Tsiq eeq 31
Miqyail bhai juq nail geeqlaoq hal daoq
1 Heeqphaq Miqyail-ol
ngal naoq bhai juq nail ngaol.
Haq sil nail phaq nee khaq mao iqsanl
bhi jel-ail lavq yaoq.
Naol tsaq nail daol nail lavqkhoel nee
ngaq bhai bhi jel-ail lavq yaoq.
2 Ngaq nail hal daoq bhai nal daiq khi
lavqtsail mail hevq kovq lee lavq yaoq.
Ngaq nail tsaoq uvq duq lovphail khi mail
ivq dao deel tavq khe-ai
ngaq bhai hel daiq phail lavq yaoq.
3 Naol neq, ngaq nail lovphail khi mail
ivq dee dee nail tavq maldil pevq nail ngaol.
Naoq nail aqmil bhai juq khi
ngaq bhai hevq daiq khi
hel daiq phail lavq yaoq.
4 Ngal naoq bhai juq nail bhaq da nee
maq moel lal nail bhai ngaq nail haqbhoil
khail-ai thaq nail lavq phee nee
bhi jel-ail lavq yaoq.
5 Ngaq nail aqhaqlal
naoq nail aqlavq lavqkhoel bhai av bhiq naol.
Saljial ivq nail Heeqphaq Miqyail-ol
naol ngaq bhai ul kovq lavq-a nail ngaol.
6 Ngal neq, ganl maq tsoiq nail
thaoq phaoq aqma maolkhoel bhai
uqhuq thaoq nail juq bhai bhe khi
Heeqphaq Miqyail bhai neema thaq tsaol nail ngaol.
7 Ngal naoq-i mail gaoq haq goil gaiq-a nail phaq bhai
lavqkhiq tsail dee dee nail ngaol.
Naol neq, ngal ya daq nail phaq bhai moel khi
ngaq nail haq aoq nl nail phaq bhai
heeq nia nail ngaol.
8 Nee jiav jiav nail juq nail aqlavq lavqkhoel
maq bhi aol lai dai, hevq jel lavq khi
aqsal sal nail jaol duq bhai
bhi tsao lavq-a nail ngaol.
9 Heeqphaq Miqyail-ol
ngal haq aoq nl thail thaiq nail bhai
gaoq haq lavq yaoq.
Nioil-a nail maivneev gaon dee dee khi
neema aqmaol gaq juq dee dee ail nial.
10 Haq aoq nl nail phaq teevq yeel ya daq khi
noeq haq nail phaq iqsanl
yaoq kovq yaoq-ao nee, ya daq ail nial.
Oeqbal bhaq da nee gaq gil lee khi
haqeeq haq lao juq gail aq pheq pheq gil-aoq nial.
11 Nee jiav jiav nail juq ngaq bhai meel naq khi
ilkhaiq tavq nail juq iqsanl ngaq bhai
meel naq dee dee lal nail ngaol.
Ngaq nail aqtsaoq juq iqsanl
ngaq bhai gee sil lal bhiq-a nail ngaol.
Khal phuq khal moel lee nail tsaol-aq juq
aqjail bhai maq lee dai, tsaoq nail ngaol.
12 Sil-a nail juq bhai nioil peivq-a nail khe-ai
yaoq gaq yaoq-ao nee
ngaq bhai nioil peivq gil khi
iqlaoq aq pav ee dai iqsanl maq thaoq-il.
13 Aqyu juq mao dai ge khoiq thail thaiq nail
ngaq nail naq khaol bhai gaiq lee khi
gee sil nail phaq teevq jaoq lee thail thaiq ail nial.
Aqyu juq teevq dao bhai jil lai khi
ngaq bhai heivq nail dai
maoq bhaoq nl thail thaiq nail ngaol.
14 Thail hai ngaol-aoq, Heeqphaq Miqyail-ol
ngal neema thaq tsaol khi
"Naol ngaq nail Miqyail
pevq nail ngaol" dai, ge nail ngaol.
15 Ngaq nail aqn aqyanq iqsanl mail
naoq nail aqlavq lavqkhoel bhai jiav nail ngaol.
Nee jiav jiav nail aqlavq lavqkhoel nee maqkhaiq
khoeq lal jiovq lal nail juq nail
aqlavq lavqkhoel nee maqkhaiq
naol ngaq bhai hevq kovq lavq yaoq.
16 Naoq nail maivphaoq nail aqbhaq
ngaq bhai bhi moel lavq yaoq.
Naoq-i mail gaoq haq goil gaiq-a nail phaq-i mail
ngaq bhai hevq kovq lavq yaoq.
17 Heeqphaq Miqyail-ol
ngal naoq bhai khul nail ngel-i mail
haq sil nail phaq thaq bhi kev lee lavq.
Haq eiv nail tsaol-aq juq bhi haq sil khi
sil nail milkhaoq lavqkhoel bhai hee tsul dai
bhi peivq ail dei-eiq.
18 Neema eeq eeq ail, khaoqsail he khi
tsaq nail daol nail juq bhai ge doil nail
goiqbhaoq bhaoq nail moeq kov al juq,
daoq maq ge nia dai, bhi pevq ail dei-eiq.
19 Naoq bhai gee sil khi
ev nail juq nail kovtavq bhai
naoq-i mail bivq-a nail geeqlaoq juq
kha dai bhee nail ngel-aiq.
Miltsaq yaq juq nail sivtavq bhai,
naoq-ai juq nail tsaol-aq juq nail geeqlaoq neq,
kha dai eeq ngel-aiq.
20 Tsaol-aq yaq-i mail
lavq phee khail-ai thaq nail bhai ya jel-ail dai
aqyu juq bhai
naoq nail sivtavq nee lovq phail bhiq khi
daoq doil maq bhi daq nail haqbhoil
aqyu juq bhai naoq nail gaq naq yavq tsoel bhai,
lovq phail bhiq nail ngaol.
21 Heeqphaq Miqyail bhai tsiq eeq yaoq.
Khul khi mail dai ngal-aq neq
neejiav jiav nail juq ngaq nail meenq bhai
lovq jaoq lee-u phao
noeq-u maq dov heeq phaq-ail
aivq-i mail gaoq haq goil gaiq-a nail phaq
ngaq bhai bhi moel lavq-a nail ngaol.
22 "Heeqphaq Miqyail nail sivtavq nee
ngaq bhai the ha lavq-ao nail khul-il" dai
ngal gee sil nail lavqkhoel nee ge-a nail ngaol.
Thail hai ngaol-aoq
"Tsao jao-ai lavq yaoq" dai, gul-u phao
naol nal daiq lavq-a nail ngaol.
23 Heeqphaq Miqyail nail tsaol-aq juq-ol,
aivq bhai gaiq-a yaoq.
Saljial ivq nail tsaol-aq juq bhai
Heeqphaq Miqyail hel daiq phail bhiq khi
neema eeq nail tsaol-aq juq bhai
khoeq bhiq jiovq bhiq dee dee nail ngaol.
24 Heeqphaq Miqyail bhai
noeq thunq nail juq iqsanl mail
gaq oil khi, gee sil nail neema thaq aol dei-eiq.