Tsiq eeq 49
Phul heel ildaoq maoqgaiq bhai neema thaq tsaol nail phaq neq, aq laiq ngaol
1 Tsaol-aq yaq juq iqsanl mail
ganl niil bhai nal daiq yaoq.
Miltsaq yaq juq iqsanl mail
naq khaol tsivq khail yaoq.
2 Eeq yaq nil yaq maq tsel pav dai
hulmeeq yaq tsiq maq tsel pav dai
iqsanl nal daiq yaoq.
3 Khul khi mail dai ngal-aq neq
ngaq nail moeqthaoq
neenoeq neekha aol nail daoq ge khi
ngaq nail neema lavqkhoel bhai aol nail phaq
nul juq bhai saol bhiq nail ngaol.
4 Joiq maoq juq-i mail
daoq daq daq khal leevq-a nail bhai
ngal saol-nvq khi
dil-nvq deeq deeq ail
daoq ceevq oil dov nail ngaol.
5 Haq eiv nail aqn kev lee khi ngaol-aoq
ngal maq gee sil.
Ngaq bhai jaol jaoq lal nail
neejiav jiav nail juq bhai iqsanl
ngal maq gee sil.
6 Nee jiav jiav nail al juq neq
yovqgavq nail phul heel
ildaoq maoqgaiq bhai juq khi
yovqgavq-i mail
hulmeeq meeq nail phaq bhai
khaoqsail he nail ngaol.
7 Thail hai ngaol-aoq
tsaol-aq yaq neq, teevq gaq iqsanl
yovqgavq bhai yovqgavq sil nail milkhaoq nee
maq hevq kovq nia ail.
Yovqgavq nail doevqyeel nail aqphoiq
Miqyail bhai maq khaoq ceiv nia ail.
8 Khul khi mail dai ngal-aq
tsaol-aq yaq nail doevqyeel neq
aqphoiq kav dee dee nail ngel-i mail
maq ul ceiv tsaol ail.
9 Khal hai khi
nqmaq maqluv halyeel ya doevq dai, jaol heeq.
Khal hai khi
sil nail milkhaoq bhai maq ya aol ail dai, jaol heeq.
10 Nee noeq nee kha aol nail juq maqkhaiq
yaq jaoq khaq lal miq thoi juq khi
neenoeq neekha maq aol nail juq maqkhaiq
sil nail phaq nee maq tsaoq jel kivq ail dai
yaoq gaq yaoq-ao nee moel nia nail ngaol.
Aqyu juq nail phul heel
ildaoq maoqgaiq iqsanl mail
yu nail haqbhoil pevq ail nail ngaol.
11 Sil nail milkhaoq neq
aqyu juq nail
nqmaq maqluv halyeel ilkhaol ngaol.
Jaol duq al bhai
aqyu juq khaq mao gail, ya jaol nail naol.
Thail hai ngaol-aoq, aqyu juq nail aqmil
miltsaq bhai aqmil dov lal nail ngaol dai
noeq nail ngaol.
12 Tsaol-aq yaq nail
seiqleiq khaoqsail neq
maq ivq ail.
Luq ail seil ail nia nail
jaiqyaq khe-ai, dul nail ngaol.
13 Yovqgavq bhai yovqgavq neema eeq nail juq khi
aqyu juq nail daoq bhai neekhaol sil nail juq nail
haoqnao nao saq neq, niail hai ngaol;
14 Aqyu juq neq, yaol juq khe-ai
ya sil nail ngaol.
Sil nail phaq neq
aqyu juq nail yaol lovq nail gaq khe-ai
pevq nail ngaol.
Aqyu juq nail aqmaol neq
yovqgavq nail ilkhaol il ma nee pavq ail khi
maq maoq lal mail
sil nail milkhaoq bhai ya buvq ya tsel ail nail ngaol.
Nqbhaq bhaq lal-u phao
aq see aqdaol daol nail tsaol-aq juq
aqyu juq bhai uv thaiq nail ngaol.
15 Thail hai ngaol-aoq, Miqyail neq
ngaq bhai ul kovq lavq nail ngaol.
Sil nail milkhaoq nee iqsanl
ngaq bhai hevq kovq lavq nail ngaol.
16 Tsaol-aq yaq juq
hulmeeq meeq lal khi
phul heel ildaoq maoqgaiq mao lal-u phao
naol khaoq thaq laol.
17 Khul khi mail dai ngal-aq neq
aqyu juq sil-u phao
phul heel ildaoq maoqgaiq al juq
oil khi maq lai nia ail.
Phul heel ildaoq maoqgaiq al juq nee
teevq gaq khe-ai
luqdaol bhai maq aol ail nia ail.
18 Aqyu juq neq
yovqgavq nail doevqyeel bhai
yovqgavq neekhaol sil khi
aqyu juq-i mail pevq lai-a nail phaq bhai
yu tsiq eeq nia nail ngaol.
19 Thail hai ngaol-aoq, aqyu juq neq
sil jel-a nail aqyu juq nail aqphiq aqbhal
jaol nail jaol duq bhai ya ail nail ngaol.
Khaq mao iqsanl
aqyu juq aqbhaq bhai maq ya moel yaoq-aol.
20 Tsaol-aq teevq gaq
kha dai eeq khi ngaol-aoq
neenoeq neekha maq aol haq neq
luq ail seil ail nia nail
jaiqyaq khe-ai, dul nail ngaol.