Tsiq eeq 26
Tsaol meeq tsaol jaq nail geeqlaoq hal daoq
1 Heeqphaq Miqyail-ol
ngal tsaq nail daol nail phaq nl khi
naoq bhai neema thaq tsaol nail phaq
ivq nail ngel-i mail
oeqbal maq aol ail dai, dal ceiv lavq yaoq.
2 Heeqphaq Miqyail-ol
ngal tsaq nail maq tsaq nail salkhil
hal pov duq khi laonq daiq lavq yaoq.
Ngaq nail neema khi nee noeq nee dul bhai
hal pov tsel duq yaoq.
3 Naoq-i mail gaoq haq goil gaiq-a nail phaq
ngaq nail maivneev sivtavq bhai jiav khi
naoq bhai saljial ivq nail lavqkhoel
ngal doevq nail jaol nail ngaol.
4 Ganl maq tsoiq nail tsaol-aq bhai
ngal aqtsaoq maq tsaoq tavq dai doevq khi
goiqbhaoq bhaoq nail tsaol-aq juq nee mail
maoq bhaoq maq nl dai, doevq nail ngaol.
5 Laiq nail tsa nail phaq nl nail juq bhai ngal bhe khi
Haq eiv nail juq nee mail ngal maq jaol deel.
6 Heeqphaq Miqyail-ol
ngal oeqbal maq aol nail ganl dov lal dai
aqlavq tsiq haol-a nail nee ovqtavq
naoq nail laolduq teevq jaoq tsao tsao ail
7 ngal geeqlaoq eeq nail daoqsel gul khi
noeq-u maq dov nail
naoq-i mail nl-ai thaq nail ganl juq bhai
ge gaiq bhiq nail ngaol.
8 Heeqphaq Miqyail-ol
naoq nail seiqleiq khaoqsail jiav nail
naol jaol nail ilkhaol bhai
ngal gaiq-a nail ngaol.
9 Oeqbal yaq juq nee mail
ngaq bhai thaq lav cov lavq.
Tsaol-aq bhai heivq nail
tsaol-aq juq nee mail iqsanl
teevq gaq khe-ai, ngaq bhai thaq bhi daq lavq.
10 Aqyu juq neq, haqeiv nail phaq nl dee dee khi
maq tsaq maq daol nail lavqkhoel nee
bivq nail phaq bhai oil dee dee nail ngaol.
11 Thail hai ngaol-aoq, ngal neq
oeqbal maq aol dai doevq nail ngel-i mail
ngaq bhai gaoq haq gaiq-a khi ul kovq lavq yaoq.
12 Ngaq nail aqkhil neq
aq di di deel jaol duq bhai ya thul phaol khi
aqivq jaqbheq munl munl ma nail gaoltsi bhai iqsanl
ngal thul phaol khi
Heeqphaq Miqyail bhai tsiq eeq nail ngaol.