Tsiq eeq 40
Tsiq eeq nail daoqsel
1 Heeqphaq Miqyail tsao jao-ai lee nail bhai
ngal ol ol ail, daonq-a nail ngaol.
Aivq ngaq bhai hel daiq tsaoq lee khi
ngaq-i mail nioil nail aqthel
ya gaiq-a nail ngaol.
2 Lav cov nail khaq duq khi
cavq noevq nail lavqkhoel nee
aivq ngaq bhai he dov lavq-a nail nee ovqtavq
lovmav nail kovtavq bhai
tsiq dav lavq khi, ivq dao dai
bhi thul phaol lavq-a nail ngaol.
3 Ngadao nail Miqyail bhai
tsiq eeq nail daoqsel aqsivq
aivq ngaq bhai saol lavq-a nail ngaol.
Tsaol-aq mao dai gaq al bhai ya moel-u phao
noeq-u maq dov dai, gee sil lal bhiq khi
Heeqphaq Miqyail bhai
neema thaq tsaol lal nail ngaol.
4 Miqyail yaoq juq yaoq nail
aqjail bhai maq jaol dai
maq ngel nail miqyail juq bhai
uqhuq maq thaoq mail
Heeqphaq Miqyail bhai taivq-ail
neema thaq tsaol nail juq neq
geeqlaoq eeq nail ngaol.
5 Heeqphaq Miqyail-ol, ngaq nail Miqyail-ol
naol nv juq nail haqbhoil
noeq-u maq dov nail phaq khi
maolkhoel khoel nail mee nia phaq
nl lavq-a nail ngaol.
Naoq-ai khe-ai dul nail gaq maq jaol ail.
Naoq-i mail nl lavq-a nail ganl al juq
moeqthaoq nee mail maq ge gil tsaol-il.
6 Laol nail sail nail phaq bhai
naol maq oil movq ail.
Miqjaq kheq poiv khi laol nail phaq maqkhaiq
oeqbal tsiq haol nail laol nail phaq maqkhaiq
naol oil movq nail phaq maq ngel ail.
Thail hai ngaol-aoq
nal daiq oil nia nail naq khaol
ngaq bhai bivq lavq-a nail ngaol.
7 Al heel ngel-i mail, ngal niail hai ge nail ngaol:
"Hel daiq dei-eiq. Ngal lal-a nail ngaol.
Ngaq nail ganl haoqgavq pavqyov nail
lavqkhoel bhai gevq-ai thaq nail ngaol" dai
ge bhiq-a nail ngaol.
8 Ngaq nail Miqyail-ol
naol neema tsaq dai
ngal nl movq nail neema aol naol.
Naoq nail aolthaq kovqthaq
ngaq nail neema lavqkhoel bhai
gevq-ai thaq nail ngaol.
9 Naoq nail tsaol-aq juq jil lai nail bhai
ngal naoq nail tsaq nail daol nail
geeqlaoq daoq cavq bhiq nail ngaol.
Heeqphaq Miqyail-ol
ngaq nail moeqthaoq
maq keivq cuvq-ai thaq nail bhai
naol heeq gil moel gil thail thaiq nail ngaol.
10 Naoq nail tsaq nail daol nail phaq
neema lavqkhoel bhai maq oil uvq thaq dai
naol saljial ivq nail phaq khi mail
naoq-i mail hevq kovq nail phaq bhai
ngal ge daiq bhiq nail ngaol.
Naoq-i mail gaoq haq goil gaiq-a nail phaq khi mail
saljial ivq nail phaq
naoq nail tsaol-aq juq jil lai-a nail sivtavq bhai
ngaq-i mail oil uvq-ai thaq nail maq jiav.
11 Heeqphaq Miqyail-ol
naol gaoq haq gaiq-a nail phaq
ngaq nail sivtavq bhai thaq doeq khaiq lavq.
Naoq-i mail gaoq haq goil gaiq-a nail phaq khi
saljial ivq nail phaq-i mail
ngaq bhai khaq mao iqsanl
hel daiq phail lavq yaoq.
Tsao jao-ai lavq yaoq dai, hal nail geeqlaoq hal daoq
12 Maq ge gil tsaol nail haq nail aoq nail juq
ngaq bhai jaol jaoq gil-ai thaq nail ngaol.
Ngaq nail oeqbal-i mail uv thaiq-ai thaq khi
maivneev maq hel daiq moel kivq-aoq nial.
Uqhuq tsailkheel nee maq tsil oeqbal mao khi
neema gaq bhaq dee dee ail nial.
13 Heeqphaq Miqyail-ol, hevq kovq lavq yaoq.
Heeqphaq Miqyail-ol
lavqtsail mail tsao jao-ai lavq yaoq.
14 Ngaq bhai heivq movq nail juq
ya haq sil khi ya suq saq dei-eiq.
Ngaq bhai bhi cov ail movq nail juq neq
seiqleiq khaoqsail maq jiav dai
ya kovq ail dei-eiq.
15 Ngaq bhai meel naq lal nail juq neq
seiqleiq khaoqsail maq jiav nail bhaq da nee
ya haq sil khi bhi kovq ail dei-eiq.
16 Thail hai ngaol-aoq
naoq bhai hal pov nail juq
lavqkhiq tsail dee dee dei-eiq.
Naoq nail hevq kovq nail phaq bhai gaiq-a nail juq
"Heeqphaq Miqyail eeq nail ngaol" dai
maq ceiv lai dai, gul dei-eiq.
17 Ngal neq
maq jiav lovq nail nee ovqtavq, haq ail nial.
Heeqphaq Miqyail-ol
ngal jaol nail bha lavqtsail mail lee yaoq.
Naol neq, ngaq bhai hevq kovq nail gaq khi
tsao jao-ai lavq nail gaq pevq nail ngaol.
Ngaq nail Miqyail-ol, lavqtsail mail lee kha yaoq.