Tsiq eeq 12
Haq eiv nail tsaol-aq neema eeq nail ganl
1 Heeqphaq Miqyail-ol, hevq kovq lee yaoq.
Tsaq nail daol nail tsaol-aq
maq jaol-aoq thaq-il.
Tsaol-aq yaq nail gaiqlaq bhai
saljial ivq nail phaq iqsanl
maq jiav-aoq thaq-il.
2 Teevq gaq nee teevq gaq
goiqbhaoq bhaoq jaq khi
al jaiq-ail nal daiq meeq nail daoq
ge khi ngaol-aoq
neema nvq phaq noeq nail
lavqkhoel nee ge nail ngaol.
3 Aqyu juq nail al jaiq-ail
nal daiq meeq nail daoq
ge nail moeqthaoq khi mail
khaoqsail he nail moevqlal bhai
Heeqphaq Miqyail oev ha dei-eiq.
4 Aqyu juq ge nail:
"Nv juq nail moevqlal neq
nv juq bhai bhi gaq lai lavq khi
nv juq nail moeqthaoq iqsanl
nv juq nail haqbhoil genl dev nail ngaol.
Khaq sil gaq nv juq bhai
uv thaiq lal nia nail-aiq" dai, ge nail ngaol.
5 Thail hai ngaol-aoq
Heeqphaq Miqyail ge nail:
"Haq nail aoq nail juq bhi khoeq bhi jiovq khi
maq jiav lovq nail juq nioil thail thaiq nail ngel-i mail,
niil aq-il ngal yavq kha lee naol.
Aqyu juq-i mail noeq thunq nail khe-ai
ngal aqyu juq bhai
hevq kovq bhiq naol" dai, ge nail ngaol.
6 Heeqphaq Miqyail nail daoq juq neq
miqjaq-i mail sivq pov bhee dai
poiv haol-ai thaq nail phul khe-ai
haol nail daoq juq pevq nail ngaol.
7 Heeqphaq Miqyail-ol, naol neq
nv juq bhai hel daiq phail lavq nail gaq ngaol.
Yeel niil yeel nail lavqkhoel nv juq bhai
hel daiq tsoiq lavq nail ngaol.
8 Haq eiv nail tsaol-aq
yaoq dao yaoq-ao nee mail bhee khi
tsaol-aq yaq nail gaiqlaq bhai
haq sil heeq phaq-ail
khal nl movq ail nl nail phaq bhai thaq eeq nail ngaol.