Tsiq eeq 44
Hel daiq phail lavq yaoq dai, hal nail geeqlaoq hal daoq
1 Miqyail-ol, aq-u khe yeel bhai
naoq-i mail nl-a nail eeq nail ganl juq
aqphiq aqbhal juq ge lavq-a nail bhai
nv juq ya gaiq-a nail ngaol.
2 Yu nail jeq-e jaq-a juq bhai
naoq nail aqlavq-i mail the ha khi
nv juq nail aqphiq aqbhal juq bhai
jaol duq bivq-a nail ngaol.
Jeq-e jaq-a al juq bhai naol khoeq bhiq khi
nv juq nail aqphiq aqbhal juq bhai
bhi bhao bhi ya lee-a nail ngaol.
3 Aq phiq aqbhal al juq thaoma bavq khi
milkhaoq dev ya-a nail maq ngel ail.
Aqyu juq nail aqlavq-i mail
gaq lai-a nail iqsanl, maq ngel ail.
Naol aqyu juq bhai gaiq-a nail ngel-i mail
naoq nail maivphaoq khe aqbhaq khi mail
naoq nail bhaqaoq eeq nail lavqmal lavq bhai juq khi
bhi gaq lai-a nail phaq pevq nail ngaol.
4 Miqyail-ol
naol ngaq nail Heeqphaq khi
ngaq nail Miqyail pevq nail ngaol.
Yaqkov nail jeq-e jaq-a juq bhai
gaq lai nail phaq, naol bivq-a nail ngaol.
5 Naoq bhai juq nail lavqkhoel
neejiav jiav nail juq bhai nv juq the kovq gai aivq khi
naoq nail aqmil bhai juq nail lavqkhoel
genl dev lal nail juq bhai naoq thaiq nail ngaol.
6 Ngaq nail heeqnav bhai ngal neema maq eeq.
Ngaq nail thaoma ngaq bhai maq bhi jel-ail nia ail.
7 Thail hai ngaol-aoq
nv juq bhai neejiav jiav nail juq nail
aqlavq lavqkhoel nee hevq kovq lavq khi
nv juq bhai bhe nail juq nail seiqleiq khaoqsail
bhi peivq ail-a nail neq, naol teevq-eel ngaol.
8 Nv juq naoq bhai
khaq mao iqsanl neema eeq khi
naoq nail aqmil bhai
nqmaq maqluv halyeel tsiq eeq nail ngaol.
9 Thail hai ngaol-aoq, niil aq-il
naol nv juq bhai khaonq ha khi
bhi haq sil lavq-a nail ngaol.
Genl dev nail munl munl ma
khul jil khi dov ail-u phao iqsanl
naol nv juq nee mail maq jaol ail.
10 Nee jiav jiav nail juq nail sivtavq-ai
naol nv juq bhai bhi tsaoq pav gil khi
nv juq nail ildaoq maoqgaiq
aqyu juq-i mail bhi oil gil-a nail ngaol.
11 Yaol deeq heivq jaq nail khe-ai
nv juq bhai bhi deeq heivq lavq khi
yu nail jeq-e jaq-a nail milkhaoq doi dai
the ha lavq-a nail ngaol.
12 Maq phoiq maq laoq nail nlmaoq juq
aq yal nee gaoq ha nail khe-ai
naol naoq nail tsaol-aq bhai
gaoq ha-a nail ngaol.
13 Yu-i mail bhi meel naq nail dai khi
naol nv juq bhai nl lavq-a nail ngaol.
Aq jail bhai jaol nail juq iqsanl
hel sil hel sil ail
nv juq bhai khal ge movq ail ge nail ngaol.
14 Yu nail jeq-e jaq-a ceivq leivq kha lal dai
naol nv juq bhai nl lavq-a nail ngaol.
Tsaol-aq iqsanl mail nv juq bhai
meel naq meel naq ail uqhuq jiivq nail ngaol.
15-16 Ngaq bhai oeqbal thaq khi
khal ge movq-ai ge nail juq nail
daoq bhaq da nee maqkhaiq
neejiav jiav nail juq ngaq bhai
nl kovq movq-ai bhiq nail
bhaq da nee maqkhaiq
teevq n n lao ail ngal haq sil khi
maivphaoq tsiq uvq-a nail ngaol.
17 Nv juq naoq bhai maq khaonq ha dai
daoqma saljial bhai iqsanl
maq nl bheeq khi ngaol-aoq
niail hai ya daq thail thaiq nail ngaol.
18 Nv juq nail neema maq noeq phal-a-al.
Naoq nail gailkhaol bhai laiq ail dai
aqkhil phaq khao khao laiq-a nail iqsanl maq jiav.
19 Thail hai ngaol-aoq
naol nv juq bhai kheeq siv nail gaiq laq-ai
bhi haq lavq khi
sil nail aq haiq bhi uv thaiq lavq-a nail ngaol.
20 Nv juq nail Miqyail nail aqmil bhai nioil peivq khi
yu nail miqyail juq bhai
geeqlaoq hal-a nail jiav lao haq neq
21 Miqyail maldil maq heeq nia ail, jaol naol laiq.
Khul khi mail dai ngal-aq neq
tsaol-aq yaq-i mail
oil uvq-ai thaq nail nee noeq juq iqsanl bhai
aivq heeq gil moel gil nia nail ngaol.
22 Thail hai ngaol-aoq, naol bhaq da nee
nv juq bhai heivq thail thaiq nail ngaol.
Bhi deeq heivq jaq-a nail yaol khe-ai
nv juq bhai bhi deeq heivq-a nail ngaol.
23 Heeqphaq Miqyail-ol, thul yaoq.
Khul khi mail
naol iq thaiq thail thaiq nail-aiq.
Thul lal yaoq.
Nq maq maq luv hal yeel gil dai
nv juq bhai thaq khaonq ha lavq.
24 Miqyail-ol, khul khi mail
nv juq bhai naoq nail maivphaoq
tsiq uvq lavq nail-aiq.
Khul khi mail
nv juq haq nail aoq nail bhai
maq hel daiq lavq nail-aiq.
25 Nv juq khaqlail bhai bhi naoq thaiq khi
nv juq nail aqmaol miltsaq bhai
ga thail thaiq nail ngaol.
26 Thul lal khi nv juq bhai tsao jao-ai lee yaoq.
Naoq-i mail gaoq haq goil gaiq-a nail phaq-i mail
nv juq bhai ul kovq lavq yaoq.