phaq nl nail naq lai yaoq.
5 Nqtavq kovtavq bha genl thaq dev lal.
Eeq movq heel movq nail daoq thaq ge'" dai
ge bhiq-a nail ngaol.
6 Yalkhaq dal nail gaq neq
nlma dov khoeq phao nee maqkhaiq
nlma ga khoeq phao nee maqkhaiq
haqtsoiq haqyal phao nee maqkhaiq
dov lal nail, maq ngel ail.
7 Yalkhaq dal nail gaq neq
Heeqphaq Miqyail pevq nail teevq-eel ngaol.
Aivq neq, teevq gaq bhai he kha khi
teevq gaq bhai tsiq thul bhiq nail ngaol.
8 Heeqphaq Miqyail neq
neema phail nail phaq pevq nail
bov lav nail aqheeq tsilju nail ullul
hoel bhoel-ai thaq nail khaoqanq
aivq nail aqlavq bhai tsiq-nq thaq nail ngaol.
Aq heeq tsil ju al bhai aivq hoel kha gai-aivq-u phao
haqeiv nail tsaol-aq juq iqsanl mail
ya daol nail ngaol.
Aqyu juq teevq jiav iqsanl maq jail dai
ya daol gil-a nail ngaol.
9 Thail hai ngaol-aoq, ngal neq
Miqyail nail ganl bhai maq ceiv lai dai
ge gaiq bhiq nail ngaol.
Yaqkov nail Miqyail bhai
tsiq eeq nail daoqsel gul nail ngaol.
10 Miqyail neq, niail hai ge nail ngaol:
"Ngal haqeiv nail juq nail bhaqaoq bhai
lav cov nail ngaol.
Thail hai ngaol-aoq
tsaq nail daol nail tsaol-aq juq nail
bhaqaoq bhai neq
gaoq bhi eeq lal nail ngaol" dai
ge bhiq-a nail ngaol.