Tsiq eeq 33
Tsiq eeq nail daoqsel
1 Tsaq nail daol nail tsaol-aq juq-ol
Heeqphaq Miqyail nail lavqkhoel
lavqkhiq tsail yaoq.
Daol coev dai doevq nail tsaol-aq
aivq bhai tsiq eeq nail geel-nvq nail ngaol.
2 Dil-nvq deeq khi tsiq eeq bhiq yaoq.
Neeq tsaq tsel deeq covq nail dil-nvq deeq khi
aivq bhai daoqsel gul yaoq.
3 Aivq bhai daoqsel aqsivq gul bhiq yaoq.
Dil-nvq nal daiq meeq dai, deeq khi
lavqkhiq tsail nail lavqkhoel nee gul yaoq.
4 Heeqphaq Miqyail nail daoq neq
maldil tsaq nail ngaol.
Aivq-i mail khal nl nail phaq iqsanl mail
saljial ivq nail lavqkhoel nee
nl thaq-ai thaq nail ngaol.
5 Heeqphaq Miqyail neq
tsaq nail daol nail phaq bhai gaiq-a khi
aivq-i mail gaoq haq goil gaiq-a nail phaq
miltsaq bhai bhee nail ngaol.
6 Heeqphaq Miqyail daoq bivq khi,
nqtavq iqsanl bhai teivq-ai thaq nail ngaol.
Nl ma, bha la, aqgil, aivq nail aqhaq-i mail
bhi dov lal-a nail ngaol.
7 Aivq neq, mal cavq bhai
khal bhoel nail khe-ai
iqyaq iqma khe ulcuvq oil jil gil khi
aqnavq navq dee dee nail
iqyaq iqma nail ulcuvq juq iqsanl
ulcuvq thaq duq bhai oil jil-ai thaq nail ngaol.
8 Miltsaq yaq juq iqsanl mail
aivq bhai gee sil nail nee ovqtavq ev khi
miltsaq khe jaol nail
tsaol-aq yaq juq iqsanl mail neq
noeq-u maq dov dai
aivq nail sivtavq bhai jaol dei-eiq.
9 Khul khi mail dai ngal-aq neq
aivq-i mail khal ge nail khe-ai
pevq lal khi
daoq khal bivq nail phaq dov lal nail ngaol.
10 Heeqphaq Miqyail neq
yu nail jeq-e jaq-a-i mail
maoq bhaoq nl-a nail phaq bhai
aqnieivq ail lav pevq bhiq khi
tsaol-aq yaq juq-i mail
lainq-ai thaq nail ganl juq bhai
ganl maq tsoiq dai bhi pevq ail-a nail ngaol.
11 Heeqphaq Miqyail-i mail
maoq bhaoq nl nail phaq neq
nqmaq maqluv halyeel ivq khi
aivq-i mail saol-nvq nail phaq
teevq yeel nee teevq yeel ivq nail ngaol.
12 Heeqphaq Miqyail phao jaol nail jeq-e jaq-a neq
geeqlaoq eeq nail jeq-e jaq-a ngaol.
Aivq aqyu juq bhai tsel dov-ai thaq khi
aivq nail jaiq bhoil khe-ai bhi pevq nail ngaol.
13 Heeqphaq Miqyail nqtavq kovtavq nee
hel daiq kha-ai leevq khi
tsaol-aq yaq iqsanl bhai
moel gil thail thaiq nail ngaol.
14 Nqtavq kovtavq nee
uv thaiq nail doiqbev bev ma bhai jaol deel khi
miltsaq yaq bhai hel daiq thail thaiq nail ngaol.
15 Aivq aqyu juq nail neema iqsanl bhai
teivq-ai thaq khi
khal nl nail phaq iqsanl heeq gil nia nail ngaol.
16 Heeqphaq teevq gaq
genl dev yaq juq mao nail ngel-i mail
genl dev gaq nia nail maq ngel ail.
Aqyu juq gaq kav nail ngel-i mail
genl dev yaq juq gail
ya jel-ail nail maq ngel ail.
17 Genl dev nail moeqphaq bhai noeq thunq khi
aqyu juq gaq lai nia nail maq ngel ail.
Moeqphaq al juq gaq kav nail bhaq da nee
ya jel-ail nail iqsanl maq ngel ail.
18 Heeqphaq Miqyail nail maivneev neq
aivq bhai ev nail tsaol-aq khi mail
aivq-i mail gaoq haq goil gaiq-a nail phaq bhai
noeq thunq nail tsaol-aq bhai
hel daiq phail nail ngaol.
19 Sil nail lavqkhoel nee hevq kovq bhiq khi
moevq nail sivq nail phaq kev lee-u phao
maq bhi sil ail.
20 Nv juq neq
Heeqphaq Miqyail bhai noeq thunq nail ngaol.
Aivq neq, nv juq bhai
tsao jao-ai lavq nail gaq pevq khi
doeq daq duq pevq nail ngaol.
21 Aivq nail meeq nail haol nail aqmil bhai
ngadao neema thaq tsaol nail ngel-i mail
aivq nail lavqkhoel bhai
neema lavqkhiq tsail nail ngaol.
22 Heeqphaq Miqyail-ol
nv juq naoq bhai noeq thunq thail thaiq-u phao
naol gaoq haq gaiq-a nail phaq
nv juq nail kovtavq bhai bhi kev lee lavq dei-eiq.