Tsiq eeq 69
"Hevq kovq lavq yaoq" dai, hal nail geeqlaoq hal daoq
1 Miqyail-ol, ngaq bhai hevq kovq lavq yaoq.
Ulcuvq ngaq nail leelkhaol bha
kev lal-aoq nail ngaol.
2 Ngal navq dee dee nail niaoq lao bhai
ga bhoel ail lavq-ao nail ngaol.
Aq khil naoq thaiq duq miltsaq aqgaol maq jiav ail.
Ngal ulcuvq navq dee dee nail aqduq bhai kev ail khi
ulcuvq ngaq bhai deq pheeq lal aiq nail ngaol.
3 "Tsao jao-ai lavq yaoq" dai
ya gul nail bhaq da nee
ngal gaqdoil doil dee dee nail ngaol.
Ngaq nail khoeq ma gee lal-aoq nail ngaol.
Miqyail bhi tsao jao-ai lee nail haqbhoil
gaol lel khi hel daiq nail ngaq nail maivneev
ga dov ail nail kev lal-aoq nail ngaol.
4 Ngaq bhai khul nail ganl maq jiav nail bhai
bhe nail juq neq
ngaq nail uqhuq bhai covq nail tsailkheel nee
mao jaiq nail ngaol.
Ngaq nail ganl bhai goiqbhaoq bhaoq khi
ngaq bhai genl dev movq nail juq iqsanl
mao dee dee nail nee ovqtavq
ngaq bhai heivq movq-ai bhiq nail ngaol.
Aqyu juq bhai ngaq-i mail
maq khoiq-a nail ildaoq maoqgaiq juq
gaoq ya bivq kovq-a nail ngaol.
5 Miqyail-ol
ngaq nail oeqbal naoq nail sivtavq bhai
oil uvq nail maq ya ail.
Ngal kha dai doil nail dai, naol heeq nia nail ngaol.
6 Nqtavq kovtavq khe
genl dev nail munl munl ma nail kovtavq bhai
bhaqaoq eeq nail Heeqphaq Miqyail-ol
naoq bhai noeq thunq khi daonq nail juq neq
ngal bhaq da nee seiqleiq khaoqsail thaq bhiq cov.
Ilsaqleiqlav nail Miqyail-ol
naoq bhai hal pov nail juq
ngal bhaq da nee thaq bhi haq sil.
7 Ngal neq, naoq nail haqbhoil
khal ge movq ail ge lavq nail bhai ya daq khi
al jaiq-ail ya haq sil-a nail ngaol.
8 Ngal neq
yovqgavq nail aqivq jaqbheq nail lavqkhoel bhai
daq-i khe-ai pevq nail bhai maqkhaiq
yovqgavq nail ildaoq lavqkhoel khe
jaol nail tsaol-aq juq nee iqsanl
yaoq meenq yaoq khe tsaol-aq khe-ai maqkhaiq
jaol-a nail ngaol.
9 Miqyail-ol
naoq nail ilkhaol bhai ngal gaiq-a nail
ngaq nail neema lavqkhoel bhai
miqjaq tovq nail khe-ai, dul ail nial.
Naoq bhai khal ge movq ail ge nail daoq
ngaq nail kovtavq bhai kev lee-a nail ngaol.
10 Ngal maq jaq nail aol nl khi nioil-u phao
ngaq bhai khal ge movq ail ge lal nail ngaol.
11 Ngal noeq haq khi jinq daq iq doi-u phao
aqyu juq ngaq bhai meel naq lal nail ngaol.
12 Meenq nail lolgov aqjail bhai jaol deel nail juq
ngaq nail ganl ge doil pheel jaq nail ngaol.
Daol bov daol yaivq nail juq neq
ngaq nail ganl bhai daoqsel
gul pheel jaq nail ngaol.
13 Thail hai ngaol-aoq, Heeqphaq Miqyail-ol
ngal neq, naoq bhai khaq mao iqsanl
geeqlaoq hal nail ngaol.
Miqyail-ol, geeqlaoq eeq nail aqyanq tsaq-u phao
naoq-i mail gaoq haq goil gaiq-a nail phaq khi mail
naoq-i mail
ivq nail hevq kovq nail phaq bhai juq khi
ngaq nail geeqlaoq hal daoq bhai
ge kovq lavq yaoq.
14 Cavq noevq bhai maq ya ga bhoel ail dai
ngaq bhai he dov lavq yaoq.
Nee jiav jiav nail juq nail aqlavq nee maqkhaiq
ulcuvq navq nail dao nee maqkhaiq
hevq dov lavq yaoq.
15 Ngaq bhai ulcuvq-i mail
thaq bhi deqpheeq lavq.
Ulcuvq aqnavq bhai thaq bhi ga bhoel ail lavq.
Luq daol lavqkhoel bhai
ngaq bhai thaq bhi aol ail lavq.
16 Heeqphaq Miqyail-ol
naoq-i mail meeq dee dee nail
gaoq haq goil gaiq-a nail phaq bhai juq khi
ngaq-i mail hal nail daoq bhai
ge kovq lavq yaoq.
Naol neq
gaoq haq gaiq-a nia dee dee nail gaq
pevq nail ngel-i mail
ngaq-ai phao tsiq phaol khi hel daiq lavq yaoq.
17 Naoq nail yaqkav bhai
naoq nail maivphaoq thaq tsiq uvq lavq.
