Tsiq eeq 39
Haq aoq nl nail gaq yovqgavq nail oeqbal ge dov nail ganl
1 Ngal yovqgavq bhai yovqgavq
niail hai ge-a nail ngaol:
“Moevq lal oeqbal maq ya nl dai
yaol phaol nail lavqkhoel aqdoevq doevq naol.
Haq eiv nail juq jaol thail thaiq nail sivtavq bhai
daoq maq ge dai jeeq naol” dai ge-a nail ngaol.
2 Al heel ngel-i mail
ngal teevq daoq iqsanl maq ge dai
hee tsul dai jaol-a nail ngaol.
Aqmeeq phaq iqsanl maq ge dai jaol-a nail ngaol.
Thail hai ngaol-aoq
ngaq nail haq aoq gaoq mao jaiq lal-a nail ngaol.
3 Ngaq nail neema iqsanl
laol dee dee lal-a nail ngaol.
Ngal gaoq saol-nvq-u phao, miqjaq khe-ai
gaoq laol dee dee lal-a nail ngaol.
Al heel ngel-i mail, ngal daoq gaoq ge-a nail ngaol.
4 Heeqphaq Miqyail-ol
ngaq nail yeel kha dai heel khi
ngaq nail aqn kha dai jiav nail-aiq.
Khaq mao gil lai nail-aiq dai, ge daiq lavq yaoq.
5 Naoq-i mail bhi doevq lavq-a nail aqyanq
aqlavq teevq daq bhee ail teevq-eel ngaol.
Ngaq nail yeel naoq nail sivtavq bhai
teevq peivq ail, ge maol maq tsaol ail.
Ivq naol dai, noeq nail juq khi
tsaol-aq yaq juq-i mail doevq nail aqyanq neq
aqhaq gaol kha nail ee dai teevq-eel ngaol.
6 Khal nl nail phaq aqnieivq ail pevq khi
a phao nia phao tsaoq khi ngaol-aoq
khul nail ganl maq tsoiq ail.
Phul heel hal pov jil-ai thaq khi ngaol-aoq
khaq sil gaq bhai ovq ail meeq.
7 Heeqphaq Miqyail-ol
ngal khul bhai noeq thunq nail phaq jiav nail-aiq.
Naoq bhai noeq thunq ail teevq-eel ngaol.
8 Ngaq nail oeqbal iqsanl nail lavqkhoel nee
hevq kovq lavq yaoq.
Yaq jaoq khaq lal miq thoi juq jil lai khi
meel naq lal nail bhai thaq bhi daq lavq.
9 Ngaq-i mail haq aoq nl nail niil neq
naoq-i mail nl lavq-a nail ngel-i mail
daoq maq ge dai, hee tsul dai jaol naol.
10 Naol ngaq bhai thaq gaoq khoeq lavq.
Naoq nail aqlavq-i mail
deeq lavq-a nail ngel-i mail
sil thao thaiq dai, nal lal-a nail ngaol.
11 Tsaol-aq teevq gaq oeqbal nl nail bhai
naol neema phail khi khoeq bhiq-u phao
aivq gaiq-a dee dee nail phaq bhai
bhoiq jaq peivq gil bhiq nail khe-ai dul nail ngaol.
Tsaol-aq yaq aqdoevq doevq nail neq
aqhaq gaol kha nail ee dai teevq-eel ngaol.
12 Heeqphaq Miqyail-ol
ngaq nail hal daoq bhai gaiq khi
gul nail aqthel bhai nal daiq lavq yaoq.
Ngaq nail maivbhil bhai
maq hel daiq tsaoq dai, thaq jaol lavq.
Ngaq nail aqphiq aqbhal juq khe-ai
ngal iqsanl daq-i teevq gaq pevq khi
teevq yanq lal yanq
gaq naq naq nail teevq-eel ngaol.
13 Teevq thal-iq maq kovq lal dai
ngal maq sil nail gaiq laq
lavqkhiq tsail nail teevq yanq ya dai
naol maq hel daiq tsaoq dai, bhi doevq lavq.