Tsiq eeq 25
Hel daiq phail lavq yaoq dai, hal nail geeqlaoq hal daoq
1 Heeqphaq Miqyail-ol
ngaq nail neema naoq bhai bivq naol.
2 Ngaq nail Miqyail-ol
ngal naoq bhai neema thaq tsaol nail ngaol.
Ngaq bhai thaq bhi haq sil lavq.
Nee jiav jiav nail juq
ngaq bhai thaq bhi gaq lal lavq.
3 Naoq bhai noeq thunq thail thaiq nail juq
haq sil nail bhai naol maq bhi kev ail.
Thail hai ngaol-aoq
khul nail ganl maq jiav mail
saljial pheeq nail juq bhai
bhi haq sil ail dei-eiq.
4 Heeqphaq Miqyail-ol
naoq nail gailkhaol ngal heeq kivq dai
cavq naq lavq yaoq.
Naoq nail gailkhaol bhai cavq lavq cov lavq yaoq.
5 Naoq nail maldil tsaq nail lavqkhoel bhai
ngaq-ai hevq daiq lavq khi cavq lavq cov lavq yaoq.
Khul khi mail dai ngal-aq, naol neq
ngaq bhai hevq kovq lavq nail Miqyail ngaol.
Ngal naoq bhai khaq mao iqsanl
noeq thunq nail ngaol.
6 Heeqphaq Miqyail-ol
aq-u nee mail bhi jiav thaq nail
naoq-i mail gaoq haq goil gaiq-a nail phaq khi mail
naoq nail ivq nail gaiq-a nail phaq bhai
noeq kev lavq yaoq.
7 Heeqphaq Miqyail-ol
ngaq-i mail yaqyov-aq yaqnoil ail jiav-u phao
nl jel-ail ceevq-a nail laiq nail tsa nail phaq bhai
thaq noeq thaq lavq.
Naoq nail meeq nail phaq khi mail
gaoq haq goil gaiq-a nail lavqkhoel
ngaq bhai maq nioil peivq dai
noeq kev lavq yaoq.
8 Heeqphaq Miqyail neq
meeq nail tsaq nail daol nail ngel-i mail
oeqbal yaq juq ya tsao nail gailkhaol bhai
cavq naq bhiq nail ngaol.
9 Nee nuq nee beiv aol nail juq bhai
tsaq nail gailkhaol bhai hel aivq bhiq khi
aivq neema tsaq nail phaq bhai
cavq naq bhiq nail ngaol.
10 Miqyail nail daoqma saljial khi
aivq nail ya tsao the nail phaq bhai
tsao the nail juq-ai
Miqyail neq, aivq-i mail
gaoq haq goil gaiq-a nail phaq nee maqkhaiq
aivq nail saljial ivq nail phaq nee maqkhaiq
gailkhaol hevq daiq bhiq nail ngaol.
11 Heeqphaq Miqyail-ol
naoq nail aqmil bhai juq khi
ngaq nail oeqbal phaiq lavq yaoq.
Ngaq nail oeqbal mao dee liq dee dee ail nial.
12 Heeqphaq Miqyail bhai gee sil khi ev nail juq
ya tsel nail gailkhaol teevq khaol
aivq cavq naq bhiq nail ngaol.
13 Aqyu juq bhao dee ya dee dee lee khi
aqyu juq nee mail
yavq kha lee thaq nail yaq juq iqsanl
milkhaoq jaiq bhoil ovq nail ngaol.
14 Heeqphaq Miqyail bhai gee sil khi ev nail juq neq
aivq nail aqtsaoq pevq khi
aivq nail daoqma saljial bhai bhi heeq nia nail ngaol.
15 Ngaq nail maivneev Heeqphaq Miqyail bhai
khaq mao iqsanl, hel daiq cov-ai thaq nail ngaol.
Lavq phee bhai phee lai-a nail ngaq nail aqkhil
aivq cev pheel lee nail ngaol.
16 Heeqphaq Miqyail-ol
tsiq phaol-aivq leevq khi
ngaq bhai gaoq haq gaiq-a lavq yaoq.
Aq tsaoq maq bhao dai
haq aoq nl thail thaiq nail ngaol.
17 Ngaq-i mail haq aoq nl nail
yaoq phaq yaoq-ao nee bhai
nee sal bhi ya lavq khi
ngaq-i mail haq nail aoq nail phaq nee
hevq kovq lavq yaoq.
18 Ngaq-i mail ya daq-a nail
haq nail aoq nail phaq khi mail
haq aoq nl nail phaq bhai hel daiq lee lavq khi
oeqbal iqsanl mail phaiq lavq yaoq.
19 Ngaq bhai neejiav jiav nail juq
kha dai jaol nail bhai hel daiq lavq yaoq.
Aqyu juq ngaq bhai
kha dai bhe lavq-a nail bhai iqsanl
heeq kivq lavq yaoq.
20 Ngaq nail doevqyeel bhai
hel daiq phail lavq khi
hevq kovq lavq yaoq.
Ngal naoq bhai juq nail ngel-i mail
thaq bhi haq sil lavq.
21 Ngal naoq bhai noeq thunq nail ngel-i mail
oeqbal maq aol nail phaq khi
tsaq nail daol nail phaq-i mail
ngaq bhai hel daiq phail lavq yaoq.
22 Miqyail-ol
haq nail aoq nail iqsanl nail lavqkhoel nee
Ilsaqleiqlav tsaol-aq juq bhai
ul kovq bhiq yaoq.