Tsiq eeq 10
Tsiq eeq 9 nee mail cavq nail
1 Heeqphaq Miqyail-ol
khul khi mail eqyal bha jaol lavq nail-aiq.
Nv juq haq aoq-u phao
khul khi mail tsaoq uvq lavq nail-aiq.
2 Haq eiv nail tsaol-aq juq neema eeq khi
haq yaq aoq yaq juq bhai
khoeq bhiq jiovq bhiq-u phao
aqyu juq-i mail khail-ai thaq nail lavq phee bhai
yovqgavq bhai yovqgavq bhi phee lai yaoq.
3 Haq eiv nail juq neq
yovqgavq nail neekhaol nl nail bhai
neema eeq eeq ail aqdoevq doevq nail ngaol.
Nee khaol eeq khi kav jaq nail juq neq
Heeqphaq Miqyail bhai ivqkhail yavq yavq ail
khal ge movq ail ge nail ngaol.
4 Haq eiv nail juq neq, neema eeq khi
Miqyail bhai maq hal pov dai, jaol nail ngaol.
Aqyu juq nail nee noeq bhai Miqyail maq jaol ail.
5 Aqyu juq neq, doevq jaq lal khi
Miqyail yalkhaq dal nail ganl bhai
noeq heeq noeq moel nia nail maq bhao ail.
Aqyu juq-ai neejiav jiav nail
tsaol-aq juq bhai iqsanl
meel naq daiq bhiq nail ngaol.
6 Neema lavqkhoel nee
“Ngal teevq thal-iq maq sunq ail,
teevq thal-iq maq haq maq aoq ail” dai
ge thail thaiq nail ngaol.
7 Iq khail yavq nail daoq
goiqbhaoq bhaoq nail daoq khi mail
yu bhai he kha nail daoq
aqyu juq nail moeqthaoq bhai
teevq bhee aol nail ngaol.
Aqyu juq nail moevqlal
yu bhai lav suq saq nail daoq ge khi
daoq doil ge nail ngaol.
8 Jul gu doi dai aqyu juq khoiq hel daiq khi
oeqbal maq aol nail tsaol-aq bhai
yu bhai maq bhi moel daiq dai heivq-a nail ngaol.
Khul maq khi nia nail haq yaq aoq yaq juq bhai
khoeq bhiq nail dai khi
hel daiq cov-ai thaq nail ngaol.
9 Aqyu juq neq, al laq jaq sil teevq maol
jiavbuv bhai tsaoq uvq nail khe-ai tsaoq uvq khi
haq yaq aoq yaq juq bhai lovq nail ngaol.
Haq yaq aoq yaq juq bhai
lavq phee-ai bhi naoq pheel laivq
khi nieivq nail ngaol.
10 Haq yaq aoq yaq juq neq, ga tsuq ail khi
bhi naoq peiv bhi naoq leiv nail nee ovqtavq
haqeiv nail juq nail kov-uvq bhai ya aol ail nail ngaol.
11 "Miqyail neq,
maivphaoq maq bhi moel dai, nioil peivq khi
nv juq-i mail nl nail phaq bhai
maq hel daiq ail" dai
haqeiv nail juq noeq thail thaiq nail ngaol.
12 Heeqphaq Miqyail-ol, thul lal yaoq.
Miqyail-ol, naoq nail aqlavq gaol tsaoq khi
haq yaq aoq yaq juq bhai thaq nioil peivq dei-eiq.
13 Khul khi mail haqeiv nail juq
Miqyail bhai khal ge movq ail ge nail-aiq.
Khul khi mail
"Miqyail nv juq bhai yalkhaq maq dal lavq-il" dai
neema lavqkhoel bhai noeq nail-aiq.
14 Thail hai ngaol-aoq
suq saq nail phaq khi noeq haq nail phaq bhai
naol moel khi tsao jao-ai bhiq nail ngaol.
Haq yaq aoq yaq juq naoq bhai juq khi
naol neq, aqbhu aqma maq jaol nail juq bhai
tsao jao-ai nail gaq pevq nail ngaol.
15 Haq eiv nail juq nail
lavq noil ngaoq khoi bhiq khi
haqeiv nail phaq maq nl nia-u kev dai
naol aqyu juq bhai khoeq bhiq jiovq bhiq yaoq.
16 Heeqphaq Miqyail neq
nqmaq maqluv halyeel
uv thaiq nail heeqphaq pevq nail ngaol.
Yu nail jeq-e jaq-a
aivq nail milkhaoq lavqkhoel nee
peivq ail boev ail gil nail ngaol.
17 Heeqphaq Miqyail-ol
nee nuq nee beiv aol nail
juq-i mail loq nail phaq khi
geeqlaoq hal daoq bhai
naol nal daiq nail nee ovqtavq
neema bhai gaq bivq nail ngaol.
18 Haq yaq aoq yaq juq khi mail
aqbhu aqma maq jaol nail juq nail haqbhoil
yalkhaq dal khi hel daiq phail bhiq yaoq.
Al hai nl haq neq
miltsaq kovtavq bhai jaol nail tsaol-aq juq
aqyu juq bhai maq lav gee sil nia yaoq-ao.