Ngaq bhai haq nail aoq nail phaq
kev lee-a nail ngel-i mail
lavqtsail mail tsao jao-ai lavq yaoq.
18 Ngaq nail aqjail bhai lee khi
ul kovq lavq yaoq.
Nee jiav jiav nail juq nail aqlavq nee
bhi jel-ail lavq yaoq.
19 Ngal neq, kha dai khal ge movq ail
ge lavq nail bhai ya daq khi
kha dai haq sil nail lavqkhoel nee
seiqleiq khaoqsail oil ha lavq-a nail bhai
ya daq-a nail dai iqsanl
naol heeq nia nail ngaol.
Ngaq bhai neejiav jiav nail juq-i mail
nl nail iqsanl bhai naol moel nail ngaol.
20 Khal ge movq ail bhi ge-a nail bhaq da nee
ngal neema cov khi
gaq bhaq thail thaiq nail ngaol.
Ngaq bhai gaoq haq lavq nail gaq bhai
hal pov-u phao, maq moel-al.
Neema aqsal bhi sal lal nail gaq bhai
hal pov-u phao iqsanl, maq jaol ail.
21 Thail hai ngaol-aoq
ngal moevq nail sivq nail yanq bhai
neejiav jiav nail juq neq
dovq bhi daol lavq-a nail ngaol.
Ulcuvq moevq-u phao
aqtsel ullul bhi daol lavq-a nail ngaol.
22 Aqyu juq-i mail jaq nail daol nail aqbhee neq
aqyu juq luq ail seil ail nail phaq bhi pevq dei-eiq.
Aqyu juq-i mail jaq meeq daol meeq nail phaq neq
aqyu juq peivq lee boev lee nail phaq
bhi pevq dei-eiq.
23 Aqyu juq maiv peivq peivq ail khi,
maq moel nia dai, pevq ail dei-eiq.
Aqyu juq nail kaol ceevq khaq mao iqsanl
aq khu khu dai, pevq ail dei-eiq.
24 Miqyail-ol
naoq-i mail neema phail nail phaq
aqyu juq nail kovtavq bhai hoel dav khi
naoq-i mail neema phail dee dee nail phaq
aqyu juq bhai the kheel yaoq.
bhi the kheel yaoq.
25 Aivq nail ilkhaol iltsoiq tsoiq ail khi
tsaol-aq maq jaol dai, bhi pevq ail dei-eiq.
26 Khul khi mail dai ngal-aq, aqyu juq neq
naoq-i mail deeq-a nail gaq bhai
khoeq bhiq jiovq bhiq khi
naoq-i mail lav nal bhiq-a nail gaq bhai
gaoq lav nal bhiq-a nail ngaol.
27 Aqyu juq-i mail oeqbal khal nl-a nail dai
geel-nvq nail khe-ai, yalkhaq dal bhiq yaoq.
Naoq-i mail hevq kovq lavq-a nail phaq
aqyu juq bhai thaq bhi kev lee.
28 Aqyu juq nail aqmil neq
aqdoevq bhi doevq nail haoqgavq lavqkhoel nee
oil ha nail bhai ya daq dei-eiq.
Aqyu juq neq
naoq nail tsaol-aq juq nail lavqkhoel bhai
thaq bhi aol lal dei-eiq.
29 Ngal neq
haq nail aoq nail lavqkhoel nee
neema nal khi jaol nail ngaol.
Miqyail-ol, naoq nail hevq kovq nail phaq-i mail
ngaq bhai hel daiq phail lavq yaoq.
30 Ngal daoqsel gul khi
Miqyail nail aqmil bhai tsiq eeq nail ngaol.
Aivq bhai tsiq eeq nail lavqkhoel nee
aivq eeq nail heel nail phaq bhai
ge gaiq bhiq nail ngaol.
31 Al hai nl nail bhai Heeqphaq Miqyail neq
niaoqnel laol bhiq nail nee maq tsil
neekhaol sil jaiq nail ngaol.
Pavq meivq dai khi uqkheel dov nail
niaoqnel laq sil teevq maol maol lao-ail
laol bhiq nail nee maq tsil
neekhaol sil jaiq nail ngaol.
32 Haq nail aoq nail juq al bhai ya moel-u phao,
lavqkhiq tsail nail ngaol.
Miqyail bhai hal pov nail juq neq,
gaq aol jaiq lal nail ngaol.
33 Heeqphaq Miqyail neq
haq nail aoq nail tsaol-aq juq nail
geeqlaoq hal daoq bhai nal daiq nail ngaol.
Thaonq bhai aol nail
aivq nail tsaol-aq bhai iqsanl
maq nioil peivq ail.
34 Nqtavq, miltsaq khi mail
iqyaq iqma nail lavqkhoel bhai
khal jaol nail phaq iqsanl mail
Miqyail bhai tsiq eeq yaoq.
35 Khul khi mail dai ngal-aq
Miqyail neq
Yeiqlulsaqlaiq meenq bhai hevq kovq khi
Yuldav meenq juq bhai
gaoq cov meeq kovq nail ngaol.
Aivq nail tsaol-aq juq neq
a bhai ya jaol khi
miltsaq al juq aqyu juq bhai ovq nail ngaol.
36 Aivq nail yaqkav juq nail aqjievq lilheel juq
miltsaq al tsaol jaiq bhoil ovq khi
aivq nail aqmil bhai gaiq-a nail tsaol-aq juq,
a bhai ya jaol nail ngaol.