Tsiq eeq 29
Nq jaiq lilmoel nail lavqkhoel nee gaiq lee-a nail Heeqphaq Miqyail nail aqthel
1 Nqtavq kovtavq bha khal jaol nail juq
Heeqphaq Miqyail bhai tsiq eeq yaoq.
Aivq neq, seiqleiq khaoqsail khi
bhaqaoq eeq nail ngel-i mail
aivq bhai tsiq eeq yaoq.
2 Heeqphaq Miqyail nail aqmil
seiqleiq khaoqsail eeq nail ngel-i mail
aivq bhai tsiq eeq yaoq.
Aivq nail meeq nail haol nail phaq
seiqleiq khaoqsail eeq nail ngel-i mail
aivq bhai uqhuq thaoq yaoq.
3 Ulcuvq miltsaq-ai
Heeqphaq Miqyail nail aqthel gaiq lee nail ngaol.
Seiq leiq khaoqsail eeq nail Miqyail
nqjaiq jaiq nail khe-ai meel nail ngaol.
Heeqphaq Miqyail nail aqthel
iqyaq iqma teevq bhee jiav nail ngaol.
4 Heeqphaq Miqyail nail aqthel neq
bhaqaoq eeq khi
eeq nail heel nail heeqphaq nail aqthel
pevq nail ngaol.
5 Heeqphaq Miqyail nail aqthel bhaq da nee
miqhuq aqbhaol khoi ail gil khi
aivq-i mail Leiq bhaq noq nail gaoqjaoq bhai
doevq nail miqhuq aqbhaol bha kev dai
bhi khoi ail gil-a nail ngaol.
6 Leiq bhaq noq nail gaoqjaoq bhai
niaoqnel niaoq yaq tev nail khe-ai bhi tev khi
Heiq laq moq gaoqjaoq bhai neq
neivq niaoq tev nail khe-ai, bhi tev nail ngaol.
7 Heeqphaq Miqyail nail aqthel al
nqjaiq tsaoq teivq teivq nail khe-ai
aqbhaq bhaq nail ngaol.
8 Heeqphaq Miqyail nail aqthel-i mail
haqtsoiq haqyal juq bhi dao lal khi
aivq-i mail Khaq deiq sal haqtsoiq haqyal iqsanl
bhi dao lal nail ngaol.
9 Heeqphaq Miqyail nail aqthel al
aqbhaol bhaol ma juq bhi dao lal khi
haqtsoiq juq aqpavq bhi ga ail gil nail ngaol.
Aivq nail uqhuq thaoq nail
ilkhaol lavqkhoel bhai
"Seiq leiq khaoqsail eeq dei-eiq" dai
tsaol-aq iqsanl mail gul nail ngaol.
10 Eeq dee dee nail ulcuvq kovtavq bhai
Heeqphaq Miqyail neq
aivq nail doiqbev bev ma bhai
jaol deel khi uv thaiq nail ngaol.
Heeqphaq Miqyail nqmaq maqluv halyeel
heeqphaq pevq khi uv thaiq nail ngaol.
11 Heeqphaq Miqyail neq
aivq nail tsaol-aq juq bhai gaq bivq khi
nee sal ovq nail geeqlaoq
aqyu juq bhai bivq nail ngaol.