Tsiqeeq 56

Tsiq eeq 56

Heeqphaq Miqyail bhai juq nail gaq nail geeqlaoq hal daoq

Daoqsel bhi gul nail juq nail aqivq gaq bhai bhi heeq nia nail galduq: Pilliltiv nail tsaol-aq, Daq bhil Gaq tav meenq bhai jaol khi bhi nieivq-u phao khe ganl nee tavq lai khi, gul-a nail daoqsel ngaol. Daoqsel al neq, eqyal bha jiav nail milkhaoq khe aqbhaol daqmoe bha dav nail khaoq khoiq nee tavq nail daoqsel gul nail aqthel khe-ai, bhi dul dei-eiq.

1 Miqyail-ol

ngaq bhai gaoq haq gaiq-a lavq yaoq.

Khul khi mail dai ngal-aq

tsaol-aq yaq juq neq

ngaq bhai naoq thaiq khi

teevq n n lao khoeq lavq jiovq lavq nail ngaol.

2 Ngaq bhai neejiav jiav nail juq neq

ngaq bhai teevq n n lao

naoq thaiq-ai thaq khi

tsaol-aq mao dai eeq nail heel nail neema nee

ngaq bhai genl dev thail thaiq nail ngaol.

3 Thail hai ngaol-aoq

ngal gee sil lal-u phao

naoq bhai neema thaq tsaol nail ngaol.

4 Ngal Miqyail nail daoq bhai tsiq eeq khi

aivq bhai neema thaq tsaol nail ngel-i mail

maq gee sil.

Tsaol-aq yaq juq ngaq bhai khul khi nia nail-aiq.

5 Aqyu juq neq

teevq n n lao ngaq nail daoq oil khi

maq ngel nail phao

goiqbhaoq bhaoq nail ngaol.

Aqyu juq-i mail

lainq-ai thaq nail yaoq phaq yaoq-ao nee

ngaq nail kovtavq bhai

haq nail aoq nail phaq

bhi kev lee ail teevq-eel ngaol.

6 Aqyu juq jil lai khi

ngaq bhai khoiq hel daiq nail nee ovqtavq

ngaq bhai heivq nail dai khi

ngaq-i mail nl nail hal nail bhai

hel daiq thail thaiq nail ngaol.

7 Miqyail-ol

aqyu juq nail oeqbal nee

thaq bhi jel-ail dei-eiq.

Naol neema phail nail lavqkhoel nee

aqyu juq bhai lav luq lav seil bhiq yaoq.

8 Ngaq-i mail nee noeq haq khi

doi doi dai tsao-a nail bhai

naol ge daiq khi heeq nia nail ngaol.

Ngaq nail maivbhil juq iqsanl mail

naoq nail eelpheeq bhai

laol bhoel-aoq nail ngaol.

Thoil juq iqsanl mail neq

naoq nail phaldoiq lavqkhoel bhai

gevq bhoel gil-aoq nail ngaol.

9 Ngal naoq bhai khul-u n-gaol

ngaq bhai neejiav jiav nail juq

haoqnaol phao tsaoq kol-aivq nail ngaol.

Al bhaq da nee, Miqyail neq

ngaq-ai phao jaol naol dai

ngal heeq kivq naol.

10 Miqyail-ol

ngal naoq nail daoq bhai tsiq eeq nail ngaol.

Heeqphaq Miqyail-ol

ngal naoq nail daoq bhai tsiq eeq nail ngaol.

11 Ngal Miqyail bhai

neema thaq tsaol nail ngel-i mail

gee sil nail phaq maq jiav yaoq-aol.

Tsaol-aq yaq juq ngaq bhai khul khi nia nail-aiq.

12 Miqyail-ol, naoq-ai nee mail

jaq-ai thaq nail saljial

ngaq nail lavqkhoel bhai jiav nail ngaol.

Al heel ngel-i mail

ngal naoq bhai geeqlaoq eeq nail

laol bhiq nail phaq ya laol bhiq nail ngaol.

13 Khul khi mail dai ngal-aq, naol neq

ngaq nail aqkhil phaq thiq maq ya thiq dai

hel daiq phail lavq khi

sil nail lavqkhoel nee

hevq dov lavq-a nail ngaol.

Al heel ngel-i mail, Miqyail-ol

ngal naoq nail sivtavq bhai

aqdoevq bhi doevq nail

naoq nail aqbhaq lavqkhoel bhai

tsao kivq nail ngaol.