Tsiq eeq 63
Miqyail bhai hal pov nail ganl
1 Miqyail-ol, naol neq
ngaq nail Miqyail pevq nail ngaol.
Ngal naoq bhai hal pov dee dee nail ngaol.
Ulcuvq maq jiav dai
gee lee del deel milkhaoq bhai
ngaq nail neema aqhaqlal
ulcuvq moevq nail khe-ai
naoq bhai moevq dee dee nail ngaol.
Ngaq nail aqmaol iqsanl
naoq bhai moel movq dee dee nail ngaol.
2 Ngal naoq nail bhaqaoq khi
seiqleiq khaoqsail bhai ya moel dai
naoq nail meeq nail haol nail
jaol duq bhai jaol khi
naoq bhai daonq nail ngaol.
3 Naoq-i mail gaoq haq goil gaiq-a nail phaq neq
doevq nail phaq nee maq tsil
meeq jaiq nail ngel-i mail
ngaq nail moeqthaoq naoq bhai
tsiq eeq nail ngaol.
4 Ngal aqdoevq khal doevq-u kev dai
naoq bhai geeqlaoq bivq nail ngaol.
Naoq nail aqmil bhai juq khi
ngaq nail aqlavq bavq dil nail ngaol.
5 Ngal neq
meeq dee dee nail aqjal ya jaq nail khe-ai
bhee lovq nail ngaol.
Ngaq nail moeqthaoq
lavqkhiq tsail nail lavqkhoel nee gul khi
naoq bhai tsiq eeq nail ngaol.
6 Ngal ngaq nail iq thaiq duq bhai iq thaiq-u phao
naoq bhai noeq dov lal khi
hul-iq tsil ma naoq nail ganl bhai
saol-nvq daiq nail ngaol.
7 Naol neq, ngaq bhai
tsao jao-ai lavq-a nail gaq pevq nail ngel-i mail
ngal neq, naoq nail aqdaol iq govq bhai
lavqkhiq teevq tsail daoqsel gul nail ngaol.
8 Ngal naoq bhai juq nail ngaol.
Naoq nail lavqmal lavq
ngaq bhai he thaiq-ai thaq nail ngaol.
9 Ngaq nail doevqyeel bhai
lav cov nail dai khi lainq nail juq neq
miltsaq niil khal navq nail aqduq bhai
ya kev ail nail ngaol.
10 Aqyu juq neq, thaoma nee ya sil khi
kheeq siv nail aqjal pevq ail nail ngaol.
11 Thail hai ngaol-aoq
heeqphaq pevq nail ngal neq
Miqyail nail lavqkhoel bhai
lavqkhiq tsail nail ngaol.
Aivq bhai khal khanq nail tsaol-aq juq bhai
aivq thaq eeq nail ngaol.
Goiq bhaoq bhaoq nail juq nail moeqthaoq neq
ya bhi phee thaiq nail ngaol.