Tsiqeeq 64

Tsiq eeq 64

Haq eiv nail juq nee hevq uvq lavq yaoq dai, hal nail geeqlaoq hal daoq

Daoqsel gul nail juq nail aqivq gaq bhai bhi heeq nia nail galduq: Daq bhil nail daoqsel

1 Miqyail-ol

ngal haq nail aoq nail phaq

kev lee khi jaol nail ngaol.

Ngaq-i mail hal nail

geeqlaoq hal daoq bhai nal daiq lavq yaoq.

Ngal neq, neejiav jiav nail tsaol-aq juq bhai

gee sil khi jaol nail ngaol.

Ngaq nail doevqyeel bhai

hel daiq phail lavq yaoq.

2 Haq eiv nail tsaol-aq juq-i mail

aqdoil phaq nl nail dai khi

maoq bhaoq nl nail nee maqkhaiq

doil nail tsaol-aq juq-i mail

oeqbal nl nail dai khi

jil lai-a nail nee maqkhaiq

ngaq bhai hevq uvq lavq yaoq.

3 Aqyu juq neq, yovqgavq nail moevqlal bhai

thaoma khe-ai, bhi tav khi

aqyu juq-i mail ge nail daoq neq

dovq niaoq nail

heeqnav maq tsoe khe-ai, dul nail ngaol.

4 Aqyu juq neq

yu maq moel nia nail aqduq bhai jaol khi

khul maq laiq nail juq bhai bev nail ngaol.

Gee sil nail neema maq aol mail

thaiq phuq dai, bev nail ngaol.

5 Aqyu juq neq, haqeiv nail phaq nl nail bhai

teevq gaq nee teevq gaq, gaq bivq nail ngaol.

Aqyu juq-i mail

lavq phee khail-ai thaq nail aqduq bhai

ge tsaoq pheel jaq gaq khi

"Lavq phee niil khail-ai thaq nail bhai

khaq sil gaq moel nia nail-aiq" dai, ge nail ngaol.

6 Aqyu juq neq

maq tsaq maq daol nail phaq nl nail dai khi

maoq bhaoq nl khi ngaol-aoq

"Nv juq neq

bhee lovq nail neenoeq neekha aol khi

maoq bhaoq nl-a nail ngaol" dai, ge nail ngaol.

Mal dil dai, ge haq neq

tsaol-aq yaq nail nee noeq khi neema neq

aqnavq navq dee dee nail ngaol.

7 Thail hai ngaol-aoq, Miqyail neq

aqyu juq bhai aivq nail heeqnav-i mail bev khi

teevq pov taivq-ail ga tsuq ail khi

ya nal nail ngaol.

8 Aqyu juq-i mail ge-a nail daoq bhaq da nee

aqyu juq bhai lav luq lav seil bhiq nail ngaol.

Aqyu juq bhai ya moel-a nail

tsaol-aq juq iqsanl mail meel naq meel naq ail

uqhuq jiivq nail ngaol.

9 Aq-u phao, tsaol-aq iqsanl mail

gee sil nail lavqkhoel nee

Miqyail-i mail nl-a nail ganl juq bhai ge gaiq khi

aivq-i mail nl-a nail phaq bhai

saol-nvq nail ngaol.

10 Tsaq nail daol nail tsaol-aq juq neq

Heeqphaq Miqyail nail lavqkhoel bhai

lavqkhiq tsail khi juq nail ngaol.

daol coev dai doevq nail tsaol-aq juq iqsanl

Miqyail bhai tsiq eeq nail ngaol.