Tsiq eeq 59
Hel daiq phail lavq yaoq dai, hal nail geeqlaoq hal daoq
1 Ngaq nail Miqyail-ol
neejiav jiav nail juq nail aqlavq lavqkhoel nee
ngaq bhai bhi jel-ail lavq yaoq.
Ngaq bhai genl dev lee nail juq nail
aqlavq lavqkhoel nee iqsanl
hel daiq phail lavq yaoq.
2 Haq eiv nail tsaol-aq juq nail
aqlavq lavqkhoel nee
ngaq bhai bhi jel-ail lavq yaoq.
Tsaol-aq bhai heivq nail juq nail
aqlavq lavqkhoel nee iqsanl
hevq kovq lavq yaoq.
3 Heeqphaq Miqyail-ol, hel daiq yaoq.
Ngal khul maq nl laiq-a nail bhai
ngaq bhai heivq nail dai khi
aqyu juq lovq thail thaiq nail ngaol.
Gee sil lal heeq phaq-ail
tsaq nail tsaol-aq juq
ngaq bhai lav cov nail dai khi
maoq bhaoq nl thail thaiq nail ngaol.
4 Ngal khul maq nl laiq-a nail bhai
ngaq bhai genl dev lee nail dai khi
lainq thail thaiq nail ngaol.
Al heel ngel-i mail
naol thul lal khi hel daiq nail nee ovqtavq
tsao jao-ai lavq yaoq.
5 Nqtavq kovtavq khe genl dev nail
munl munl ma nail kovtavq bhai
bhaqaoq eeq nail Heeqphaq Miqyail-ol
Ilsaqleiqlav jeq-e jaq-a nail Miqyail-ol
thul lal yaoq.
Yu nail jeq-e jaq-a juq bhai
khoeq bhiq jiovq bhiq yaoq.
Saljial maq ivq nail
haqeiv nail tsaol-aq juq bhai
thaq gaoq haq bhiq.
6 Aqyu juq nqkiv phao kovq lal khi
kheeq khe-ai laol laol ail
meenq doi dai tsao nail ngaol.
7 Aqyu juq aq jiivq aq cavq nail
daoq ge nail bhai nal daiq yaoq.
Aqyu juq nail moeqthaoq lavqkhoel nee
dov lee nail daoq neq
thaoma khe-ai, tav nail ngaol.
Aqyu juq daoq ge nail bhai
yu maq gaiq nia ail dai, noeq nail ngaol.
8 Thail hai ngaol-aoq
Heeqphaq Miqyail-ol, naol neq
aqyu juq bhai hel sil khi
yu nail jeq-e jaq-a juq bhai
khal ge movq ail ge nail ngaol.
9 Miqyail-ol
naol ngaq nail gaq pevq khi
ngal naoq bhai daonq nail ngaol.
Khul khi mail dai ngal-aq neq
naol ngaq nail
ivq dee dee nail juq duq pevq nail ngaol.
10 Ngaq nail Miqyail
ngaq bhai gaoq haq goil gaiq-a khi
ngal jaol nail bha lee nail ngaol.
Ngaq bhai neejiav jiav nail juq
luq ail seil ail nail bhai
aivq ngaq bhai bhi hel daiq lavq-a nail ngaol.
11 Heeqphaq Miqyail-ol
nv juq nail doeq daq duq-ol
aqyu juq bhai ngaq nail tsaol-aq juq
maq bhi nioil peivq nail haqbhoil
aqyu juq bhai thaq heivq ha lao.
Naoq nail gaq nee mail aqyu juq bhai
the ha khi genl dev gaq bhiq yaoq.
12 Aqyu juq nail moeqthaoq lavqkhoel bhai
oeqbal aol khi
aqyu juq-i mail khal ge nail daoq iqsanl
oeqbal aol nail ngaol.
Aqyu juq-i mail neema eeq nail phaq bhai
aqyu juq gaoq bhi tev pheel laivq yaoq.
Aqyu juq ivqkhail yavq khi
goiqbhaoq bhaoq nail ngel-i mail
13 aqyu juq bhai neema phail nail lavqkhoel nee
lav cov bhiq yaoq.
Peivq ail boev ail gil dai
lav cov bhiq yaoq.
Aq-u phao
Ilsaqleiqlav milkhaoq bhai
Miqyail uv thaiq nail ganl
nq jail mil jail bha kev dai
tsaol-aq iqsanl mail ya heeq nia nail ngaol.
14 Ngaq bhai neejiav jiav nail juq
nqkiv phao kovq lal khi
kheeq khe-ai laol laol ail
meenq doi dai, tsao nail ngaol.
15 Doi doi dai aqjal hal pov jaq nail kheeq juq
aqjal maq ya jaq bov dai
meel nail khe-ai
aqyu juq meel meel ail tsao nail ngaol.
16 Thail hai ngaol-aoq
naol gaq eeq nail ganl bhai
ngal daoqsel gul nail ngaol.
Naoq-i mail gaoq haq goil gaiq-a nail ganl bhai
yaoq haoq yaoq-ao nee
ngal gul gul ail tsiq eeq nail naol.
Naol ngaq nail tavq pevq khi
haq nail aoq nail phaq kev lee-u phao
juq kivq nail ngaol.
17 Ngaq bhai gaq bivq lavq nail gaq-ol
ngal naoq bhai tsiq eeq naol.
Miqyail-ol
naol ngaq nail ivq nail tsaoq uvq duq pevq khi
ngaq bhai gaoq haq goil gaiq-a nail Miqyail ngaol.