Tsiq eeq 9
Daol coev dai yalkhaq dal nail Miqyail bhai tsiq eeq nail ganl
1 Heeqphaq Miqyail-ol
ngaq nail neema lavqkhoel nee
naoq bhai tsiq eeq nail ngaol.
Naoq-i mail nl dov-ai thaq nail
noeq-u maq dov nail ganl juq iqsanl bhai
ngal ge gaiq bhiq nail ngaol.
2 Naol neq
ngaq nail neekhaol sil duq pevq khi
ngaq nail lavqkhiq tsail duq iqsanl pevq nail ngaol.
Eeq dee heel dee dee nail Miqyail-ol
naoq nail aqmil bhai daoqsel gul khi
tsiq eeq nail ngaol.
3 Ngaq bhai neejiav jiav nail tsaol-aq juq
haoqnaol tsiq phaol gai-aivq nail lavqkhoel nee
bavq tsuq ail khi
naoq nail sivtavq bhai luq ail seil ail nail ngaol.
4 Miqyail neq
ngaq-ai phao jaol khi
aq tsaq aqdaol daol dai
yalkhaq dal lavq-a nail ngaol.
Doiq bev bev ma nail kovtavq bha jaol deel khi
tsaq nail daol nail lavqkhoel nee
yalkhaq dal bhiq nail ngaol.
5 Naol yu nail jeq-e jaq-a bhai khaq bhiq khi
haqeiv nail juq bhai lav cov nail ngaol.
Aqyu juq nail aqmil miltsaq nee
nqmaq maqluv halyeel peivq ceiv ceiv ail dai
nl bhiq nail ngaol.
6 Nee jiav jiav nail juq bhai
nqmaq maqluv halyeel
naol lav luq lav seil bhiq nail ngaol.
Aqyu juq nail meenq juq nail
daoq tsail gaol dov khi
lav luq lav seil bhiq nail lavqkhoel nee
aqyu juq-i mail doevq jel ail
ceevq-a nail ganl bhai
yu nioil peivq gil-a nail ngaol.
7 Thail hai ngaol-aoq
Heeqphaq Miqyail neq
nqmaq maqluv halyeel uv thaiq khi
yalkhaq dal nail haqbhoil
doiqbev bev ma bavq thaq-ai thaq nail ngaol.
8 Aivq neq, miltsaq niil iqsanl nail kovtavq bhai
tsaq nail daol nail phaq nee uv thaiq khi
jeq-e jaq-a juq iqsanl nail kovtavq bhai
daol coev dai yalkhaq dal nail ngaol.
9 Bhi khoeq bhi jiovq nail juq nail haqbhoil
Heeqphaq Miqyail neq, tavq pevq khi
haq nail aoq nail phaq kev lee-u phao
a bhai juq kivq nail ngaol.
10 Heeqphaq Miqyail-ol
naoq nail aqmil bhai
heeq nia nail tsaol-aq juq
naoq bhai neema thaq tsaol khi
naoq bhai hal pov nail tsaol-aq bhai
naol khaonq ha nail maq bhao ail.
11 Yeiqlulsaqlaiq meenq-ai
uv thaiq nail Heeqphaq Miqyail bhai
daoqsel gul khi tsiq eeq yaoq.
Aivq-i mail nl-a nail ganl juq
jeq-e jaq-a iqsanl bhai ge daiq bhiq yaoq.
12 Haq eiv nail juq-i mail
bhi khoeq bhi jiovq-a nail
tsaol-aq juq nail haqbhoil
nl kovq bhiq nail Miqyail neq
bhi khoeq bhi jiovq nail juq bhai
hel daiq phail nail ngaol.
Aqyu juq-i mail nioil nail aqthel bhai
aivq maq nioil peivq ail.
13 Heeqphaq Miqyail-ol
ngaq bhai gaoq haq lavq yaoq.
Nee jiav jiav nail juq
khoeq lavq nail bhai moel khi
sil nail milkhaoq nail lolgov nee mail
ngaq bhai tsiq dov kovq lavq yaoq.
14 Al hai tsiq dov kovq lavq haq neq
Yeiqlulsaqlaiq meenq nail lolgov bhai
naoq bhai tsiq eeq nail lavqkhoel nee
yu bhai ge daiq bhiq nail ngaol.
Naol ngaq bhai hevq kovq lavq-a nail ngel-i mail
ngal lavqkhiq tsail nail ngaol.
15 Yu nail milkhaoq khe jeq-e jaq-a juq neq
yovqgavq-i mail duq-a nail khaq duq bhai
aqyu juq ga bhoel ail khi
yovqgavq-i mail
khail-ai thaq nail lavq phee bhai
yovqgav yovqgavq naoq pheel laivq nail ngaol.
16 Heeqphaq Miqyail neq
yalkhaq dal nail lavqkhoel nee aivq khaq sil dai
phao daiq bhiq nail ngaol.
Haq eiv nail juq
lavq phee khail-ai thaq nail bhai
yovqgav yovqgavq tev pheel laivq nail ngaol.
17 Haq eiv nail tsaol-aq juq
sil nail milkhaoq bhai bhi kev ail khi
Miqyail bhai khaonq ha nail
jeq-e jaq-a juq iqsanl mail
al hai pevq ail nail ngaol.
18 Thail hai ngaol-aoq
moevq nail sivq nail tsaol-aq juq bhai
khaq mao iqsanl, Miqyail maq nioil peivq ail.
Haq nail aoq nail tsaol-aq juq-i mail
noeq thunq nail phaq
khaq mao iqsanl, maq cov ail nia ail.
19 Heeqphaq Miqyail-ol, thul lal yaoq.
Tsaol-aq yaq naoq bhai thaq bhi gaq lal.
Miltsaq khe jeq-e jaq-a iqsanl bhai
naoq nail sivtavq nee yalkhaq dal yaoq.
20 Heeqphaq Miqyail-ol
aqyu juq bhai bhi gee sil lal bhiq yaoq.
Miltsaq khe jeq-e jaq-a iqsanl bhai
miltsaq yaq bhaqaoq maq aol il dai
yovqgavq bhai yovqgavq bhi heeq nia lal yaoq.