Tsiq eeq 52
Heeqphaq Miqyail-i mail yalkhaq dal nail phaq khi mail aivq nail geeqlaoq eel jaol
1 Gaq kav nail gaq-ol
naol haqeiv nail phaq bhai
khul khi mail neema eeq nail-aiq.
Heeqphaq Miqyail-i mail
gaoq haq gaiq-a nail phaq neq,
khaq mao iqsanl ivq nail ngaol.
2 Goiq bhaoq bhaoq nail gaq-ol
naoq nail moevqlal neq,
tav dee dee nail thao ma
khe-ai tav khi
luq ail seil ail nail phaq bhai taivq-ail
saol-nvq nail ngaol.
3 Naol neq
aqmeeq phaq nee maq tsil
haqeiv nail phaq bhai neekhaol sil khi
aq tsaq phaq ge nail nee maq tsil
goiqbhaoq bhaoq nail phaq bhai
neekhaol sil nail ngaol.
4 Goiq bhaoq bhaoq nail gaq-ol naol neq
yu bhai khoeq lai nail daoq juq ge nail bhai
neekhaol sil nail ngaol.
5 Thail hai ngaol-aoq, Miqyail neq
maldil naoq bhai
nqmaq maqluv halyeel lav cov nail ngaol.
Aivq neq, naoq bhai ilkhaol nee he dov lavq khi
aqdoevq doevq nail tsaol-aq juq
jaol nail miltsaq niil heeq nee
oil ha lavq nail ngaol.
6 Aq-u phao, tsaq nail daol nail tsaol-aq juq
al bhai ya moel khi noeq-u maq dov dai
pevq ail-a nail ngaol.
Aqyu juq neq
hel sil hel sil ail niail hai ge nail ngaol:
7 "Miqyail bhai neema maq thaq tsaol nail
gaq kav nail al gaq bhai hel daiq yaoq.
Aivq neq, yovqgavq nail phul heel
ildaoq maoqgaiq bhai juq khi
haqeiv nail phaq nl nail
gaq kav lal-a nail ngaol" dai, ge nail ngaol.
8 Thail hai ngaol-aoq, ngal neq
Miqyail nail ilkhaol khe niul seq deel
saq loq aqbhaol khe-ai, dul nail ngaol.
Ngal neq
Miqyail-i mail gaoq haq goil gaiq-a nail phaq bhai
khaq mao iqsanl neema thaq tsaol nail ngaol.
9 Miqyail-ol, naol ngaq bhai
aqmeeq phaq nl lavq-a nail bhaq da nee
naoq bhai khaq mao iqsanl, tsiq eeq nail ngaol.
Al ovqtavq
naoq bhai saljial ivq nail
tsaol-aq juq nail sivtavq-ai
naoq nail aqmil aqmeeq ngel-i mail
naoq bhai noeq thunq nail ngaol.