Tsiq eeq 73
Tsiq eeq nail haoqgavq hail pav teevq pav 73-89
Miqyail nail tsaq nail daol nail phaq
1 Mal dil Miqyail neq
neema haol nail juq khi
Ilsaqleiqlav nail jeq-e jaq-a juq bhai
meeq bhiq nail ngaol.
2 Thail hai ngaol-aoq, ngal neq
aqkhil naoq gaoq khi
phaq thiq thiq lao aoq nail ngaol.
3 Khul khi mail dai ngal-aq
khaoqsail he nail juq meeq dav lal nail bhai
ngal ya moel-u phao
neekhaol maq sil dai, pevq lal-a nail ngaol.
4 Aqyu juq neq
khul maq haq maq aoq ail.
Gaq aol khi jaol hal dov nail ngaol.
5 Aqyu juq yu khe-ai
maq ya haq maq ya aoq al.
Yu khe-ai, maq ya daq-al.
6 Al heel ngel-i mail
aqyu juq neq, neema eeq nail phaq
leelkhaol bhai deivq nail phaq khe-ai
deivq-nvq thaq khi khoeq bhiq jiovq bhiq nail phaq
aqgaq aqdoi khe-ai, doi-nq thaq nail ngaol.
7 Aqyu juq, yaoq phaq yaoq nee
jiav lovq nail ngel-i mail
aqgoil tsul lal khi neema lavqkhoel khe
khal nl movq nail phaq nl nail ngaol.
8 Aqyu juq neq
yu bhai khal ge movq ail ge khi
ge doil nail ngaol.
Neema eeq nail lavqkhoel
yu bhai khoeq bhiq jiovq bhiq nail dai
lainq nail ngaol.
9 Aqyu juq neq
nqtavq kovtavq bha jaol nail
Heeqphaq Miqyail bhai khal ge movq ail ge khi
miltsaq bhai jaol nail tsaol-aq juq bhai
bhi gee sil lal bhiq heeq phaq-ail daoq bivq nail ngaol.
10 Al heel ngel-i mail
tsaol-aq yaq juq iqsanl
aqyu juq jaol nail phao phaoq khi
aqyu juq nail daoq
neema bhai oil bhoel nail ngaol.
11 Aqyu juq neq
''Miqyail maq heeq nia ail.
Eeq dee heel dee dee nail gaq
khal hai khi heeq nia heeq'' dai
ge nail ngaol.
12 Haq eiv nail tsaol-aq niil juq bhai hel daiq yaoq.
Aqyu juq khaoq laol nail phaq maq jiav dai
gaoq meeq dav lal nail nee ovqtavq
phul heel gaoq jiav jaiq lal nail ngaol.
13 Al heel ngel-i mail
ngaq nail neema aqhaol haol dai
oeqbal maq nl mail jaol nail neq
khul nail ganl tsoiq nail-aiq.
14 Ngaq bhai teevq n n lao ail
haq nail aoq nail phaq kev lee khi
yaoq haoq yaoq-ao nee
khoeq nail jiovq nail phaq iqsanl kev lee nail ngaol.
15 Thail hai ngaol-aoq
ngal aqyu juq khe-ai
Miqyail nail ganl bhai ge haq neq
Aivq nail tsaol-aq juq bhai
goiqbhaoq bhaoq nail khe-ai dul nail ngaol.
16 Ngal haqeiv nail juq bhao lee ya lee nail ganl bhai
gov heeq kivq dai, lai jai khi ngaol-aoq
gov heeq nail neq, al jaiq-ail haq nail ngaol.
17 Thail hai ngaol-aoq
ngal naoq nail uqhuq thaoq nail ilkhaol il ma bhai
aol lai khi taivq-ail
haqeiv nail tsaol-aq juq
daoq loi khal hai ya loi lai nail ganl bhai
heeq kivq duq-a nail ngaol.
18 Naol aqyu juq bhai
aqkhil maq naoq thaiq ivq nia nail jaol duq bhai
aqkhil bhi naoq gaoq khi
lav luq lav seil bhiq nail ngaol.
19 Aqyu juq thaiq phuq dai
luq ail seil ail khi ya sil nail ngaol.
Aqyu juq nail daoq loi loi lai duq neq
gee sil dee dee lal heeq phaq-ail tsaq nail ngaol.
20 Heeqphaq Miqyail-ol
aqyu juq neq
nqhao lao ma khe peivq ail nail
nv mav khe-ai dul nail ngaol.
Naol thul lee-u phao
aqyu juq peivq ail boev ail nail ngaol.
21 Ngal noeq haq khi neema nal-u phao
22 buvq nav khe-ai naoq nail sivtavq bhai
neenoeq neekha maq aol ail.
23 Thail hai ngaol-aoq
ngal naoq nail aqjail bhai
khaq mao iqsanl jaol nail ngaol.
Naol iqsanl ngaq nail aqlavq lavqmal lavq bhai
he thaiq lavq-a nail ngaol.
24 Naol ngaq bhai cavq lavq cov lavq khi
gailkhaol hevq daiq lavq-a nail lavqkhoel
haoqnao nao saq naol ngaq bhai
seiqleiq khaoqsail bivq lavq nail ngaol.
25 Ngaq nail haqbhoil naoq-ai nee jaiq lai khi
nqtavq kovtavq bha khaq sil gaq jaol nail-aiq.
Naol ngaq-ai nee jaol haq neq
miltsaq bhai ngal khul gaoq loq nail-aiq.
26 Ngaq nail aqmaol neema
gaq bhaq ail khi ngaol-aoq
naol neq
ngaq nail neema eeq duq pevq nail ngaol.
Naol neq, khaq mao iqsanl
ngaq nail Miqyail pevq nail ngaol.
27 Naoq bhai khaonq ha nail juq neq
maldil luq ail seil ail nail ngaol.
Naoq bhai saljial maq ivq nail juq bhai
naol lav luq lav seil bhiq nail ngaol.
28 Thail hai ngaol-aoq
Miqyail nail aqjail bhai ya jaol nail neq
ngaq nail haqbhoil kha dai meeq nail-aiq.
Heeqphaq Miqyail bhai juq khi
aivq-i mail nl-a nail ganl juq bhai
ya ge gaiq bhiq nail ngaol.