Tsiq eeq 36
Tsaol-aq yaq nail haqeiv nail phaq khi Miqyail nail aqmeeq phaq
1 Haq eiv nail tsaol-aq nail neema lavqkhoel bhai
oeqbal daoq ge thail thaiq nail ngaol.
Miqyail bhai gee sil khi ev nail phaq
aqyu juq nail sivtavq bhai maq jiav ail.
2 Yovqgavq bhai yovqgavq
noeq eeq-ai thaq nail ngel-i mail
yovqgavq nail oeqbal bhai
maq moel nia nail nee ovqtavq
maq bhe nia ail.
3 Aivq nail moeqthaoq nee dov lee nail daoq neq
goiqbhaoq jalmul taivq-ail bhee khi
aqmeeq phaq nl nail
khaonq ha-a nail nee ovqtavq
neenoeq neekha iqsanl, maq aol ail.
4 Aivq iqjial lavqkhoel nee
yu bhai goiqbhaoq khal hai
bhaoq heeq dai, noeq khi
aivq nail aqmaol maq meeq nail phao
jaol nail nee ovqtavq
haqeiv nail phaq bhai maq khaonq ha ail.
5 Heeqphaq Miqyail-ol
naoq-i mail gaoq haq goil gaiq-a nail phaq neq
nqtavq kovtavq bha kev dai eeq khi heel khi
naoq nail saljial ivq nail phaq neq
nqtavq khe nqdil bha tuv nail ngaol.
6 Naoq nail tsaq nail daol nail phaq neq
gaoqjaoq khe-ai, moe dee dee khi
naoq-i mail yalkhaq dal nail phaq iqsanl
iqyaq iqma khe-ai, navq dee dee nail ngaol.
Heeqphaq Miqyail-ol
naol tsaol-aq juq khi mail jaiqyaq juq bhai
hel daiq phail thail thaiq nail ngaol.
7 Miqyail-ol
naoq-i mail gaoq haq goil gaiq-a nail phaq neq
kha dai phoiq nail laoq nail ngel-aiq.
Naoq nail aqdaol ivq govq bhai
tsaol-aq yaq juq tsaoq uvq duq jiav nail ngaol.
8 Bhao lee ya lee nail naoq nail ilkhaol bhai
aqyu juq jaq bov daol bov khi
naoq nail geeqlaoq laoljaol il nail bhai
aqyu juq ya keivq daol nail ngaol.
9 Naol neq, aqdoevq bhi doevq lal nail
ulcuvq laol bev pevq khi
naoq nail aqbhaq bhaq da nee
nv juq aqbhaq bhai moel kivq nail ngaol.
10 Naoq bhai heeq nia nail juq nail kovtavq bhai
naoq-i mail gaoq haq goil gaiq-a nail phaq
bhi ivq lavq yaoq.
Neema aqdaol juq nail kovtavq bhai iqsanl
naoq-i mail tsaq nail daol nail phaq
bhi ivq lavq yaoq.
11 Neema eeq nail juq nail aqkhil-i mail
ngaq bhai thaq bhi naoq thaiq lavq.
Haq eiv nail tsaol-aq nail aqlavq-i mail
ngaq bhai thaq bhi the ha lavq.
12 Hel daiq dei-eiq.
Haq eiv nail juq ga tsuq ail-a nail ngaol.
Aqyu juq maq thul lal tsaol dai
miltsaq bhai bhi doeq tsuq khi
ga thail thaiq nail ngaol.