Tsiq eeq 41
Nal nail tsaol-aq nail geeqlaoq hal daoq
1 Haq yaq aoq yaq juq bhai
tsao jao-ai bhiq nail juq neq
geeqlaoq eeq nail ngaol.
Haq nail aqn kev lee-u phao
Heeqphaq Miqyail
aqyu juq bhai bhi jel-ail nail ngaol.
2 Heeqphaq Miqyail
aqyu juq bhai uv thaiq khi
hel daiq phail bhiq nail ngaol.
Milkhaoq niil khaoq nail lavqkhoel bhai
aqdoevq doevq-u phao
yu aqyu juq bhai
geeqlaoq eeq nail tsaol-aq ngaol dai
khul nail ngaol.
Al ovqtavq, Heeqphaq Miqyail
neejiav jiav nail juq nail
aqlavq lavqkhoel bhai maq av bhiq ail.
3 Iq thaiq duq kovtavq bhai
nal khi ga thail thaiq-u phao
Heeqphaq Miqyail aqyu juq bhai
hel daiq phail bhiq khi jaol hal
gaoq bhi dov lal nail ngaol.
4 "Heeqphaq Miqyail-ol
ngal naoq bhai nl laiq-a nail ngaol.
Ngaq bhai gaoq haq gaiq-a khi
nalgoel bhi meeq lai lavq yaoq" dai
ngal hal-a nail ngaol.
5 Nee jiav jiav nail juq
ngaq nail ganl maq meeq nail phaq
niail hai ge nail ngaol:
"Tsaol-aq niil gaq khaq mao sil ail meeq.
Aivq nail aqmil khaq mao peivq ail meeq" dai
ge nail ngaol.
6 Ngal jaol nail bha khal lal nail tsaol-aq
neema teevq peivq ail maq daol ail.
Aqyu juq ngaq nail ganl
maq meeq nail phaq hal pov jil khi
yaoq dao yaoq-ao nee ge bhiq ail-a nail ngaol.
7 Ngaq bhai khal bhe nail tsaol-aq juq iqsanl mail
aq tsi tsu dai ge khoiq ge khoiq ail
ngaq bhai noeq doil dee dee nail ngaol.
8 Aqyu juq niail hai ge nail ngaol:
"Tsaol-aq niil gaq, sil nail nalgoel nal nail ngaol.
Yaq hao teevq pov iqjial nee mail
maq thul lal nia yaoq-aol" dai, ge nail ngaol.
9 Ngaq-ai nee mail
jaq tavq daol tavq-a nail
goil dee dee nail aqtsaoq teevq gaq iqsanl
ngaq bhai genl dev lal nail ngaol.
10 Thail hai ngaol-aoq, Heeqphaq Miqyail-ol
ngaq bhai gaoq haq gaiq-a lavq khi
aqyu juq bhai nl kovq kivq dai
ngaq bhai jaol hal bhi dov lal lavq yaoq.
11 Nee jiav jiav nail juq
maq gaq lai-a nail ngel-i mail
naol ngaq bhai neekhaol sil nail ngaol dai
ngal heeq kivq nail ngaol.
12 Ngal oeqbal thaq duq maq jiav nail ngel-i mail
naol ngaq bhai tsao jao-ai lee khi
nqmaq maqluv halyeel
ngaq bhai naoq nail sivtavq-ai
bhi jaol nail ngaol.
13 Ilsaqleiqlav nail Heeqphaq Miqyail bhai
nqmaq maqluv halyeel gil dai
tsiq eeq tsiq heel yaoq. Aq miq. Aq miq.