Tsiq eeq 72
Heeqphaq nail haqbhoil geeqlaoq hal daoq
1 Miqyail-ol, naol yalkhaq
khal hai bhi dal nail-aiq dai
heeqphaq bhai cavq bhiq cov bhiq yaoq.
Naoq nail tsaq nail daol nail phaq iqsanl
aivq nail yaqyov bhai cavq bhiq cov bhiq yaoq.
2 Aivq neq, naoq nail tsaol-aq juq bhai
aq tsaq aqdaol daol dai, yalkhaq dal khi
naoq nail haq yaq aoq yaq juq bhai
aq tsaq phaq nl bhiq dei-eiq.
3 Gaoqjaoq jaoq ma khi jaoq yaq bhai
jaol nail milkhaoq yaq juq neq
bhao lee ya lee nail nee ovqtavq
tsaq nail daol nail lavqkhoel bhai ya jaol dei-eiq.
4 Heeqphaq neq
haq yaq aoq yaq juq jaol nail bha lee khi
tsao jao-ai lee bhiq dei-eiq.
Moevq nail sivq nail yaq juq bhai
hevq kovq bhiq dei-eiq.
Aqyu juq bhai khoeq bhiq jiovq bhiq nail juq bhai
naoq thaiq bhiq yaoq dei-eiq.
5 Nl ma aqbhaq bhaq khi
bhala khal tsaiq-u kev dai
heeqphaq nail tsaol-aq juq
aivq bhai teevq yeel nee teevq yeel
maq ceiv lai dai gee sil khi ev dei-eiq.
6 Heeqphaq al gaq-i mail
uv thaiq nail phaq neq
daiyal aqsal khe moeqgaq bhai
aol bav lee nail maoq-aol khe-ai maqkhaiq
miltsaq bhai
aol bav lee nail maoq-aol khe-ai maqkhaiq
gee laoq bhao dei-eiq.
7 Aivq uv thaiq nail aqyanq bhai
tsaq nail daol nail tsaol-aq bhao lee ya lee dei-eiq.
Bhala khal tsaiq-u kev dai
khaq mao iqsanl, nee sal ovq dei-eiq.
8 Aivq neq, iqyaq iqma teevq laiq gil-a
teevq laiq bhai maqkhaiq
Pheqlaqtaq laoljaol nee mail
miltsaq niil nail daoq loi bhai kev dai maqkhaiq
uv thaiq dei-eiq.
9 Tsal hail dai khaoq bhai jaol nail
jeq-e juq iqsanl mail
aivq nail sivtavq bhai
peevqceevq kovdoiq doiq nail ngaol.
Aivq bhai neejiav jiav nail juq
aivq nail aqkhil daoqthaoq bhai bhi gaol beiv dei-eiq.
10 Daqsil milkhaoq khi mail
eel jaol laol-n juq bhai jaol nail heeqphaq juq
aivq bhai khaon ya dov bhiq khi
Seiq bha milkhaoq khi mail
Tsei bha milkhaoq khe
lal nail heeqphaq juq iqsanl
kovpavq bhi oil lavq dei-eiq.
11 Heeqphaq juq iqsanl
aivq nail sivtavq bhai uqhuq ya thaoq khi
jeq-e jaq-a juq iqsanl mail
aivq nail yaqkav bhi jiovq dei-eiq.
12 Aivq bhai khal khul nail
haq yaq aoq yaq juq bhai maqkhaiq
gaq hal duq maq jiav dai
bhi khoeq bhi jiovq nail juq bhai maqkhaiq,
hevq kovq bhiq nail ngaol.
13 Haq nail aoq nail juq bhai gaoq haq bhiq khi
aqyu juq nail doevqyeel bhai
hevq kovq bhiq nail ngaol.
14 Aqyu juq nail doevqyeel neq
aivq nail sivtavq bhai aqphoiq bhao nail ngaol.
Bhi khoeq bhi jiovq-a nail phaq nee maqkhaiq,
khal nl movq ail bhi nl-a nail phaq nee maqkhaiq
aqyu juq bhai hevq kovq bhiq nail ngaol.
15 Heeqphaq yeel bhao yeel ya dei-eiq.
Tsei bha milkhaoq bhai jiav nail heel juq
aivq bhai kovpavq bivq dei-eiq.
Tsaol-aq yaq juq heeqphaq nail haqbhoil
khaq mao iqsanl geeqlaoq hal khi
aivq bhai geeqlaoq bivq dei-eiq.
16 Miltsaq aqsal nee mail gaoqjaoq bha kev dai
gov ya dee dee lee dei-eiq.
Leiq bhaq noq gaoqjaoq juq bhai
aqbhaol juq-i mail uv thaiq-ai thaq nail khe-ai
dai khaoq juq bhai aqheeq allu juq-i mail
uv thaiq-ai thaq dei-eiq.
Meenq juq bhai jaol nail tsaol-aq juq neq
haqtsoiq bhai doevq nail moeqgaq khe-ai
mao dee dee lal dei-eiq.
17 Heeqphaq nail aqmil neq
khaq mao iqsanl ivq dei-eiq.
Aivq nail aqmil
nlma aqbhaq khal bhaq-u kev dai
ivq dei-eiq.
Jeq-e jaq-a juq iqsanl mail
aivq bhaq da nee geeqlaoq ya khi
aivq bhai tsiq eeq dei-eiq.
18 Ilsaqleiqlav nail Miqyail pevq nail
Heeqphaq Miqyail bhai tsiq eeq yaoq.
Aivq teevq gaq taivq-ail
noeq-u maq dov nail ganl nl nia nail ngaol.
19 Seiq leiq khaoqsail eeq nail aivq nail aqmil bhai
khaq mao iqsanl tsiq eeq yaoq.
Miltsaq niil teevq heeq heeq lao
aivq nail seiqleiq khaoqsail-i mail bhee dei-eiq.
Aq miq. Aq miq.
20 Niil neq, Yeiq sail nail yaqyov Daq bhil nail geeqlaoq hal daoq gil-aoq nail ngaol.