Tsiq eeq 34
Jel ail-a nail gaq-i mail gul nail daoqsel
1 Ngal Heeqphaq Miqyail bhai
khaq mao iqsanl tsiq eeq nail ngaol.
Ngaq nail moeqthaoq iqsanl aivq bhai
maq ceiv lai dai, tsiq heel nail ngaol.
2 Ngaq nail neema eeq duq
Heeqphaq Miqyail bhai jiav nail ngaol.
Nee nuq nee beiv aol nail juq
al bhai ya gaiq khi lavqkhiq tsail dei-eiq.
3 Heeqphaq Miqyail nail
eeq dee dee nail phaq bhai
ngaq-ai nee mail teevq gaq khe-ai gul bhel.
Aivq nail aqmil bhai iqsanl
teevq gaq khe-ai, tsiq eeq bhel.
4 Heeqphaq Miqyail bhai ngal hal pov-u phao
aivq ngaq bhai ge kovq lavq khi
gee sil nail phaq iqsanl nail lavqkhoel nee
ngaq bhai hevq kovq lavq-a nail ngaol.
5 Aivq bhai hel daiq nail yaoq gaq yaoq-ao nee
maivphaoq haiq laiq bhoi dai
teevq thal-iq maq ya haq sil ail.
6 Haq yaq aoq yaq pevq nail
ngal khul nail aqthel bhai
Heeqphaq Miqyail nal daiq lavq khi
haq nail aoq nail iqsanl nail lavqkhoel nee
hevq kovq lavq-a nail ngaol.
7 Heeqphaq Miqyail bhai
ev nail juq nail teevq jaoq
nqtavq gaqkhoel lovq phail lee khi
gee sil nail phaq nail lavqkhoel nee
hevq kovq bhiq nail ngaol.
8 Heeqphaq Miqyail bhai tsao tsel daiq haq neq
aivq aqmeeq ngaol dai, ya heeq kivq nail ngaol.
aivq bhai juq nail juq neq
geeqlaoq eeq nail ngaol.
9 Heeqphaq Miqyail nail tsaol-aq juq-ol
aivq bhai gee sil khi ev yaoq.
Aivq bhai khal ev nail tsaol-aq juq
khal loq nail phaq bhee lovq nail ngaol.
10 Allaqjaqsil gaq gil khi
moevq nail bhai kev khi ngaol-aoq
Heeqphaq Miqyail bhai hal pov nail juq
aqmeeq teevq phaq ail, maq theq ail.
11 Yaq noil juq-ol, ngal jaol nail bha lal khi
ngaq nail daoq bhai nal daiq lal yaoq.
Heeqphaq Miqyail bhai gee sil khi ev nail phaq
ngal nul juq bhai saol lavq bhel.
12 Aq doevq doevq nail neekhaol sil khi
yeel bhao yeel ya nail lavqkhoel nee
lavqkhiq tsail nail phaq
ya movq nail khul gaq maqkhaiq
13 moevqlal aqdoil ge nail bhai yaol phaol khi
moeqthaoq iqsanl
goiqbhaoq bhaoq nail bhai yaol phaol yaoq.
14 Haq eiv nail phaq khaonq ha khi
aqmeeq phaq nl yaoq.
Tsaq lai jil lai dai, lai jai khi hal pov yaoq.
15 Heeqphaq Miqyail nail maivneev
aivq nail tsaol-aq juq bhai
hel daiq phail thail thaiq khi
aivq nail naq khaol
aqyu juq gul nail aqthel bhai iqsanl
nal daiq nail ngaol.
16 Thail hai ngaol-aoq
Heeqphaq Miqyail nail maivphaoq
haqeiv nail phaq nl nail tsaol-aq bhai
maq hel daiq tsaoq ail.
Aqyu juq sil-u phao
miltsaq niil heeq aqyu juq bhai
nioil peivq ceiv ceiv nail ngaol.
17 Heeqphaq Miqyail
aivq nail tsaol-aq juq gul nail aqthel bhai
nal daiq bhiq khi
haq aoq nl nail phaq iqsanl nee
hevq kovq bhiq nail ngaol.
18 Heeqphaq Miqyail neq
neema tsaoq pav-a nail juq nail aqjail bhai
jaol thail thaiq nail ngaol.
Noeq thunq nail phaq teevq peivq ail
maq jiav nail tsaol-aq juq bhai iqsanl
hevq kovq bhiq nail ngaol.
19 Heeqphaq Miqyail neq, aivq nail tsaol-aq juq
haq aoq kha dai mao khi ngaol-aoq
haq aoq iqsanl nee mail hevq kovq bhiq nail ngaol.
20 Haq eeq teevq khaoq iqsanl
maq bhi khoil ail dai
aivq teevq daoq loi hel daiq phail nail ngaol.
21 Thail hai ngaol-aoq, haqeiv nail juq neq
yovqgavq-i mail nl-a nail haqeiv nail phaq bhaq da nee,
ya sil nail ngaol.
Tsaol meeq tsaol haol juq bhai bhe nail juq iqsanl
khoeq bhiq jiovq bhiq nail phaq ya daq nail ngaol.
22 Heeqphaq Miqyail neq,
aivq nail yaqkav juq bhai ul kovq nail ngaol.
Aivq bhai juq nail tsaol-aq juq iqsanl
yalkhaq dal nail phaq bhai maq ya daq ail.