Yaolsuv 23
Yaolsuv, aqivq aqtsu juq bhai haoqnao naosaq khe ge bhiq-a nail daoq
1 Aqyanq maoq lal-u phao, Heeqphaq Miqyail neq, Ilsaqleiqlav nail tsaol-aq juq nail teevq jaoq jaol nail neejiav jiav nail juq iqsanl nee bhi jel-ail khi gaq naq bhi naq-a nail ngaol. Aq-u phao, Yaolsuv gail aqkovq jiav dee dee lal-aoq nail ngaol.
2 Al heel ngel-i mail, aivq neq, Ilsaqleiqlav nail tsaol-aq juq iqsanl mail bhai khul jil-a nail ngaol. Al nail lavqkhoel bhai neq, joiqmaoq mavmaoq juq maqkhaiq, aqivq bhi jiovq-ai thaq nail juq maqkhaiq, yalkhaq dal nail juq maqkhaiq, genl dev nail phao khe aqivq juq maqkhaiq aol nail nee ovqtavq, niail hai ge bhiq-a nail ngaol: "Ngal neq, joiqmaoq maoq lee-aoq nail ngaol.
3 Nuljuq neq, nul juq nail Heeqphaq Miqyail-i mail nul juq nail haqbhoil yu nail jeq-e jaq-a niil juq iqsanl bhai khal hai nl bhiq-a nail ganl, iqsanl mail ya moel gil-a nail ngaol. Nul juq nail Heeqphaq Miqyail niil gaq neq, aivq nail aqmaol nul juq nail haqbhoil genl dev-a nail ngaol.
4 Thaq nioil peivq dei-eiq. Ngal neq, nul juq nail jeq-e juq iqsanl bhai yu nail jeq-e jaq-a juq nail miltsaq bhoil bhiq-a nail ngaol. Genl maq dev ya haq nail miltsaq juq dai khi, ngaq-i mail genl dev ya-a nail miltsaq juq iqsanl, nul juq bhai bivq-a nail ngaol. Miltsaq al juq neq, Yaoldaq laoljaol nee mail Meildiqtiqlav iqyaq iqma nlma ga khoeq phao kev dai, kev nail ngaol.
5 Nul juq nail haqbhoil Heeqphaq Miqyail aivq aqmaol neq, nul juq nail sivtavq nee, aqyu juq iqsanl bhai the dov gil bhiq nail ngaol. Aq-u phao, nul juq neq, Heeqphaq Miqyail-i mail saljial jaq-ai thaq nail khe-ai, aqyu juq nail miltsaq iqsanl bhai, ya uv thaiq gil nail ngaol.
6 Al heel ngel-i mail, nul juq neq, Maolseiq nail aolthaq kovqthaq haoqgavq lavqkhoel khe khal gevq-ai thaq nail yaoq phaq yaoq-ao nee mail, aqmeeq-ai tsao the yaoq. Lavqtsel phao maqkhaiq, lavqmal phao maqkhaiq, maq pav-ail dai, tsao the yaoq.
7 Nuljuq nail lavqkhoel khe jail-ai haq nail yu nail jeq-e jaq-a juq nee teevq gaq khe-ai, aqtsaoq thaq tsaoq tavq. Aqyu juq nail miqyail juq nail aqmil juq bhai ge dov khi miqyail al juq nee mail saljial thaq jaq tavq. Miqyail al juq nail ganl nl khi uqhuq thaq thaoq.
8 Thail hai ngaol-aoq, yaq n n-gaol kev dai, nul juq-i mail nl dal lavq-a nail khe-ai, nul juq nail Heeqphaq Miqyail bhai ivq dao dai, nieivq thaiq-ai thaq yaoq.
