Tsiq eeq 55
Saljial maq ivq nail aqtsaoq-i mail bhi khaonq ha-a nail gaq nail geeqlaoq hal daoq
1 Miqyail-ol
ngaq-i mail hal nail geeqlaoq hal daoq bhai
nal daiq lavq yaoq.
Ngal gul-u phao
maivphaoq yaoq phao yaoq
thaq tsiq phaol lavq.
2 Ngaq nail daoq bhai nal daiq khi
ngaq bhai ge kovq lavq yaoq.
Ngal neq
ngaq-i mail ya thaoq phuq-a nail
haq nail aoq nail phaq bhaq da nee
maq jaol maq jaq kivq dai
neema suq saq thail thaiq nail ngaol.
3 Khul khi mail dai ngal-aq
neejiav jiav lal nail juq neq
aqthel aqkav kav dai gul lal khi
gee sil lal nail daoq ge lal nail ngel-i mail ngaol.
Aqyu juq neq, ngaq bhai
haq nail aoq nail phaq bhi kev lee khi
neema phail dee dee nail lavqkhoel nee
ngaq bhai bhe nail ngaol.
4 Ngaq nail neema
aqjuq juq dee dee nail ngaol.
Sil nail phaq nee tavq nail gee sil lal nail phaq
ngaq nail kovtavq bhai kev lee-a nail ngaol.
5 Gee sil nail phaq maqkhaiq
tsaoq deel-nvq ail khi
aqjuq juq nail phaq maqkhaiq
ngaq nail kovtavq bhai kev lee khi
gee sil nail neema iqsanl
ngaq bhai uv thaiq-ai thaq nail ngaol.
6 Ngal khaoq khoiq khe-ai
aqdaol covq lao-aol kheel nul-uq
bhail jal-aivq khi gaq naq naq ail nail ngaol.
7 Ngal eq dee dee nail bha
tsaoq peil-aivq khi
haqtsoiq haqyal bha jaol ail naol.
8 Kav dee dee nail lilmoel nee maqkhaiq
eel khaol nee maqkhaiq
ngal ya jel-ail nail aqduq bhai
lavqtsail mail tsaol-aivq nail ngaol.
9 Heeqphaq Miqyail-ol
neejiav jiav nail juq bhai bhi suq saq lal khi
aqyu juq nail daoq bhai
lav bheeq lav leel bhiq nail lavqkhoel nee
bhi pav ail yaoq.
Khul khi mail dai ngal-aq
meenq lavqkhoel bhai
khaq pheel khaq lul jaq nail phaq khi
deeq pheel deeq lul jaq nail phaq bhai
ngal ya moel-a nail ngaol.
10 Aqyu juq neq
meenq al meenq nail khainl lavqkhoel bhai
nqkiv n-gaol maq bhao dai, tsao jaoq khi
aqdoil phaq khi mail haqeiv nail phaq iqsanl
meenq al meenq nail lavqkhoel bhai jiav nail ngaol.
11 Lav luq lav seil nail phaq neq
meenq al meenq nail lavqkhoel bhai jiav khi
goiqbhaoq bhaoq jaq nail phaq iqsanl
meenq al meenq nail jul gu leiv keiv bhai
khaq mao iqsanl maq peivq ail dai
jiav nail ngaol.
12 Mal dil dai ge haq neq
ngaq bhai khal ge movq ail ge nail al gaq neq
ngaq bhai neejiav jiav nail gaq maq ngel ail.
Ngel lao-aol kheel nul-uq
ngal daq tsaol naol.
Neema eeq khi
ngaq bhai meel naq nail al gaq neq
ngaq bhai bhe nail gaq maq ngel ail.
Ngel lao-aol kheel nul-uq
aivq maq bhi moel dai
ngal tsaoq uvq nail ngaol.
13 Thail hai ngaol-aoq, al gaq neq naol ngaol.
Ngaq-ai kheel tsaol-aq teevq gaq pevq khi
ngaq nail ganl nl tsaoq
ngaq-i mail heeq kivq nail aqtsaoq ngaol.
14 Nv-nvq gaq, teevq gaq khe-ai
goil nail lavqkhoel ge tsaoq pheel jaq khi
Miqyail nail ilkhaol bhai
tsaol-aq munl munl ma nee teevq gaq khe-ai
lai daiq-a nail ngaol.
15 Sil nail phaq neejiav jiav nail juq bhai
thaiq phuq dai, kev lee dei-eiq.
Sil nail milkhaoq bhai
aqyu juq aqdoevq bhi aol lai dei-eiq.
Khul khi mail dai ngal-aq
haqeiv nail phaq neq
aqyu juq doevq nail jaol nail
jaol duq gaoltsi bhai jiav nail ngaol.
16 Ngal neq, Miqyail bhai khul khi,
Heeqphaq Miqyail neq
ngaq bhai hevq kovq lavq-a nail ngaol.
17 Kivq hail, nq hao, n-gaol
ngal gul gul ail nioil-u phao
Heeqphaq Miqyail neq
ngaq nail aqthel bhai gaiq nail ngaol.
18 Tsaol-aq yaq mao dai
ngaq bhai genl dev lal khi ngaol-aoq
aivq neq, genl dev nail lavqkhoel nee
ngaq bhai aqmeeq-ai
bhi jel-ail lavq nail ngaol.
19 Iqmoeq-u nee uv thaiq nail Miqyail neq
ngaq nail aqthel gaiq khi
aqyu juq bhai bhi sunq ail nail ngaol.
Khul khi mail dai ngal-aq
aqyu juq neq
teevq thal-iq phal lal nail maq bhao ail.
Miqyail bhai iqsanl maq gee sil ail.
20 Ngaq nail aqtsaoq aqlil neq
yovqgavq nail aqtsaoq juq bhai genl dev khi
saljial jaq-ai thaq nail phaq bhai iqsanl
maq ivq dai, pevq ail-a nail ngaol.
21 Aivq nail moeqthaoq neq
aq nuq nuq dai ge khi ngaol-aoq
aivq nail neema lavqkhoel bhai neq
genl dev movq nail phaq aol nail ngaol.
Aivq nail daoq neq, aqtseel khe-ai
aq gavq gavq khi ngaol-aoq
thaoma khe-ai tav nail ngaol.
22 Naoq nail yalkav aqliq
Heeqphaq Miqyail bhai av bhiq yaoq.
Al hai av bhiq haq neq
aivq naoq bhai hel daiq phail lavq nail ngaol.
Aivq neq, tsaq nail daol nail tsaol-aq bhai
teevq thal-iq maq khaonq ha ail.
23 Miqyail-ol
haqeiv nail juq bhai neq
luq ail seil ail nail aqduq bhai
bhi aol ail yaoq.
Tsaol-aq bhai heivq nail juq khi mail
goiqbhaoq bhaoq nail juq neq
doevqyeel maq heel ail.
Thail hai ngaol-aoq, ngal neq
naoq bhai neema thaq tsaol nail ngaol.