Tsiq eeq 28
Tsao jao-ai lavq yaoq dai, hal nail geeqlaoq hal daoq
1 Heeqphaq Miqyail-ol
ngal naoq bhai khul nail ngaol.
Ngaq nail lovphail-ol
maq nal daiq dai, thaq khaonq ha lavq.
Ngal khul nail bhai maq nal daiq lavq haq neq
sil nail khaq duq bhai ga bhoel khi
ya haq thail thaiq nail tsaol-aq nee mail
ngal ya haq nail aqduq bhao nail ngaol.
2 "Tsao jao-ai lavq yaoq" dai, ngal gul khi
naoq nail meeq dee haol dee dee nail jaol duq phao
aqlavq gaoq dil-u
ngaq nail hal daoq bhai nal daiq lavq yaoq.
3 Daoq meeq ge khi ngaol-aoq
neema nee govq bhao khi
maq tsaq maq daol nail phaq nl nail
haqeiv nail juq nee mail teevq gaq khe-ai
naol ngaq bhai thaq hel-aivq lavq.
4 Naol aqyu juq nail neema lavqkhoel bhai
haqeiv nail phaq aol khi, nl-a nail ngel-i mail
geel-nvq nail khe-ai, khoeq bhiq yaoq.
Aqyu juq nail aqlavq-i mail nl-a nail khe-ai
geel-nvq dai, nl kovq bhiq yaoq.
Aqyu juq bhai geel-nvq dai, nl kovq bhiq yaoq.
5 Heeqphaq Miqyail-i mail
nl-a nail ganl bhai maqkhaiq
aivq nail aqlavq-i mail
teivq-a nail juq bhai maqkhaiq
aqyu juq maq saol-nvq nail ngel-i mail
aivq aqyu juq bhai lav cov gil bhiq khi
khaq mao gail maq thul lal nia dai
dal bhiq nail ngaol.
6 Heeqphaq Miqyail bhai tsiq eeq yaoq.
Khul khi mail dai ngal-aq
“Tsao jao-ai lee yaoq” dai, ngal gul nail bhai,
aivq nal daiq lavq-a nail ngaol.
7 Heeqphaq Miqyail neq
ngaq nail haqbhoil gaq khi mail
doeq daq duq pevq khi
ngal aivq bhai neema thaq tsaol nail ngaol.
Aivq-i mail tsao jao-ai lavq khi
ngaq nail neema lavqkhiq tsail nail ngaol.
Al ovqtavq, ngal lavqkhiq tsail nail daoqsel gul khi
aivq bhai tsiq eeq nail ngaol.
8 Heeqphaq Miqyail neq
aivq nail tsaol-aq juq nail haqbhoil
gaq pevq nail ngaol.
Aivq-i mail aqtseel hoel dav khi tsel dov-ai thaq nail
heeqphaq nail haqbhoil
hevq kovq nail tsaoq uvq duq pevq nail ngaol.
9 Heeqphaq Miqyail-ol
naoq nail tsaol-aq juq bhai hevq kovq bhiq khi
geeqlaoq bivq dei-eiq.
Yaol bhai lovq nail khe-ai
nqmaq maqluv halyeel
aqyu juq bhai lovq bhiq dei-eiq.