Tsiqeeq 57

Tsiq eeq 57

Tsao jao-ai lavq yaoq dai, hal nail geeqlaoq hal daoq

Daoqsel bhi gul nail juq nail aqivq gaq bhai bhi heeq nia nail galduq: Daq bhil Saol luv nee tsaoq jel nail dai khi, lovphailkhaoq bhaoq bhai tsaoq bhoel aivq-a nail ganl nee tavq lai khi, gul-a nail daoqsel. Daoqsel al neq, "Thaq lav cov dei-eiq" dai, daoqsel gul nail aqthel khe-ai, bhi gul yaoq.

1 Miqyail-ol

ngaq bhai gaoq haq gaiq-a lavq yaoq.

Gaoq haq gaiq-a lavq yaoq.

Ngal naoq bhai juq nail ngaol.

Naoq nail aqdaol ivq govq bhai

lav luq lav seil nail

nqjaiq lilmoel tsil lai-u kev dai

ngal tsaoq uvq nail ngaol.

2 Ngal eeq dee heel dee dee nail

Miqyail bhai gul nail ngaol.

Ngaq bhai yaoq phaq yaoq-ao nee

bhi pevq lai nia nail

Miqyail bhai gul nail ngaol.

3 Aivq nqtavq kovtavq nee

ngaq bhai bhi hevq kovq lavq nail lavqkhoel

ngaq bhai khoeq lal jiovq lal nail

tsaol-aq juq nail kovtavq bhai

haq sil nail phaq bhi kev ail nail ngaol.

Ngaq nail Miqyail neq

aivq-i mail gaoq haq goil gaiq-a nail phaq khi mail

saljial ivq nail phaq

ngaq nail kovtavq bhai

bhi kev lee nail ngaol.

4 Tsaol-aq nail haqjoil jaq nail

al laq jaq sil khe-ai dul nail neejiav jiav nail juq

ngaq bhai lovq jaoq-ai thaq nail ngaol.

Aqyu juq nail aqhaoq

geeq khaoq juq khi mail

heeqnav maq tsoe juq khe-ai dul khi

aqyu juq nail moevqlal

tav dee dee nail thaoma khe-ai dul nail ngaol.

5 Miqyail-ol, naol neq

nqtavq kovtavq moe nail nee maq tsil

eeq jaiq heel jaiq nail ngaol.

Naoq nail seiqleiq khaoqsail

milkhaoq doi dai bhi bhaq lee dei-eiq.

6 Nee jiav jiav nail juq ngaq bhai

bhi phee lai nail dai khi

lavq phee khail-ai thaq nail ngel-i mail

ngal neema gaq bhaq nail ngaol.

Ngal ail nail gailkhaol bhai

aqyu juq khaq duq duq nail ngaol.

Thail hai ngaol-aoq,

aqyu juq yovqgav yovqgavq

ga bhoel ail nail ngaol.

7 Miqyail-ol

ngaq nail neema ivq dao dai jiav nail ngaol.

Ivq dao dai jiav nail ngaol.

Ngal naoq bhai daoqsel gul khi tsiq eeq naol.

8 Ngaq nail nee ma-ol, noeq lal yaoq.

Ngaq nail dil-nvq heeq ma khi heeq yaq-ol

noeq lal yaoq.

Nl ma bhai ngal lav noeq naol.

9 Heeqphaq Miqyail-ol

milkhaoq yaq juq nail sivtavq bhai

ngal naoq bhai tsiq eeq nail ngaol.

Jeq-e jaq-a juq nail sivtavq bhai iqsanl

naoq bhai tsiq eeq nail ngaol.

10 Khul khi mail dai ngal-aq neq

naoq-i mail gaoq haq goil gaiq-a nail phaq

nqtavq bha kev dai jiav khi

naol saljial ivq nail phaq

nqdil bha tuv nail ngaol.

11 Miqyail-ol, naol neq

nqtavq kovtavq moe nail nee maq tsil

eeq jaiq heel jaiq nail ngaol.

Naoq nail seiqleiq khaoqsail

miltsaq teevq heeq heeq lao bhai

bhi bhaq lee dei-eiq.