Tsiqeeq 60

Tsiq eeq 60

Hevq kovq lavq yaoq dai hal nail geeqlaoq hal daoq

Daoqsel bhi gul nail juq nail aqivq gaq bhai bhi heeq nia nail galduq: Daq bhil neq, Meiq sol bhaoq taq mil khi mail Jaoq tal mav tsaol-aq bhai genl dev khi, Yaoqbav neq, Eiqdonq nail tsaol-aq 12,000 gaq bhai gaoqjaoq nvq gaiqlaq bhai jiav nail Cavq devq dai khul nail aqduq bhai heivq-a nail ganl nee tavq lai nail daoqsel ngaol. Daoqsel al neq, Daoqma saljial nail aqeivq nail daoqsel gul nail aqthel khe-ai bhi gul yaoq. Daq bhil-i mail ge dov-a nail cavq bhi cov bhiq nail daoqsel

1 Miqyail-ol

naol nv juq bhai khaonq ha khi

nv juq nail genl dev nail munl munl ma

bhi peiv ail-a nail ngaol.

Naol nv juq bhai neema phail nail ngaol.

Thail hai ngaol-aoq

niil aq-il nv juq bhai hel daiq tsaoq lavq yaoq.

2 Miltsaq luv lav dao lal dai naol nl khi

bhi tsaoq pav gil-a nail ngaol.

Miltsaq dao thail thaiq nail ngel-i mail

niil aq-il gaoq lav meeq kovq yaoq.

3 Naoq nail tsaol-aq juq ya haq ya aoq

dee dee-a nail nee ovqtavq

jil pheeq daol bov khi haq nail khe-ai

ga tsuq ga tsuq ail tsao dai

naol nl lavq-a nail ngaol.

4 Thail hai ngaol-aoq

naoq bhai gee sil khi ev nail tsaol-aq juq bhai

heeqnav maq tsoe nee bhi jel-ail nail galduq

naol gaq lai nail phal laoq phal lail

he dil bhiq nail ngaol.

5 Naol gaiq-a nail tsaol-aq juq

hevq kovq nail phaq ya dai

nv juq-i mail hal nail daoq bhai nal daiq lavq khi

naoq nail lavqmal lavq nail bhaqaoq nee

nv juq bhai hevq kovq lavq yaoq.

6 Miqyail neq

aivq nail meeq nail haol nail

jaol duq bhai jaol khi

niail hai ge-ai thaq nail ngaol:

"Ngaq nail tsaol-aq juq bhai Seiq khunq meenq

ngal lavqkhiq teevq tsail bhoil bhiq khi

Sulkov dai khaoq aqsal iqsanl

tsa daiq khi bhoil bhiq naol.

7 Gil lav milkhaoq neq, ngaq nail ngaol.

Maqnaqseiq nail jeq-e sanl

ngaq nail ngaol.

Eil phaq leiq nail jeq-e neq

ngaq nail genl dev nail uq tsaoq pevq khi

Yuldav milkhaoq neq

ngaq-i mail nieivq thaiq-ai thaq nail

heeqphaq nail heel joiqniaoq pevq nail ngaol.

8 Thail hai ngaol-aoq

Maolbav milkhaoq neq

ngal aqmaol jiivq nail

thailphail phail ma khe-ai yuq naol.

Eiqdonq milkhaoq bhai

ngaq nail saiqnaov tsaoq thaq khi

Pilliltiv milkhaoq bhai iqsanl

ngal gaq lai-a nail ganl

bhaq laoq khe dai gul naol" dai

ge-ai thaq nail ngaol.

9 Miqyail-ol

ivq dao dai, kaovq ivq-ai thaq nail meenq bhai

khaq sil gaq ngaq-ai hel aivq lavq nail-aiq.

Eiqdonq milkhaoq bhai

khaq sil gaq ngaq-ai hel aivq lavq nail-aiq.

10 Naol nv juq bhai

maldil khaonq ha-aoq naol laiq.

Nv juq nail genl dev nail munl munl ma nee mail

genl dev nail bha naol maq lee yaoq-aol laiq.

11 Nee jiav jiav nail juq bhai

nv juq genl dev gaq kivq dai

tsao jao-ai lavq yaoq.

Khul khi mail dai ngal-aq

tsaol-aq yaq-i mail tsao jao-ai lavq nail neq

ganl maq tsoiq ail.

12 Miqyail nv juq nee mail jaol haq neq

nv juq gaq lai nail ngaol.

Nee jiav jiav nail juq bhai

aivq genl dev gaq nail ngaol.