Tsiq eeq 35
"Nee jiav jiav nail juq nail kov-uvq nee bhi jel-ail lavq yaoq" dai, hal nail geeqlaoq hal daoq
1 Heeqphaq Miqyail-ol
ngaq bhai lav tsoiq nail juq bhai lav tsoiq khi
ngaq bhai genl dev nail juq bhai genl dev yaoq.
2 Genl dev nail doeq daq duq
khi mail thaoq daq duq
laiq ma laiq ya bavq khi, hevq kovq lee yaoq.
3 Naoq nail geeq khaoq khi cov dainl
he dov nail lavqkhoel nee
ngaq bhai the nail juq bhai jiq tsaoq yaoq.
“Ngal naoq bhai hevq kovq lee naol” dai
ngaq bhai ge lee yaoq.
4 Ngaq bhai heivq nail dai hal pov lee-a nail juq
genl dev nail sunq ail khi ya haq sil dei-eiq.
Ngaq bhai aqdoil nl lee-a nail juq
haoqnaol naol kovq kovq khi
a phao nia phao ail nail maq heeq nia dai
ya haq dei-eiq.
5 Lil moel-i mail gov koevq bhoe jal aivq nail khe-ai
aqyu juq bhai bhi bhoe jal-aivq dei-eiq.
Al ovqtavq, nqtavq gaqkhoel-i mail iqsanl
aqyu juq bhai bhi the dei-eiq.
6 Aqyu juq nail gailkhaol teevq daoq loi
nav tsee dai, bhi jiav khi
aq gavq bhi gavq dei-eiq.
Al ovqtavq, nqtavq gaqkhoel-i mail iqsanl
bhi the ha dei-eiq.
7 Khul khi mail dai ngal-aq neq
ngal khul maq ngel nail bhai
aqyu juq ngaq-ai bhi phee lai nail dai khi
maq moel nail bha, lavq phee khail-a nail ngaol.
Al ovqtavq, ngal bhi ga bhoel ail nail dai khi
aqyu juq khaq duq duq-ai thaq nail ngaol.
8 Thaiq phuq dai, aqyu juq bhai
luq ail seil ail nail phaq bhi kev lee dei-eiq.
Al ovqtavq, aqyu juq-i mail
khail-a nail lavq phee bhai
aqyu juq bhi ga bhoel ail khi
bhi luq bhi seil ail dei-eiq.
9 Al hai pevq lal haq neq
ngaq nail neema
Heeqphaq Miqyail nail lavqkhoel bhai
lavqkhiq tsail khi
aivq-i mail hevq kovq lavq-a nail bhai tsiq eeq naol.
10 Ngaq nail aqmaol lavqkhoel khe aol nail
haqeeq pul naovq-a nee
Heeqphaq Miqyail bhai niail hai ge nail ngaol:
"Heeqphaq Miqyail-ol
naoq-ai khe-ai dul nail
khaq sil gaq jaol nail-aiq.
Khul khi mail dai ngal-aq neq
gaq bhaq nail juq bhai
gaq kav nail juq nail kov-uvq nee
naol bhi jel-ail khi
haq yaq aoq yaq juq bhai
khoeq bhiq jiovq bhi nail juq nail kov-uvq nee iqsanl
naol bhi jel-ail nail ngaol" dai, ge bhiq-a nail ngaol.
11 Maq tsaq nail salkhil khanq nail
haqeiv juq lal khi
maq ngel nail bhai kev dai
doeq leivq lavq-a nail ngaol.
12 Ngal aqyu juq bhai
aqmeeq phaq nl bhiq khi ngaol-aoq
maq meeq nail phaq bivq kovq lavq-a nail ngaol.
Al heel ngel-i mail
ngaq bhai neema cov dee dee lal ail nial.
13 Thail hai ngaol-aoq
aqyu juq nal-u goel-u phao
ngal jinq daq iq doi khi maq jaq maq daol dai
gaol beiv khi, geeqlaoq hal-a nail ngaol.
14 Al ovqtavq
aqivq jaqbheq khi aqtsaoq juq sil-u phao
noeq haq nail khe-ai, ngal noeq haq khi
aqma sil khi nioil khaoq khaoq-a nail khe-ai
ngal nioil khaoq khaoq khi
gaol beiv nail lavqkhoel nee
aqyu juq nail haqbhoil nioil-a nail ngaol.
