Tsiq eeq 32
Oeqbal phaiq nail bhaq da nee lavqkhiq tsail nail daoqsel
1 Laiq nail tsa nail phaq oil ha bhiq khi
oeqbal phaiq bhiq-a nail juq neq
geeqlaoq eeq nail ngaol.
2 Heeqphaq Miqyail oeqbal maq thaq dai
neema lavqkhoel bhai
goiqbhaoq bhaoq nail phaq
maq aol nail juq neq
geeqlaoq eeq nail ngaol.
3 Ngal oeqbal maq ge dov-u phao
teevq n n lao nioil-a nail ngel-i mail
gaqdoil doil dee dee-a nail ngaol.
4 Nqkiv n-gaol maq ceiv lai dai
naol ngaq bhai khoeq lavq jiovq lavq khi
nl tsal leivq nail khe-ai
ngaq nail gaq iqsanl mail leivq gee gil-aoq nial.
5 A bhai nee ngal-aq
ngaq-i mail nl laiq-a nail phaq maq oil uvq dai
ngaq nail oeqbal ge dov-a nail ngaol.
"Oeqbal khal nl-a nail phaq iqsanl mail
Heeqphaq Miqyail bhai ge bhiq naol" dai
yovqgavq bhai yovqgavq ngal ge-u phao
naol oeqbal phaiq lavq-a nail ngaol.
6 Al heel ngel-i mail
naoq bhai hal pov moel kivq nail
aqyanq tsaq lal-u phao
naoq bhai saljial ivq nail tsaol-aq
yaoq gaq yaoq-ao nee
naoq bhai geeqlaoq hal dei-eiq.
Hal haq neq, eel jeq jeq nail phaq kev lee-u phao
aqyu juq bhai maq kev lee nia ail.
7 Naol neq, ngaq nail tsaoq uvq duq pevq nail ngaol.
Haq nail aoq nail bhai bhi jel-ail lavq khi
ngaq nail teevq jaoq gaq lai nail daoqsel
naol bhi gaiq nail ngaol.
8 Heeqphaq Miqyail ge nail:
"Ngal neq, naol ya ail nail gailkhaol bhai
cavq navq khi hevq daiq bhiq naol.
Naoq bhai neenoeq neekha bivq khi
ngaq nail maivneev naoq bhai
hel daiq phail bhiq naol.
9 Moeq keivq oil bhoel khi maq ngel nail neq
maq lee lavq dai, ya tsu gaq nail
khul maq gov heeq nia nail moeqphaq
khi mail moeqphaq laljieiv khe-ai
thaq pevq" dai, ge bhiq-a nail ngaol.
10 Haq eiv nail tsaol-aq
mee nia phaq nail haq aoq ya nl khi
Heeqphaq Miqyail bhai
neema thaq tsaol nail juq neq
gaoq haq goil gaiq-a nail phaq-i mail
bhi leel jaoq nail ngaol.
11 Tsaq nail daol nail tsaol-aq juq-ol
Heeqphaq Miqyail nail lavqkhoel bhai
lavqkhiq tsail dee dee yaoq.
Neema aqdaol daol nail tsaol-aq juq-ol
lavqkhiq tsail khi gul yaoq.