Tsiq eeq 45
Heeqphaq khaqma hevq-u phao, gul bhiq nail daoqsel
1 Heeqphaq nail haqbhoil
ngal daoqsel niil bul-nvq oil dov-u phao
nal daiq meeq nail daoq juq
ngaq nail neema lavqkhoel bhai
bhee nail ngaol.
Haoq gavq gevq nia dee dee nail gaq nail
haoqgavq dailkheq khe-ai
ngaq nail moevqlal bhai
daoqsel il dol leevq nail ngaol.
2 Yaqyov-aq iqsanl nail lavqkhoel
naol yu nee maq tsil
aqmaol tsaq lai khi meeq nail ngaol.
Naol nal daiq meeq nail daoq ge nia dee dee khi
Miqyail naoq bhai khaq mao iqsanl
geeqlaoq bivq nail ngaol.
3 Bhaq aoq eeq nail gaq-ol
naoq nail thaoma pavq khi
uv thaiq nail bhaqaoq khi
seiqleiq khaoqsail bhai doi yaoq.
4 Seiq leiq khaoqsail eeq nail lavqkhoel
moeqphaq bhai jeeq lai khi
genl dev gaq-u phao kev dai, jeeq yaoq.
Mal dil tsaq nail phaq
neema nee nuq nee beiv aol nail phaq khi mail
tsaq nail daol nail phaq
maq bhi peivq ail nail haqbhoil
naoq nail lavqmal lavq nail gaq-i mail
eeq nail genl dev gaq dei-eiq.
5 Naoq nail tav dee dee nail heeqnav
naoq bhai genl dev nail juq nail neema bhai
bhi bev cov dei-eiq.
Yu nail jeq-e jaq-a juq
naoq nail aqkhil daoqthaoq bhai
bhi gaq tsuq ail dei-eiq.
6 Miqyail-ol
naoq-i mail bhi uv thaiq nail doiqbev bev ma
nqmaq maqluv halyeel ivq nail ngaol.
Tsaq nail daol nail lavqkhoel
naoq nail tsaol-aq juq bhai
naol uv thaiq nail ngaol.
7 Heeqphaq-ol
naol tsaq nail daol nail phaq bhai gaiq-a khi
haqeiv nail phaq bhai bhe nail ngaol.
Al heel ngel-i mail
naoq nail Miqyail naoq nail kovtavq bhai
lavqkhiq bhi tsail nail aqtseel hoel dav lavq khi
naoq nail aqtsaoq juq nee maq tsil
naoq bhai thaq eeq lavq-a nail ngaol.
8 Mullaq, aq jaoq khi mail
aqbhaol bavkov aq thail aqheel-i mail
lav sav-a nail huqbhiq nil nail aqtseel
naoq nail aqgaq aqdoi iqsanl nail kovtavq bhai
huqbhiq nil nail ngaol.
Yav mav nail aqjeel-i mail
lav meeq-ai thaq nail
naoq nail ilkhaol lavqkhoel-ai
naoq bhai lavqkhiq bhi tsail lal nail
dil-nvq deeq nail juq
naoq nail sivtavq bhai deeq nail ngaol.
9 Naoq nail haol lavqkhoel bhai jaol nail
tsiq phoiq tsiq laoq-ai thaq nail
yaqmai-aq juq nail lavqkhoel
yu nail milkhaoq khe heeqphaq nail yaqmiq juq
iqsanl aol nail ngaol.
Naoq nail khaqma gaq neq
naoq nail doiqbev lavqmal phao
thul phaol-nvq thaq khi
Aol phil milkhaoq khe heel nail yalkav
goe-nq thaq nail ngaol.
10 Heeqphaq nail miq sivq-ol
ngal ge nail bhai nal daiq dei-eiq.
Naoq nail jeq-e jaq-a khi
aqivq jaqbheq juq bhai
nioil peivq gil dei-eiq.
11 Khul khi mail dai ngal-aq neq
naol aqmaol meeq nail ngel-i mail
heeqphaq naoq bhai movq nail ngaol.
Aivq naoq nail heeqphaq pevq nail ngel-i mail
aivq bhai ev yaoq.
12 Dulluv milkhaoq bhai jaol nail tsaol-aq juq
naoq bhai kovpavq oil ha lal khi
hulmeeq juq naoq bhai maivphaoq ya dai
lai jai nail ngaol.
13 Heeqphaq-ol, naoq nail miq sivq neq
aivq nail sunq bhai jaol nail ngaol.
Aivq kha dai meeq nail bhai hel daiq dei-eiq.
Aivq nail phailkhaoq heel ma
heel-i mail yavq-ai thaq nail ngaol.
14 Guvq meeq-ai thaq nail
phailkhaoq heel ma aivq doi-nq thaq khi
aivq nail haoqnao tsao the jaol nail
yaqmai-aq yaqnoil juq nee teevq gaq khe-ai
naoq nail sivtavq bhai bhi hel aivq nail ngaol.
15 Lavq khiq tsail dee dee nail lavqkhoel
aqyu juq bhi hel lavq khi
naoq nail haol bhai aol lai-a nail ngaol.
16 Naoq nail aqbhal juq
doiqbev bhai jaol deel-a nail khe-ai
naoq nail yaqyov juq
heeqphaq jiovq dal laivq nail ngaol.
Naol aqyu juq bhai
milkhaoq juq nail kovtavq bhai
bhi uv thaiq nail ngaol.
17 Ngaq nail daoqsel niil bhaq da nee,
naol teevq yeel nee teevq yeel aqmil dov khi
tsaol-aq iqsanl mail
nqmaq maqluv halyeel
naoq bhai tsiq eeq nail ngaol.