Tsiq eeq 68
Gaq lai-a nail daoqsel
1 Miqyail tsaoq thul lal khi
aivq bhai neejiav jiav nail juq bhai
the ha bhiq dei-eiq.
Aivq bhai bhe nail juq
aivq nail sivtavq nee
bhi tsaoq peivq gil aivq dei-eiq.
2 Miqkhoiq bhai
lilmoel-i mail bhoe peil-aivq nail khe-ai
aivq aqyu juq bhai the ha bhiq dei-eiq.
Miqjaq nail sivtavq bhai
bhaiq haoq phaq lai nail khe-ai
Miqyail nail sivtavq bhai
haqeiv nail tsaol-aq juq
bhi luq bhi seil ail dei-eiq.
3 Thail hai ngaol-aoq
tsaq nail daol nail tsaol-aq juq neq
Miqyail nail sivtavq bhai
lavqkhiq bhi tsail dei-eiq.
Aqyu juq lavqkhiq mail ma ail ya tsail dei-eiq.
4 Miqyail bhai daoqsel gul khi tsiq eeq yaoq.
Aivq nail aqmil bhai gul khi tsiq eeq yaoq.
Nqdil jeeq nail gaq bhai
daoqsel aqkav kav dai gul khi tsiq eeq yaoq.
Aivq nail aqmil neq, Heeqphaq Miqyail ngaol.
Aivq nail sivtavq bhai lavqkhiq tsail yaoq.
5 Aivq nail meeq nail haol nail aqduq
lavqkhoel bhai jaol nail Miqyail neq
aqbhu aqma maq bhao nail juq bhai
hel daiq phail bhiq khi
miqtsiq miqma juq bhai iqsanl
hel daiq phail bhiq nail ngaol.
6 Ildaoq maq bhao nail juq bhai
ildaoq bhi bhao lal khi
thaonq bhai aol nail juq-ai phaiq bhiq khi
lavqkhiq bhi tsail nail ngaol.
Thail hai ngaol-aoq
aivq nail daoq bhai maq nal daiq nail juq neq
gee lee del deel jaol duq bhai
bhi jaol ail nail ngaol.
7 Miqyail-ol
naoq nail tsaol-aq juq bhai naol hel aivq khi
tsalhail dai kav bhai tsao thail thaiq-u phao,
8 miltsaq teevq heeq heeq lao dao lal khi
nqtavq kovtavq khe
maoq-aol hoel kha-ai leevq-a nail ngaol.
Silnaq gaoqjaoq khe Miqyail-ol
Ilsaqleiqlav nail Miqyail-ol
naoq nail sivtavq bhai al hai pevq lal-a nail ngaol.
9 Naol maoq-aol thaol ma bhi lee khi
gee lee del deel naoq nail miltsaq
aqjiq bhi jiq lal-a nail ngaol.
10 Miqyail-ol, naoq nail tsaol-aq juq
al bhai jaol ail khi
haq yaq aoq yaq juq bhai
naoq nail bhee lovq nail geeqlaoq bivq nail ngaol.
11 Heeqphaq Miqyail daoq bivq-ai leevq khi
yaqmai-aq juq mao dai ail khi
daoq al niail hai ge gaiq bhiq nail ngaol:
12 "Heeqphaq juq khi
aqyu juq nail genl dev yaq juq
tsaoq pav tsaoq sav gil-aoq nail ngaol.
Il khaol bhai jaol-ai jeeq-a nail
Ilsaqleiqlav nail yaqmai-aq juq
genl dev yaq juq nail nlmaoq
bhoil pav khi oil nail ngaol.
13 Aq daol heel tsaiq dai
heel leivq leivq-ai thaq khi
aqmaol phul leivq leivq-ai thaq nail
khaoq khoiq maolkhoel juq
aqyu juq bhoil pav khi oil nail ngaol.
Khul khi mail nul juq teevq pav ga nav juq
yu genl dev nail thaiq thail thaiq-u phao
yaol yaol khu lavqkhoel bhai
jaol peivq ail ceevq-a nail-aiq" dai
ge gaiq bhiq nail ngaol.
14 Iqsanl nail kovtavq bhai
uv thaiq nail bhaqaoq eeq nail
Heeqphaq Miqyail neq
heeqphaq juq bhai the ha-u phao
Saq laq moq gaoqjaoq bhai
ollov ga lee-a nail khe-ai dul nail ngaol.
15 Bhaqsanq gaoqjaoq kha dai eeq nail-aiq.
Gaoqjaoq phu lu iqsanl
mao dai jiav nail ngaol.
16 Bhaqsanq gaoqjaoq-ol
khul khi mail, neekhaol maq sil nail lavqkhoel nee
Miqyail-i mail tsel dov-ai thaq nail
Yeel ovq gaoqjaoq bhai hel daiq theq nail-aiq.
Heeqphaq Miqyail neq
gaoqjaoq al jaoq bhai
nqmaq maqluv halyeel jaol naol dai
noeq ceiv-ai thaq nail ngaol.
17 Moeq phaq lavlaoq
aqhinl aq meel-nvq lanl the khi
Silnaq gaoqjaoq nee mail
meeq nail haol nail aqduq bhai
Heeqphaq Miqyail lee-a nail ngaol.
18 Aivq tsaol-aq mao dai nieivq khi
daqmoe bha dav lai nail ngaol.
Aivq nail daoq bhai maq nal daiq nail
tsaol-aq juq bhai kev dai
aivq bhai kovpavq bivq lal nail ngaol.
