Tsiq eeq 50
Tsaq nail daol nail uqhuq thaoq nail phaq
1 Bhaq aoq eeq nail
Heeqphaq Miqyail daoq ge khi
nlma dov khoeq nee daq-n khi
nlma gaq khoeq bha kev dai
miltsaq niil teevq heeq heeq lao ail
jaol nail tsaol-aq bhai khul-a nail ngaol.
2 Hel daiq meeq khi bhee loq nail
Yeiqlulsaqlaiq meenq nee mail
Miqyail nail aqbhaq bhaq dov lal-a nail ngaol.
3 Ngadao nail Miqyail
lee thail thaiq nail ngaol.
Aq tsiq tsu dai maq lee ail.
Bhaol dee dee nail miqjaq jai bhoil
aivq nail sivtavq bhai lee khi
nqjaiq lilmoel nail gaiqlaq bhai
aivq lee thail thaiq nail ngaol.
4 Aivq nail tsaol-aq juq-ai
aivq yalkhaq dal nail bhai
salkhil bhi pevq nail haqbhoil
nqtavq khi miltsaq bhai khul-a nail ngaol.
5 Aivq ge nail:
“Laol nail sail nail lavqkhoel
ngaq-ai nee mail
daoqma saljial jaq-ai thaq nail
ngaq bhai saljial ivq nail
ngaq nail tsaol-aq juq
ngal jaol nail bha hel lavq yaoq” dai
khul nail ngaol.
6 Miqyail tsaq nail daol nail ganl
nqtavq ge gaiq thail thaiq nail ngaol.
Miqyail aivq teevq gaq taivq-ail
yalkhaq dal nail gaq pevq nail ngaol.
7 Ngaq nail tsaol-aq juq-ol
ngal daoq ge nail bhai nal daiq yaoq.
Ilsaqleiqlav tsaol-aq juq-ol
naoq nail ganl ngal niail hai salkhil khanq naol.
Ngal neq, Miqyail pevq nail ngaol.
Nul juq nail Miqyail ngaol.
8 Nul juq ngaq bhai
laol nail sail nail phaq nl khi
miqjaq kheq poiv khi laol nail phaq
khaq mao iqsanl laol nail ngel-i mail
nul juq bhai oeqbal thaq nail maq ngel.
9 Thail hai ngaol-aoq, naoq nail
niaoqnel niaoq khu lavqkhoel bhai aol nail
niaoqnel ngal maq loq ail.
Naoq nail civqmeiv civ khu lavqkhoel bhai aol nail
civqmeiv ngal maq loq ail.
10 Haqtsoiq haqyal
doi dai jaol nail jaiqyaq juq khi
gaoqjaoq gaoq dul doi dai gav jaq nail
jaiqyaq juq iqsanl mail ngaq nail ngaol.
11 Gaoqjaoq khe keivq-avq juq iqsanl mail
ngal heeq kivq nail ngaol.
Dai khaoq bhai jaol nail jaiqyaq juq iqsanl
ngaq nail ngaol.
12 Ngal aoq moevqlal khi ngaol-aoq
nul juq bhai maq ge bhiq.
Khul khi mail dai ngal-aq neq
miltsaq teevq khaol khi al nail kovtavq bhai
khal jiav nail phaq iqsanl mail
ngaq nail ngaol.
13 Ngal niaoqnel haqjoil jaq nail laiq.
Civqmeiv nail aqsivq daol nail laiq.
14 Laol bhiq lal-u phao
Miqyail bhai tsiq eeq nail phaq
naoq nail laol bhiq nail phaq bhi pevq khi
nul juq-i mail saljial khal jaq-ai thaq nail khe-ai
eeq dee heel dee dee nail gaq bhai bivq yaoq.
15 Haq nail aoq nail phaq kev lee-u phao
ngaq bhai khul yaoq.
Ngal nul juq bhai hevq kovq bhiq khi
nul juq ngaq bhai ev nail ngaol.
16 Thail hai ngaol-aoq
Miqyail haqeiv nail tsaol-aq juq bhai
niail hai ge nail ngaol:
"Khul khi mail nul juq
ngaq nail ya tsao the nail phaq bhai
teevq yanq ngal-aq, teevq pov ya ge nail-aiq.
Khul khi mail ngaq nail daoqma saljial nail ganl
ya ge tsaoq pheel jaq nail-aiq.
17 Mal dil ge haq neq
nul juq ngaq-i mail
cavq bhiq cov bhiq nail phaq bhai bhe khi
ngaq nail daoq bhai khaonq ha nail ngaol.
18 Khoiq bhaoq khal thaoq phuq lee nail bhai
nul juq aqtsaoq tsaoq khi
yu nail khaqma nee bheeq nail leel nail juq bhai
nul juq neema tavq nail ngaol.
19 Nul juq nail moeqthaoq
haqeiv nail phaq teevq bhee aol khi
nul juq nail moevqlal iqsanl
goiqbhaoq bhaoq nail phaq
teevq bhee aol nail ngaol.
20 Yovqgavq nail aqivq jaqbheq bhai
daoq doil ge khi
yovqgavq nail mail nail
tsi tsi deel bhai iqsanl
khal ge movq ail ge nail ngaol.
21 Nul juq al hai ge ge ail jaol-u phao
ngal khul maq ge nail ngel-i mail
nul juq khe-ai, dul nail ngaol dai
noeq nail ngaol.
Thail hai ngaol-aoq
niil aq-il ngal nul juq bhai oeqbal thaq khi
nul juq nail laiq nail tsa nail phaq bhai
bhaq laoq kheq dai
nul juq nail sivtavq bhai bhi dov lal nail ngaol.
22 Miqyail bhai noil peivq-a nail tsaol-aq juq-ol
saol-nvq pov yaoq.
Maq ngel haq neq
ngaq-i mail lav cov bhiq nail phaq bhai
nul juq ya daq khi
hevq kovq bhiq nail gaq maq jaol dai
ya haq nail ngaol.
23 Ngaq bhai tsiq eeq nail phaq neq
maldil ngaq bhai ev nail
laol bhiq nail phaq pevq nail ngaol.
Yovqgavq nail gailkhaol bhai
hel daiq phail nail gaq neq
ngaq-i mail bivq-a nail hevq kovq nail phaq bhai
ya moel nail ngaol" dai,
ge bhiq-a nail ngaol.