Tsiq eeq 8
Miqyail nail seiqleiq khaoqsail bhai tsiq eeq yaoq
1 Heeqphaq Miqyail-ol
nv juq nail Heeqphaq Miqyail-ol
miltsaq niil iqsanl nail kovtavq bhai
naoq nail aqmil kha dai eeq nail ngel ail.
Naoq nail seiqleiq khaoqsail
nqtavq kovtavq bhai jiav nail ngaol.
2 Naoq bhai neejiav jiav nail
tsaol-aq juq bhai maqkhaiq
naoq bhai nl kovq lavq nail
tsaol-aq juq bhai maqkhaiq
bhi naq lai nail haqbhoil
yaqnoil juq khi mail aqtsil cuvq yaq juq
naoq nail bhaqaoq bhai tsiq eeq nail ngaol.
3 Naoq nail khil yal lavq yal pevq nail
naoq nail nqtavq bha ngal gaol lel khi
noeq daiq-u phao
naoq-i mail bhi jiav bhee gil-ai thaq nail
aqgil bhala juq bhai hel daiq khi
4 tsaol-aq yaq bhai
naol noeq moel heeq phaq-ail
tsaol-aq yaq neq, khul pevq nail-aiq.
Tsaol-aq nail yaqyov bhai
naol hel daiq phail heeq phaq-ail
tsaol-aq nail yaqyov neq, khul pevq nail-aiq.
5 Thail hai ngaol-aoq, aivq bhai
naoq-ai nee micil theq jaiq nail jaol duq bhai
bhi jaol-ai thaq khi
aivq nail uqhuq bhai seiqleiq khaoqsail-i mail
leel jaoq-ai thaq nail ngaol.
6 Naoq nail khil yal lavq yal nail kovtavq bhai
aivq-i mail bhi uv thaiq khi
naoq-i mail khal teivq-ai thaq nail phaq iqsanl
aivq nail kov-uvq bhai bhi jiav-a nail ngaol.
7 Yaol juq maqkhaiq
niaoqnel juq maqkhaiq
haqtsoiq jaiqyaq juq maqkhaiq
8 keivq-avq juq maqkhaiq
delgil juq maqkhaiq
iqyaq iqma nail lavqkhoel bhai
jaol nail jaiqyaq juq iqsanl bhai maqkhaiq
aivq-i mail bhi uv thaiq-a nail ngaol.
9 Heeqphaq Miqyail-ol
nv juq nail Heeqphaq Miqyail-ol
miltsaq niil iqsanl nail kovtavq bhai
naoq nail aqmil kha dai eeq nail ngel-aiq.