Heeqphaq Miqyail a bhai jaol nail ngaol.
19 Ngadao bhai hevq kovq lavq nail
Heeqphaq Miqyail bhai geeqlaoq bhiq yaoq.
Aivq neq, yaoq n yaoq-ao nee
ngadao nail yalkav tsao phi lavq nail ngaol.
20 Ngadao nail Miqyail neq
ngadao bhai hevq kovq lavq-a nail
Miqyail pevq khi
sil nail phaq kev lee-u phao
ngadao bhai hevq jel lavq nail
Heeqphaq pevq nail ngaol.
21 Miqyail neq
aivq bhai neejiav jiav nail juq nail uqhuq khi mail
oeqbal maq naq lai dai nl nail juq nail uqhuq bhai
bhi peiv bhi leiv ail nail ngaol.
22 Heeqphaq Miqyail niail hai
ge-ai thaq nail ngaol:
"Ngaq bhai neejiav jiav nail nail juq bhai
Bhaqsanq gaoqjaoq nee mail hevqkol lavq khi
iqyaq iqma nail daoqthaoq nee iqsanl
he kol lavq nail ngaol.
23 Aq-u phao, nul juq nail aqkhil
aqyu juq nail aqsivq lavqkhoel bhai gaoq puvq khi
nul juq nail kheeq juq
aqsivq al bhai mevq daol lal nail ngaol" dai
ge-ai thaq nail ngaol.
24 Miqyail-ol
naoq nail tsaol-aq yaq juq mao dai
uqhuq thaoq nail ilkhaol bha
lai thail thaiq nail bhai ya moel nail ngaol.
Ngaq nail Heeqphaq Miqyail neq
aivq nail meeq nail haol nail aqduq bhai
lai thail thaiq nail ngaol.
25 Daoqsel gul nail juq iqmoeq phao tsao khi
bhaoq laoq jiiv, dil-nvq deeq nail juq
haoqnaol phao tsao khi
tsail lail tsiq nail yaqmai-aq yaqnoil juq
gaoltsi bhai tsao nail ngaol.
26 Jil lai-a nail tsaol-aq juq iqsanl mail
Miqyail bhai tsiq eeq yaoq.
Ilsaqleiqlav nail tsaol-aq juq iqsanl mail
Heeqphaq Miqyail bhai tsiq eeq yaoq.
27 Hel daiq dei-eiq
yu nee maq tsil theq nail
Bheinqyaqminq nail jeq-e
yu nail iqmoeq lai thail thaiq nail ngaol.
A bhai nee ngal-aq
Yuldav jeq-e nail aqivq aqtsu juq
lai thail thaiq nail ngaol.
Al nail haoqnao neq
Seiqbhullonq nail jeq-e khi mail
Naq taq lil jeq-e nail aqivq aqtsu juq
lai thail thaiq nail ngaol.
28 Miqyail-ol
naoq nail bhaqaoq phao daiq lavq yaoq.
Miqyail-ol, aq-u phao khe-ai
naoq nail bhaqaoq phao daiq lavq yaoq.
29 Milkhaoq khe heeqphaq juq
Yeiqlulsaqlaiq meenq bhai jiav nail
naoq nail uqhuq thaoq nail
ilkhaol il ma bha lal khi
naoq bhai kovpavq bivq lal nail ngaol.
30 Lunl aq yal bhai aol ail nail
haqeiv nail haqtsoiq jaiqyaq khe-ai dul nail
yu nail milkhaoq khe heeqphaq juq bhai
khaq bhiq dee dee yaoq.
Aqyu juq neq, niaoqnel niaoq khal hevq khi
tsao nail niaoqnel laq sil juq khe-ai
dul nail ngaol.
Aq-u phao, aqyu juq thaoq kovq khi
yovqgavq nail heel kovpavq bivq nail ngaol.
Thail hai ngaol-aoq
genl dev movq nail neema aol nail juq bhai
the pav the sav bhiq yaoq.
31 Iljiltuv milkhaoq nee bhi lal-a nail juq
lal kev-a nail ngaol.
Khulsav nail milkhaoq khe
tsaol-aq juq iqsanl lal khi
Miqyail bhai geeqlaoq hal nail ngaol.
32 Milkhaoq tsaol jeq-e iqsanl mail
Miqyail bhai daoqsel gul yaoq.
Heeqphaq Miqyail bhai
daoqsel gul khi tsiq eeq yaoq.
33 Mil nee uq nee nee
nqtavq kovtavq bha jaol nail gaq bhai
tsiq eeq yaoq.
Aivq nail aqthel neq, aqkav kav dai
nqjaiq jaiq nail aqthel khe-ai dul nail ngaol.
34 Miqyail nail bhaqaoq nail ganl ge gaiq bhiq yaoq.
Aivq nail seiqleiq khaoqsail
Ilsaqleiqlav milkhaoq kovtavq bhai jiav khi
aivq nail bhaqaoq
nqtavq bha jiav nail ya moel nail ngaol.
35 Aivq nail meeq nail haol nail
jaol duq bhai jaol nail Miqyail
kha dai dai ail noeq-u maq dov heeq phaq-ail
pevq nail ngel ail aiq.
Ilsaqleiqlav nail Miqyail neq
aivq nail tsaol-aq juq bhai
gaq khi bhaqaoq bivq nail ngaol.
Miqyail bhai geeqlaoq bhiq yaoq.