Tsiq eeq 66
Tsiq eeq nail daoqsel
1 Tsaol-aq yaq iqsanl mail
Miqyail bhai lavqkhiq tsail khi
gul nail lavqkhoel nee tsiq eeq yaoq.
2 seiqleiq khaoqsail eeq nail
aivq nail aqmil bhai
daoqsel gul yaoq.
Aivq neq, seiqleiq khaoqsail eeq dei-eiq
aivq bhai tsiq eeq yaoq.
3 Miqyail bhai niail hai ge bhiq yaoq:
"Naoq-i mail nl-a nail ganl juq neq
noeq-u maq dov nail ganl pevq nail ngaol.
Naoq nail bhaqaoq neq, eeq dee dee khi
neejiav jiav nail juq iqsanl
naoq nail sivtavq bhai ya gaol beiv nail ngaol.
4 Miltsaq kovtavq bhai jaol nail
tsaol-aq juq iqsanl mail
naoq bhai uqhuq thaoq nail ngaol.
Aqyu juq neq
naoq bhai daoqsel gul khi tsiq eeq nail ngaol.
Naoq nail aqmil bhai tsiq eeq nail daoqsel
gul nail ngaol" dai, ge bhiq yaoq.
5 Miqyail-i mail nl-a nail ganl juq khi
aivq-i mail tsaol-aq yaq juq bhai
nl-a nail noeq-u maq dov nail ganl juq bhai
hel daiq lal yaoq.
6 Miqyail neq
iqyaq iqma bhai miltsaq aqgee lav phal khi
ngadao juq nail aqphiq aqbhal juq neq
a bhai aqkhil-i mail
tsao ceil leevq-a nail ngaol.
Aq-u phao
aivq-i mail nl lavq-a nail ganl juq bhai
ngadao juq neq, lavqkhiq tsail-a nail ngaol.
7 Miqyail neq
aivq nail bhaqaoq nee mail
khaq mao iqsanl uv thaiq-ai thaq khi
jeq-e jaq-a juq nail phaq khao bhai
hel daiq thail thaiq nail ngaol.
Aivq nail daoq maq nal daiq nail juq
teevq gaq iqsanl
aivq nail sivtavq bhai neema thaq eeq.
8 Tsaol-aq yaq iqsanl mail
ngadao nail Miqyail bhai tsiq eeq yaoq.
Nul juq-i mail tsiq eeq nail aqthel bhi gaiq dei-eiq.
9 Miqyail neq
nv juq bhai bhi doevq lavq khi
maq bhi naoq gaol-aivq lavq-al.
10 Miqyail-ol, naol neq
nv juq bhai laonq daiq lavq-a nail ngaol.
Phul bhai miqjaq-i mail poiv haol-a nail khe-ai
nv juq bhai iqsanl
bhi tsao tsel lavq-a nail ngaol.
11 Naol neq
nv juq-ai lavq phee bhai
bhi ga bhoel ail lavq khi
aqliq liq dee dee nail yalkav
bhi phi lavq-a nail ngaol.
12 Aivq neq
neejiav jiav nail juq-i mail
nv juq bhai bhi naoq thaiq-a nail ngaol.
Nv juq neq
miqjaq ulcuvq haq nail bhai
ya thaoq phuq-a nail ngaol.
Thail hai ngaol-aoq, niil aq-il naol neq
nv juq bhai a bhai nee hevq jel lavq khi
bhee lovq nail jaol duq bhai
hevq thaq lavq-a nail ngaol.
13 Ngal neq
naoq nail ilkhaol bhai
miqjaq kheq tovq khi
laol bhiq nail phaq oil lavq naol.
Ngaq-i mail naoq bhai
saljial jaq-ai thaq nail phaq nl bhee lal naol.
14 Saljial al neq
ngal haq nail aoq nail phaq kev lee-u phao
jaq-a nail saljial ngaol.
15 Al heel ngel-i mail
ngal laolduq kovtavq bhai
miqjaq kheq poiv khi
bhi jaq tsul-ai thaq nail jaiqyaq danq bhiq naol.
Ngaq-i mail yaol kheq poiv-u phao,
miq khoiq dov lal nail ngaol.
Niaoqnel khi mail civqmeiv juq iqsanl
laol bhiq naol.
16 Miqyail bhai gee sil khi
ev nail juq iqsanl mail
lal khi nal daiq lal yaoq.
Aivq ngaq bhai
kha dai tsao jao-ai lavq-a nail ganl
ngal ge bhiq naol.
17 "Tsao jao-ai lavq yaoq" dai
ngal aivq bhai gul khi tsiq eeq-a nail ngaol.
18 Ngaq nail oeqbal bhai
ngal oil uvq-ai thaq haq neq
Heeqphaq Miqyail
ngaq nail geeqlaoq hal daoq bhai
maq nal daiq ail.
19 Thail hai ngaol-aoq, Miqyail neq
ngaq-i mail ge-a nail daoq bhai
maldil gaiq-a nail ngaol.
Ngaq nail geeqlaoq hal daoq bhai iqsanl
gaiq-a nail ngaol.
20 Miqyail bhai geeqlaoq bivq dei-eiq.
Khul khi mail dai ngal-aq, aivq neq
ngaq-i mail hal-a nail geeqlaoq hal daoq bhai
maq khaonq ha lavq nail nee ovqtavq
ngaq nail kovtavq nee
gaoq haq goil gaiq-a nail phaq
maq oil kovq lavq ail.