Tsiq eeq 58
Haq eiv nail tsaol-aq bhai Miqyail nl kovq bhiq dai, hal nail geeqlaoq hal daoq
1 Uv thaiq nail juq-ol
nul juq milkhaoq yaq juq bhai daol coev dai
ge ceiv thail ceiv bhiq thail thaiq naol laiq.
Tsaol-aq yaq juq bhai daol coev dai
yalkhaq dal bhiq thail thaiq naol laiq.
2 Thail hai ngaol-aoq, nul juq al hai maq ngel ail.
Laiq nail tsa nail phaq
nl nail haqbhoil taivq-ail saol-nvq khi
lav cov nail phaq taivq-ail miltsaq bhai
nul juq nl thail thaiq nail ngaol.
3 Haq eiv nail tsaol-aq juq neq
aqma nail ovqmav lavqkhoel bhai
aol-u nee mail, haqeiv khi
doevq lee-u nee mail
gail bheeq bheeq nail nee ovqtavq
goiqbhaoq bhaoq nail ngaol.
4 Aqyu juq eellel khe-ai dovq aol khi
eellel eel nav naq thaoq khe-ai
naq khaol pavq tsoiq tsoiq-ai thaq nail ngaol.
5 Eellel bhai khul nia nail juq
kha dai lai jai khi ngaol-aoq
maq nal daiq nail khe-ai
aqyu juq maq nal daiq ail.
6 Miqyail-ol
aqyu juq nail aqhaoq ngaoq khoi bhiq yaoq.
Heeqphaq Miqyail-ol
al laq jaq sil niil juq nail aqjeel
ngaoq keivq bhiq yaoq.
7 Ulcuvq il hal-aivq nail khe-ai
aqyu juq peivq ail dei-eiq.
Al ovqtavq
heeqnav maq tsoe maq covq nail khe-ai
ganl maq tsoiq dai, bhi pevq ail dei-eiq.
8 Aqyu juq neq, phaq gil lai nail laoq cuvq
lal neovq khe-ai, bhi peivq ail dei-eiq.
Aq sil doevq lee khi, aqbhaq bhai
maq ya moel-a nail yaq khe-ai, dul dei-eiq.
9 Miltsaq iqlaoq aqgee aqjail maqkhaiq
miqjaq poiv nail aqlaol bhai
maq ya daq dan-u nee mail
Miqyail neq, haqeiv nail juq bhai
lavqtsail mail lav cov nail ngaol.
10 Haq eiv nail tsaol-aq juq bhai
nl kovq bhiq nail bhai ya moel-u phao
tsaq nail daol nail tsaol-aq juq lavqkhiq tsail khi
haqeiv nail tsaol-aq al juq nail
aqsivq il-ai thaq nail bhai
aqkhil tsaoq puvq khi tsao nail ngaol.
11 Aq-u phao
tsaol-aq yaq juq niail hai ge nail ngaol:
"Tsaq nail daol nail tsaol-aq juq
maldil kovpavq ya ail nial.
Miltsaq bhai yalkhaq dal nail Miqyail
maldil jaol lao thaq nial" dai, ge nail ngaol.