Tsiq eeq 42
Tsiq eeq nail haoqgavq nvq pav teevq pav: 42-72
Yu nail milkhaoq bhai bhi nieivq aivq-a nail tsaol-aq teevq gaq nail geeqlaoq hal daoq
1 Coevq jieiv tev deel laoljaol bhai
ceiv neekhaol jiav nail khe-ai
ngaq nail aqhaqlal ngaq nail Miqyail bhai
khaq mao iqsanl neekhaol jiav nail ngaol.
2 Ulcuvq moevq nail khe-ai
aqdoevq doevq nail Miqyail bhai
ngaq nail aqhaqlal moevq nail ngaol.
Naoq nail sivtavq bhai
ngal khaq mao lal kivq nail-aiq.
3 Yu ngal jaol nail bha lee khi
“Naoq nail Miqyail khaq bha jaol nail-aiq” dai
maq ceiv lai dai, nal daiq lal-u phao
maivbhil neq, nqkiv n-gaol
ngaq nail aqjal pevq nail ngaol.
4 Miqyail nail uqhuq thaoq nail ilkhaol bhai
tsaol-aq munl munl maq hevq khi lai-u phao
lavqkhiq tsail khi gul nail lavqkhoel
Miqyail bhai tsiq eeq nail ganl al juq
noeq moel lal-u phao
ngaq nail neema tsaoq pav ail-il.
5 Ngaq nail nee ma-ol, khul khi mail
gaq bhaq nail-aiq.
Khul khi mail suq saq nail-aiq.
Miqyail bhai noeq thunq yaoq.
Ngaq bhai hevq kovq nail gaq
pevq nail Miqyail bhai
gaoq tsiq eeq nail ngaol.
6 Ngaq nail neema
gaq bhaq dee dee nail ngaol.
Aq-u phao, ngal Yaoldaq laoljaol
Heiq laq moq gaoqjaoq khi mail
Mil saq gaoqjaoq aqduq al juq nee
Miqyail bhai noeq moel nail ngaol.
7 Naoq nail ulcuvq eel teiv meel nail aqthel
aqnavq navq nail jaol duq nee mail
gul thail thaiq nail ngaol.
Naoq nail eel khaol juq iqsanl mail
ngaq nail kovtavq bhai
uv thaiq-ai thaq nail ngaol.
8 N gaol phao, Heeqphaq Miqyail
aivq-i mail gaoq haq goil gaiq-a nail phaq
bivq lavq-a nail ngaol.
Nqkiv phao, ngal aivq nail daoqsel gul khi
aqdoevq bhi doevq lavq-a nail Miqyail bhai
geeqlaoq hal nail ngaol.
9 Ngaq nail lovphail pevq nail Miqyail bhai
ngal niail hai ge bhiq nail ngaol:
“Khul khi mail ngaq bhai nioil peivq nail-aiq.
Khul khi mail noeq haq nail lavqkhoel
ya tsaoq nail-aiq.
Nee jiav jiav nail juq-i mail
khoeq lavq jiovq lavq nail bhai
khul khi mail ngal ya daq nail-aiq” dai
ge bhiq-a nail ngaol.
10 N gaol nqkivq kivq dai
neejiav jiav nail juq
meel naq meel naq ail ge nail:
"Naoq nail Miqyail
khaq bha jaol nail-aiq."
Aqyu juq-i mail meel naq nail al
haqeeq haq lao bha kev dai khoeq lal-il.
11 Ngaq nail nee ma-ol
khul khi mail, gaq bhaq nail-aiq.
Khul khi mail suq saq nail-aiq.
Miqyail bhai noeq thunq yaoq.
Ngaq bhai hevq kovq nail gaq
pevq nail Miqyail bhai
gaoq tsiq eeq nail ngaol.