9 Khul khi mail dai ngal-aq, Heeqphaq Miqyail neq, gaq kav khi eeq dee dee nail jeq-e jaq-a juq bhai, nul juq nail sivtavq nee the dov gil bhiq-a nail ngaol. Yaq n n-gaol kev dai, nul juq bhai lav tsoiq nia nail teevq jeq-e iqsanl maq jaol-ai haq-al.
10 Nuljuq nail lavqkhoel khe teevq gaq thul khi neejiav jiav nail juq 1000 gaq bhai the ha gil nail ngaol. Khul khi mail dai ngal-aq, nul juq nail Heeqphaq Miqyail neq, aivq-i mail saljial jaq-ai thaq nail khe-ai, nul juq nail haqbhoil genl dev lavq-a nail ngaol.
11 Al heel ngel-i mail, nul juq nail Heeqphaq Miqyail bhai gaiq-a nail haqbhoil aqmeeq dai neema kev yaoq.
12 Thailhai ngaol-aoq, nul juq Heeqphaq Miqyail bhai haoqnaol tsiq phaol nail lavqkhoel nee, nul juq nail lavqkhoel khe jail-ai haq nail yu nail jeq-e jaq-a nee mail aqtsaoq tsaoq tavq nail maqkhaiq, hevq pheel maol pheel jaq nail maqkhaiq, aqyu juq nee mail tavq lai nail phaq maqkhaiq, nl haq neq,
13 nuljuq niail hai aqmeeq-ai heeq kivq thaq gai yaoq. Nul juq nail Heeqphaq Miqyail neq, jeq-e jaq-a al juq bhai nul juq nail sivtavq nee maq the dov lavq-ail. Thail hai ngaol-aoq, aqyu juq neq, nul juq nail haqbhoil lavqphee dai khi wan khail-aiq thaq nail khe-ai maqkhaiq, naoq nail kaolceevq bhai jiivq lal nail neeqtsaq khe-ai maqkhaiq, naoq nail maivneev lavqkhoel khe aqgoe khe-ai maqkhaiq, dul nail ngaol. Heeqphaq Miqyail-i mail nul juq bhai bivq lavq-a nail meeq nail milkhaoq niil khaoq nee maq khal luq maq khal seil gil ail-u kev dai, al hai dul nail ngaol.
14 Maq maoq maq heel lal mail, ngal iqsanl, yu khe-ai ya sil nail ngaol. Nul juq, Heeqphaq Miqyail-i mail nul juq bhai bivq lavq-a nail meeq dee dee nail daoqma saljial neq, khul teevq phaq iqsanl, theq-ail nail phaq maq jiav dai, mal dil pevq gil lal-a nail ngaol dai, aqhaqlal lavqkhoel nee neema bha kev dai heeq nia nail ngaol.
15 Thail hai ngaol-aoq, nul juq nail Heeqphaq Miqyail neq, aivq-i mail saljial jaq-ai thaq nail meeq dee dee nail phaq, nul juq bhai bivq lavq-a nail khe-ai, aivq-i mail ge-ai thaq nail haq-eiv nail phaq iqsanl, nul juq nail kovtavq bhai bhi kev lee kivq nail ngaol. Al hai kev lee-u phao, aivq-i mail nul juq bhai bivq lavq-a nail meeq nail milkhaoq niil khaoq nail lavqkhoel nee the dov gil lavq nail bhai ya daq nail ngaol.
16 Nul juq, nul juq nail Heeqphaq Miqyail-i mail bivq lavq-a nail daoqma saljial bhai nl laiq khi miqyail yaoq gaq yaoq jaol nail phao uqhuq thaoq nail nee ovqtavq, miqyail al juq nail ganl nl haq neq, Heeqphaq Miqyail-i mail neema phail nail phaq nul juq bhai poiv jaq gil lavq nail ngaol. Nuljuq neq, aivq-i mail bivq lavq-a nail meeq nail milkhaoq niil khaoq nee, lavqtsail mail luq-ail seil-ail gil nail ngaol" dai, ge bhiq-a nail ngaol.