Tsiq eeq 71
Aqkovq jiav lal-a nail gaq nail geeqlaoq hal daoq
1 Heeqphaq Miqyail-ol
ngal naoq bhai juq nail ngaol.
Ngaq bhai khaq mao iqsanl
haq sil nail phaq thaq bhi kev lee lavq.
2 Naol tsaq nail daol nail gaq pevq nail khe-ai
ngaq bhai tsao jao-ai khi, bhi jel-ail lavq yaoq.
Ngaq nail hal daoq bhai nal daiq khi
hevq kovq lavq yaoq.
3 Naol neq
ngal khaq mao iqsanl juq nail
lovphail pevq nail ngaol.
Ngaq bhai bhi hevq kovq nail haqbhoil
daoq bivq yaoq.
Khul khi mail dai ngal-aq, naol neq
ngaq nail tsaoq uvq duq lovphail khi
ivq nail tavq pevq nail ngaol.
4 Ngaq nail Miqyail-ol
ngaq bhai haqeiv nail juq nail
aqlavq lavqkhoel nee bhi jel-ail lavq yaoq.
Maq tsaq maq daol nail juq khi
khoeq lal jiovq lal juq nail
aqlavq lavqkhoel nee iqsanl
hevq dov lavq yaoq.
5 Heeqphaq-ol
ngal naoq bhai noeq thunq nail ngaol.
Heeqphaq Miqyail-ol
yaqnoil ail jiav-u nee mail
naoq bhai neema thaq tsaol nail ngaol.
6 Ngaq nail teevq yeel naoq bhai juq nail ngaol.
Ngal doevq lee-u nee mail dan khi
naol ngaq bhai hel daiq phail lavq-a nail ngaol.
Ngal naoq bhai khaq mao iqsanl tsiq eeq nail ngaol.
7 Ngal neq, tsaol-aq mao dai nail sivtavq bhai
noeq-u maq dov nail phaq khe-ai
pevq khi ngaol-aoq, naol neq
ngaq nail haqbhoil ivq nail juq duq pevq nail ngaol.
8 Ngaq nail moeqthaoq
naoq bhai tsiq eeq nail ngaol.
Teevq n n lao naoq nail seiqleiq khaoqsail bhai
ge gaiq bhiq nail ngaol.
9 Niil aq il ngal joiqmaoq maoq lee khi ngaol-aoq,
ngaq bhai thaq khaonq ha lavq.
Niil aq il ngal gaq bhaq lee khi ngaol-aoq
maq hel daiq tsaoq dai, thaq jaol lavq.
10 Khul khi mail dai ngal-aq
ngaq bhai neejiav jiav nail juq neq
ngaq nail ganl ge khoiq pheel jaq khi
ngaq bhai heivq nail dai
maoq bhaoq nl thail thaiq nail ngaol.
11 Aqyu juq niail hai ge nail ngaol:
"Miqyail neq, aivq bhai khaonq ha aoq nail ngaol.
Aivq bhai hevq kovq nail gaq
teevq gaq iqsanl maq jaol yaoq-aol.
Aivq bhai nieivq ail bhel" dai, ge nail ngaol.
12 Miqyail-ol, eqyal bha thaq jaol lavq.
Ngaq nail Miqyail-ol
ngaq bhai tsao jao-ai nail haqbhoil
lavqtsail mail lee yaoq.
13 Ngaq bhai neejiav jiav nail juq
haq sil lal bhiq khi luq ail seil ail dei-eiq.
Ngaq bhai lav haq lav aoq movq nail juq
ya haq sil dee dee khi
seiqleiq khaoqsail bhi peivq ail dei-eiq.
14 Thail hai ngaol-aoq
ngal naoq bhai khaq mao iqsanl
noeq thunq nail ngaol.
Naoq bhai teevq n nee teevq n
tsiq eeq jaiq nail ngaol.
15 Ngal neq
naoq nail tsaq nail daol nail ganl bhai
ge gaiq bhiq naol.
Naoq-i mail hevq kovq lavq-a nail geeqlaoq bhai
maq heeq gil kivq khi ngaol-aoq
teevq n n lao, ngal ge gaiq nail ngaol.
16 Ngaq nail Heeqphaq-ol
Heeqphaq Miqyail-ol
ngal lal khi naoq-i mail
bhaqaoq eeq nail ganl juq bhai
tsiq eeq nail ngaol.
Naol teevq gaq taivq-ail
tsaq nail daol nail gaq pevq nail ganl
ge gaiq bhiq nail ngaol.
17 Miqyail-ol, naol neq
ngal yaqnoil ail jiav-u nee
cavq lavq cov lavq khi
ngal neq, naoq-i mail
nl-a nail noeq-u maq dov nail ganl juq bhai
yanqgaol kev dai, ge gaiq bhiq nail ngaol.
18 Niil aq il ngal aqkovq jiav lal khi
uqhuq tsailkheel phul lee aoq nail ngaol.
Ngaq nail Miqyail-ol
ngaq bhai thaq khaonq ha lavq.
Khul khi mail dai ngal-aq neq
ngal yaqhao khe aqjievq lilheel juq iqsanl bhai
naol bhaqaoq eeq nail ganl khi
naoq nail aqlavq-i mail nl-a nail
eeq nail ganl juq bhai ge gaiq movq ail nial.
19 Miqyail-ol
naoq-i mail tsaq nail daol nail phaq neq
nqtavq bha tuv nail ngaol.
Naol neq, eeq nail heel nail ganl nl-a nail ngaol.
Naoq-ai khe-ai dul nail teevq gaq iqsanl maq jaol ail.
20 Naol neq, ngaq bhai
haq nail aoq nail mao dai phaq
bhi thaoq phuq lavq khi ngaol-aoq
gaq gaoq bhi aol kovq lal lavq khi
sil nail milkhaoq bha maq ya ail kev dai
hevq kovq lavq nail ngaol.
21 Ngaq bhai iqmoeq-u nee maq tsil
gaoq bhi eeq gaoq bhi heel lal lavq khi
nee sal gaoq bhi ya lavq-a nail ngaol.
22 Ngaq nail Miqyail-ol
naol saljial ivq nail ngel-i mail
ngal dil-nvq heeq yaq deeq khi
naoq bhai tsiq eeq nail ngaol.
Ilsaqleiqlav tsaol-aq nail
meeq nail haol nail Miqyail-ol
ngal dil-nvq deeq khi
tsiq eeq nail daoqsel gul nail ngaol.
23 Ngal naoq bhai tsiq eeq nail daoqsel gul-u phao
lavqkhiq tsail khi gul nail ngaol.
Khul khi mail dai ngal-aq, naol neq
ngaq bhai ul kovq lavq-a nail ngel-i mail ngaol.
24 Ngaq bhai lav haq lav aoq
movq nail juq nail kovtavq bhai
haq sil nail phaq khi suq saq nail phaq
bhi kev lee-a nail ngel-i mail
naol tsaq nail daol nail ganl bhai
teevq n n lao ngal ge gaiq bhiq nail ngaol.