Tsiq eeq 30
Geeq laoq eeq naol dai, tsiq eeq nail geeqlaoq hal daoq
1 Heeqphaq Miqyail-ol
ngal naoq bhai tsiq eeq tsiq heel naol.
Khul khi mail dai ngal-aq neq
naol ngaq bhai aqnavq nee he dov lavq khi
neejiav jiav nail juq ngaq bhai
gaq lai nail lavqkhoel
lavqkhiq maq bhi tsail nail dai
nl lavq-a nail ngaol.
2 Ngaq nail Heeqphaq Miqyail-ol
"Tsao jao-ai lavq yaoq" dai, ngal gul-u phao
naol ngaq nail nalgoel lav meeq lavq-a nail ngaol.
3 Heeqphaq Miqyail-ol
naol ngaq bhai sil nail phaq nee
hevq dov lavq khi
mao ail navq nail khaq duq bhai
ga bhoel ail-a nail juq nail lavqkhoel nee iqsanl
hevq dov lavq khi bhi doevq lavq nail ngaol.
4 Heeqphaq Miqyail bhai
saljial ivq nail tsaol-aq juq-ol
aivq bhai daoqsel gul khi tsiq eeq yaoq.
Aivq nail meeq nail haol nail aqmil bhai
geeqlaoq bivq yaoq.
5 Khul khi mail dai ngal-aq
Miqyail-i mail neema phail nail phaq neq
teevq yanq lal yanq taivq-ail ivq khi
aivq-i mail neema meeq nail phaq neq
maq sil teevq yeel ivq nail ngaol.
Nqkiv teevq kivq maivbhil ya il khi ngaol-aoq
nqbhaq bhaq lal-u phao
lavqkhiq tsail nail phaq lee nail ngaol.
6 Aq-u phao, ngal bhao lee ya lee nail lavqkhoel
"Teevq thal-iq haq lee nail maq bhao ail" dai
yovqgavq bhai yovqgavq ge tseq-a nail ngaol.
7 Heeqphaq Miqyail-ol
naol ngaq bhai gaoq haq gaiq-a khi
gaoqjaoq khe-ai ivq dao dai
bhi ivq lavq-a nail ngaol.
Thail hai ngaol-aoq
naoq nail maivphaoq tsiq uvq lavq-u phao
ngaq nail neema haq aoq nl dee dee lal ail nial.
8 Al heel ngel-i mail
ngal Heeqphaq Miqyail bhai gul khi
aivq bhai niail hai hal-a nail ngaol:
9 "Ngal sil khi luqdaol bhai kev ail haq neq
naoq bhai meeq lal duq jiav nail laiq.
Sil khi khaqlail pevq gil ail-a nail juq
naoq bhai gaoq tsiq eeq nia nail laiq.
Naol saljial ivq nail ganl bhai
khaqlail al juq ge nia nail laiq.
10 Heeqphaq Miqyail-ol
ngaq nail hal daoq bhai nal daiq khi
gaoq haq gaiq-a lavq yaoq.
Heeqphaq Miqyail-ol, tsao jao-ai lavq yaoq.
11 Ngal noeq haq noeq aoq nail phaq bhai
lavqkhiq tsail nail phaq pevq lal dai
naoq-i mail oil phal lavq-a nail ngaol.
Neema haq aoq nl nail phaq bhai he loev lavq khi
lavqkhiq tsail nail phaq
naoq-i mail bhi doi lavq-a nail ngaol.
12 Al heel ngel-i mail
ngal hee tsul dai maq jaol thaiq tsaol ail.
Naoq bhai gul khi tsiq eeq nail ngaol.
Ngaq nail Heeqphaq Miqyail-ol
nqmaq maqluv halyeel naoq bhai tsiq eeq naol.