Tsiq eeq 51
Oeqbal hal phaiq nail geeqlaoq hal daoq
1 Miqyail-ol, naoq-i mail
gaoq haq goil gaiq-a nail phaq bhai juq khi
ngaq bhai gaoq haq lavq yaoq.
Eeq dee dee nail, naoq-i mail
gaoq haq gaiq-a nia nail phaq bhai juq khi
ngaq nail oeqbal tsiq haol lavq yaoq.
2 Ngaq nail lavqkhoel bhai aol nail
laiq nail tsa nail phaq iqsanl bhai
tsiq haol lavq khi
oeqbal lavqkhoel nee ngaq bhai
bhi haol lal lavq yaoq.
3 Ngaq nail laiq nail tsa nail phaq bhai
ngal noeq heeq khi
ngal oeqbal aol naol dai
khaq mao iqsanl moel lal ail nial.
4 Ngal naoq bhai nl laiq gaq-ao nail ngaol.
Naoq bhai taivq-ail nl laiq-a nail ngaol.
Naoq nail sivtavq bhai ngal oeqbal nl-a nail ngaol.
Al heel ngel-i mail
naol ngaq bhai khaq nail neq tsaq nail ngaol.
Naol ngaq bhai yalkhaq dal nail iqsanl
tsaq nail daol nail ngaol.
5 Ngal neq, doevq lee-u nee mail
haqeiv nail tsaol-aq pevq nail ngaol.
Aq ma nail ovqmav lavqkhoel bhai
ceiv lai-u n-gaol nee, oeqbal aol nail ngaol.
6 Neema lavqkhoel bhai
maldil tsaq nail phaq bhai
naol oil movq nail ngaol.
Al heel ngel-i mail
ngaq nail neema lavqkhoel bhai kev dai
naoq nail neenoeq neekha bhi bhee lal yaoq.
7 Ngal haol lal dai
lunl aq naiq-i mail jiivq haol lavq yaoq.
Ngail nee maq tsil phul lal dai
ngaq bhai tsiq haol lavq yaoq.
8 Naoq-i mail haqeeq ngaoq khoi lavq-u khe-ai
bhi noeq haq lavq khi ngaol-aoq
lavqkhiq gaoq tsail nia lal dai
lavqkhiq tsail nail aqthel juq
ngaq bhai teevq pov gaoq bhi gaiqlaq yaoq.
9 Ngaq nail oeqbal bhai maq hel daiq dai
naoq nail maivphaoq tsiq phaol khi
laiq nail phaq iqsanl bhai oil ha lavq yaoq.
10 Miqyail-ol
ngaq bhai haol taiv deel
neema teevq heeq teivq bhoel lavq yaoq.
Naoq bhai saljial ivq nail neema
bhi aol lavq yaoq.
11 Naoq nail sivtavq nee
ngaq bhai thaq the ha lavq.
Naoq nail Meeq nail Haol nail Aqhaqlal iqsanl
ngaq-ai nee mail thaq oil ha lavq.
12 Naoq-i mail hevq kovq lavq-a nail phaq bhai
lavqkhiq gaoq bhi tsail lavq khi
naoq nail daoq bhai nal daiq nail neema
bhi aol lavq yaoq.
13 Al hai nl lavq haq neq
ngal oeqbal yaq juq bhai
naoq nail daoq cavq bhiq cov bhiq khi
aqyu juq naol jaol nail bha kovq lal nail ngaol.
14 Ngaq bhai hevq kovq nail gaq pevq nail Miqyail-ol
ngal tsaol-aq yaq bhai heivq-a nail oeqbal nee
bhi jel-ail lavq yaoq.
Al hai nl lavq haq neq
naoq-i mail tsaq nail daol nail phaq bhai
ngal lavqkhiq teevq tsail gul khi tsiq eeq nail ngaol.
15 Heeqphaq-ol
ngal naoq bhai tsiq eeq kivq dai
ngaq nail moeqthaoq phao lavq yaoq.
16 Ngal naoq bhai
laol bhiq sail bhiq khi ngaol-aoq
al phaq bhai naol lavqkhiq maq tsail ail.
Miqjaq bhai bavq poiv khi
laol bhiq nail phaq bhai
naol oil movq nail maq ngel ail.
17 Miqyail-ol
naoq-i mail oil movq nail laol bhiq nail phaq neq
nee nuq nee beiv aol nail neema ngaol.
Nee nuq nee beiv aol khi
oeqbal noeq pov nail neema bhai
naol maq khaonq ha ail.
18 Yeel ovq meenq bhai
gaoq haq khi tsao jao-ai bhiq yaoq.
Yeiqlulsaqlaiq meenq nail khainl
lav meeq bhiq yaoq.
19 Aq-u phao, naol neq
maldil tsaq nail laol bhiq nail phaq khi mail
miqjaq kheq poiv khi laol bhiq nail phaq bhai
neekhaol sil nail ngaol.
Niaoqnel laq sil juq bhai iqsanl
naoq nail laolduq kovtavq bhai
bavq dav khi laol nail ngaol.