15 Thail hai ngaol-aoq
ngal phaq thiq thiq-u n-gaol
aqyu juq lavqkhiq tsail nail lavqkhoel
ngal jaol nail teevq jaol ga bhoil lee-a nail ngaol.
Al ovqtavq, ngal maq heeq kivq nail juq lee khi
maq naq lai dai
khal nl movq ail nl lavq-a nail ngaol.
16 Aqyu juq neema phail nail lavqkhoel
haoq gil keivq khi
ngaq bhai meel naq dee dee lal nail ngaol.
17 Heeqphaq Miqyail-ol, khaq mao kev dai
hel daiq hel daiq ail jaol nail-aiq.
Aqyu juq-i mail genl dev lal nail lavqkhoel nee
hevq dov lavq yaoq.
Al ovqtavq, al laq jaq sil niil juq nail
moeqthaoq nee mail
ngaq nail doevqyeel bhai hevq kovq lavq yaoq.
18 Al hai nl lavq haq neq
aqivq jaqbheq munl munl ma nail sivtavq-ai
ngal naoq bhai tsiq eeq khi
tsaol-aq munl munl ma nail gaol tsi-ai
naoq bhai tsiq eeq tsiq heel nail ngaol.
19 Khul maq ngel nail bhai
ngaq-ai neejiav jiav khi
goiqbhaoq bhaoq nail juq
ngal haq nail bhai lavqkhiq thaq bhi tsail.
Al ovqtavq, khul nail ganl maq jiav nail bhai
ngaq-ai bhe nail juq
maivneev maiv tav tav tav ail thaq bhi hel sil.
20 Aqyu juq neq, tsaq lai jil lai nail daoq maq ge ail.
Miltsaq kovtavq-ai
yu bhai maq thoiq maq tsi dai
jaol nail tsaol-aq juq bhai
goiqbhaoq bhaoq khi oeqbal thaq nail ngaol.
21 Aqyu juq moeqthaoq gaol pav khi
“Naol nl-a nail phaq moel gil-aoq naol” dai
ngaq bhai oeqbal hal pov lal nail ngaol.
22 Heeqphaq Miqyail-ol
aqyu juq-i mail nl lavq-a nail bhai
naol ya moel gil-a nail ngaol.
Aq tsi tsu dai, thaq jaol lavq.
Heeqphaq Miqyail-ol, eqyal bha thaq ail lavq.
23 Ngaq nail Heeqphaq Miqyail-ol
thul lal khi, ngaq nail haqbhoil
yalkhaq dal lavq yaoq.
Ngaq nail ganl bhai hel daiq phail lavq yaoq.
24 Ngaq nail Heeqphaq Miqyail-ol
naol tsaq nail daol nail khe-ai
ngaq bhai yalkhaq dal lavq yaoq.
Aqyu juq ngaq nail ganl bhai
lavqkhiq thaq bhi tsail.
25 "Nee khaol sil daiq ga ail" dai
neejiav jiav nail juq thaq bhi ge.
"Aivq bhai moevq bhoel-aoq nail ngaol" dai
ngaq bhai thaq bhi meel naq.
26 Ngal haq nail bhai
lavqkhiq tsail nail juq iqsanl mail
ya haq sil khi haq nail aoq nail bhai
ya thaoq phuq dei-eiq.
Ngaq bhai nl daiq nail al juq
haq sil nail phaq khi
seiqleiq khaoqsail maq jiav nail phaq
ya doi dei-eiq.
27 Ngaq-ai nee mail tsaq nail phao
jaol lavq-a nail gaq neq
lavqkhiq tsail khi gul dei-eiq.
"Heeqphaq Miqyail eeq dee dee nail ngaol.
Aivq nail yaqkav nee sal ya nail bhai
aivq neekhaol sil nail ngaol" dai
maq ceiv lai dai gul khi tsiq eeq dei-eiq.
28 Heeqphaq Miqyail-ol
ngaq nail moevqlal iqsanl
naol tsaq nail daol nail ganl bhai ge gaiq khi
naoq bhai teevq n n lao tsiq eeq dei-eiq.