Tsiq eeq 48
Miqyail nail Yeel ovq gaoqjaoq
1 Heeqphaq Miqyail neq
eeq dee heel dee dee khi
tsiq eeq geel-nvq nail ngaol.
Aivq neq
aivq nail meeq nail haol nail
gaoqjaoq kovtavq bhai jiav nail
aivq nail meenq bhai jaol nail ngaol.
2 Miqyail nail Yeel-ovq gaoqjaoq al neq
daqmoe bha jiav khi
hel daiq meeq dee dee nail ngaol.
Al ovqtavq
eeq nail Heeqphaq nail meenq pevq khi
milkhaoq iqsanl nail kovtavq bhai
lavqkhiq tsail nail phaq bhi kev lee nail ngaol.
3 Meenq lavqkhoel bhai ivq dao dai jiav nail
genl dev nail ilkhaol daqmoe bhai neq
gee sil nail phaq maq jiav dai
genl dev yaq khe-ai
Miqyail hel daiq phail nail ngaol.
4 Milkhaoq khe heeqphaq juq
teevq gaq khe-ai jil lai khi
Yeel ovq gaoqjaoq bhai
genl dev nail dai, lal-a nail ngaol.
5 Thail hai ngaol-aoq
aqyu juq Yeel ovq gaoqjaoq bhai ya moel-u phao
noeq-u maq dov nail lavqkhoel
gee sil khi tsaoq-a nail ngaol.
6 Yaq bhao nail dai
lainq-ai thaq nail yaqmai-aq khe-ai
aqyu juq haq aoq ya nl nail ngaol.
7 Daq sil meenq khe laovq laovq ma bhai
lav cov-a nail nlma dov khoeq phao khe lilmoel khe-ai
Miqyail aqyu juq bhai lav cov-a nail ngaol.
8 Ngadao ya gaiq daiq-a nail khe-ai
niil aq-il nqtavq kovtavq khe
genl dev nail munl munl ma nail kovtavq bhai
bhaqaoq eeq nail
Heeqphaq Miqyail nail meenq bhai
ya moel-a nail ngaol.
Meenq al meenq neq, Miqyail nail pevq khi
aivq nqmaq maqluv halyeel
hel daiq phail nail ngaol.
9 Miqyail-ol, naoq nail
uqhuq thaoq nail ilkhaol il ma lavqkhoel
naoq-i mail gaoq haq goil gaiq-a nail phaq bhai
nv juq saol-nvq pov nail ngaol.
10 Miqyail-ol, naoq nail
aqmil seiqleiq khaoqsail eeq nail khe-ai
naoq bhai nq jail mil jail bha kev dai
tsiq eeq nail ngaol.
Naoq nail lavqmal lavq neq
tsaq nail daol nail phaq bhee nail ngaol.
11 Yeel ovq gaoqjaoq bha jaol nail juq
lavqkhiq tsail dei-eiq.
Naol daol coev dai yalkhaq dal nail ngel-i mail
Yuldav milkhaoq nail meenq juq lavqkhoel bhai
lavqkhiq tsail nail phaq bhee dei-eiq.
12 Yeiqlulsaqlaiq meenq tsao jaoq khi
ilkhaol daqmoe juq bhai ge daiq yaoq.
13 Meenq nail khainl juq bhai tsao doi khi
ivq dao dai cov-ai thaq nail
genl dev nail ilkhaol daqmoe juq bhai
hel daiq duq yaoq.
Al hai hel daiq haq neq
yaqhao khe doevq lee nail
nul juq nail aqjievq lilheel juq bhai
ge bhiq kivq nail ngaol.
14 “Al gaq neq, Miqyail ngaol.
Nq maq maq luv hal yeel
ngadao nail Miqyail pevq nail ngaol.
Aivq ngadao bhai khaq mao iqsanl,
hevq daiq phail lavq naol” dai
cavq bhiq cov bhiq ail ceevq yaoq.