Tsiq eeq 65
Tsiq eeq nail daoqsel
1 Miqyail-ol
nv juq Yeel ovq gaoqjaoq kovtavq nee
naoq bhai tsiq eeq geel-nvq nail ngaol.
Naoq bhai saljial jaq-ai thaq nail phaq iqsanl
niil aq-il, nv juq nl bhee nail ngaol.
2 Khul khi mail dai ngal-aq
naol neq, geeqlaoq hal daoq bhai
nal daiq lavq nail gaq pevq nail ngaol.
Tsaol-aq yaq iqsanl mail
naol jaol nail bha lal nail ngaol.
3 Nv juq-i mail nl laiq-a nail oeqbal
mao dee dee khi ngaol-aoq
naol neq, nv juq nail oeqbal iqsanl mail
phaiq lavq nail ngaol.
4 Naoq nail ilkhaol lavqkhoel bhai
bhi jaol nail dai khi
naol tsel dov khi naoq nail sivtavq bhai
khul lavq-a nail juq neq
geeqlaoq eeq nail ngaol.
Nv juq neq
naoq nail meeq nail haol nail
uqhuq thaoq nail ilkhaol il ma bhai
meeq nail phaq teevq bhee ya nail ngaol.
5 Nv juq bhai hevq kovq lavq-a nail Miqyail-ol
naol neq, nv juq nail
geeqlaoq hal daoq bhai nal daiq khi
noeq-u maq dov nail phaq khi mail
tsaq nail daoq nail phaq
nv juq bhai nl lavq nail ngaol.
Naol neq, miltsaq niil teevq heeq heeq lao khi mail
eqyal bha jiav nail iqyaq iqma bhai
khal jaol nail juq nail
noeq thunq duq pevq nail ngaol.
6 Naol neq, gaoqjaoq juq bhai
naoq nail gaq-i mail teivq-ai thaq khi
jiovqpavq pavq-nvq thaq nail khe-ai
bhaqaoq doi-nq thaq nail ngaol.
7 Naol neq
iqyaq iqma nail aqthel bhai maqkhaiq
al nail lavqkhoel khe
eel khaol thaoq nail aqthel bhai maqkhaiq
hee tsul dai, bhi pevq ail-a nail ngaol.
Tsaol-aq yaq-i mail meel nail aqthel bhai iqsanl
hee tsul dai, bhi pevq ail-a nail ngaol.
8 Naoq-i mail nl-a nail
noeq-u maq dov nail phaq bhaq da nee
miltsaq niil teevq heeq heeq lao khe
jaol nail tsaol-aq juq
gee sil lal bhiq-a nail ngaol.
Al ovqtavq
naoq-i mail nl daiq lavq-a nail ganl bhaq da nee
nlma dov khoeq nee ga khoeq bha kev dai
lavqkhiq tsail khi gul nail aqthel dov lal-a nail ngaol.
9 Miqyail-ol, naol neq
maoq-aol bhi aol lee khi
miltsaq mil meeq bivq lavq-a nail nee ovqtavq
miltsaq bhai hel daiq phail lavq-a nail ngaol.
Naoq nail laoljaol juq bhai
ulcuvq bhi bhee-a nail ngel-i mail
miltsaq bhai heeqlaoq gaoqjal
doevq lal-a nail ngaol.
Naoq-i mail nl nail ganl neq
niil heel ngaol.
10 Naol neq
maoq-aol bhi aol lee khi
kha-ai thaq nail daiyal juq bhai
aqjail bhi jail lai-a nail ngaol.
A bhai nee ngal-aq
maoq-aol bhaq da nee
miltsaq bhai aq nuq bhi nuq lal khi
aqbhaol bhaol yaq juq bhai
bhi doevq dov lal-a nail ngaol.
11 Heeqphaq teevq gaq neq
heel uq tsaoq tsaoq-u phao
bhee lovq nail khe-ai
yaoq kovq yaoq-ao nee miltsaq bhai
aqheeq allu juq naol bhi bhee lovq lal-a nail ngaol.
Aq heeq al lu al juq
yaoq dao yaoq-ao nee bhee khal ail-u kev dai
mao dee dee nail ngaol.
12 Jaiqyaq gav jaq duq bhai
moeqgaq aqniul niul dol lavq-a nail ngaol.
Gaoqjaoq juq iqsanl, lavqkhiq tsail nail ngaol.
13 Dai khaoq aqsal bhai yaol juq
khi mail civqmeiv juq mao dai jaol nail ngaol.
Daiyal juq iqsanl
gov gov bhaol-i mail uv thaiq-ai thaq khi
lavqkhiq tsail nail aqthel nee mail
daoqsel gul nail ngaol.