Tsiq eeq 62
Miqyail hel daiq phaiq lavq naol dai, neema thaq tsaol nail ganl
1 Ngaq nail neema neq
Miqyail nail lavqkhoel bhai taivq-ail
nee sal ya nail ngaol.
Khul khi mail dai ngal-aq
ngaq bhai hevq kovq nail phaq neq
Miqyail jaol nail nee lee nail ngaol.
2 Aivq taivq-ail ngaq nail lovphail
ngaq bhai hevq kovq nail gaq
ngaq nail ivq nail tavq pevq nail ngaol.
Ngal neq, ivq dao dai thul phaol kivq nail ngaol.
3 Nul juq neq, khaq mao kev dai
ngaq bhai aqkav kav dai genl dev-ai haq nail-aiq.
Nul juq iqsanl mail neq
bhil gai gai-ail thaq nail ilphail dai khi
aq luq aq gel gel-ail thaq nail khainl khe-ai
ngaq bhai saol-nvq lavq nail ngaol.
4 Ngaq bhai
moe dee dee nail jaol duq nee mail
doeq kha nail dai khi
aqyu juq maoq bhaoq nl thail thaiq nail ngaol.
Aqyu juq neq
goiqbhaoq bhaoq nail bhai ya lai nail ngaol.
Aqyu juq nail moeqthaoq
geeqlaoq bivq khi ngaol-aoq
aqyu juq nail neema lavqkhoel bhai neq
ivqkhail yavq nail teevq bhee aol nail ngaol.
5 Ngal neq
Miqyail nail lavqkhoel bhai
nee sal ya nail ngaol.
Khul khi mail dai ngal-aq
ngal noeq thunq nail phaq neq
Miqyail jaol nail nee lee ail teevq-eel ngaol.
6 Aivq taivq-ail ngaq nail lovphail
ngaq bhai hevq kovq nail gaq
ngaq nail ivq nail tsaoq uvq duq pevq nail ngaol.
Ngal neq, ivq dao dai thul phaol kivq nail ngaol.
7 Ngaq bhai hevq kovq nail phaq khi mail
ngaq nail seiqleiq khaoqsail neq
Miqyail jaol nail nee lee nail ngaol.
Aivq neq, ngaq nail lovphail
ngaq nail juq duq pevq nail ngaol.
8 Tsaol-aq yaq juq-ol
Miqyail bhai khaq mao iqsanl
neema thaq tsaol yaoq.
Naoq nail neema aivq nail sivtavq bhai
phao daiq bhiq yaoq.
Khul khi mail dai ngal-aq
aivq neq, nv juq nail juq duq pevq nail ngaol.
9 Haq nail aoq nail juq neq
peivq ail nia nail lilmoel khe-ai dul khi
hulmeeq hul bhao juq iqsanl
ivq dao dai jiav nail bhai moel lal khi ngaol-aoq
peivq ail boev ail nia nail phaq teevq-eel ngaol.
Ja luq-i mail hav daiq-u phao
nvq phaq nvq phaq ail
lilmoel nee maq tsil phai nail ngaol.
10 Yu bhai khoeq bhiq jiovq bhiq khi
ya lal nail phaq bhai
neema thaq thaq tsaol.
Tsai gaq tsai dav dav khi
ya lal nail phaq bhai iqsanl, thaq noeq thunq.
Ildaoq maoqgaiq mao lal khi ngaol-aoq
al juq bhai neema thaq jiav.
11 Miqyail neq, teevq pov ge lavq gaq khi
nvq pov teevq pov
ngaq-i mail ya gaiq-a nail phaq neq
niail hai ngaol:
Bhaq aoq iqsanl mail, Miqyail nail ngaol.
12 Heeqphaq Miqyail-ol
gaoq haq goil gaiq-a nail phaq neq
naoq nail pevq nail ngaol.
Khul khi mail dai ngal-aq, naol neq
tsaol-aq yaq yaoq gaq yaoq-ao nee bhai
yovqgavq-i mail khal nl-a nail khe-ai
geel-nvq dai bivq kovq nail ngaol.