Yaolsuv 24
Heeqphaq Miqyail nail daoqma saljial Seiqkhinq meenq bhai aqsivq gaoq lav sivq pov-a nail ganl
1 A bhai nee ngal-aq, Yaolsuv neq, Ilsaqleiqlav nail jeq-e yaoq jeq-e yaoq-ao nee bhai Seiqkhinq meenq bha, Miqyail nail sivtavq-ai bhi jil gil lal-a nail ngaol. Al nail lavqkhoel bhai neq, joiqmaoq mavmaoq juq maqkhaiq, aqivq aqtsu bhi jiovq-ai thaq nail juq maqkhaiq, yalkhaq dal nail juq maqkhaiq, genl dev nail phao khe aqivq juq maqkhaiq aol nail ngaol.
2 Aq-u phao aivq neq, aqyu juq bhai niail hai ge bhiq-a nail ngaol: "Ilsaqleiqlav nail Heeqphaq Miqyail neq niail hai ge nail ngaol: 'Mil nee uq nee khe nul juq nail aqphiq aqbhal juq neq, Pheqlaqtaq nail laoljaol teevq phao bal-nvq bha jaol khi miqyail yaoq juq yaoq bhai uqhuq thaoq-a nail ngaol. Al nail lavqkhoel bhai Aqbhaqlaqhaq dai khi Naqhaoq nail aqbhu Teiqlav iqsanl aol nail ngaol.
3 Thail hai ngaol-aoq, ngal neq, nul juq nail aqbhu Aqbhaqlaqhaq bhai Pheqlaqtaq laoljaol teevq phao bal-nvq nee mail hevq ceil leevq khi Khaqnanq milkhaoq bhai hevq bhoel leevq-a nail ngaol. Al ovqtavq, aivq nee mail yavq kha lee thaq nail yaq juq mao dai bhi mao lal-a nail ngaol. Ngal aivq nail haqbhoil Ilcav bivq-a nail ngaol.
4 Al ovqtavq, Ilcav nail haqbhoil neq, Yaqkov dai khi Eilsaol bivq-a nail ngaol. Ngal Eilsaol bhai Sol-iq nail gaoqjaoq juq bivq khi, Yaqkov dai khi aivq nail yaq juq neq Iljiltuv nail milkhaoq bha ail khi jaol ail-a nail ngaol.
5 A bhai nee ngal-aq, ngal Maolseiq dai khi Aqlonq bhai khoel gai aivq-a nail nee ovqtavq, Iljiltuv nail milkhaoq bhai khoeq bhiq jiovq bhiq khi nul juq bhai hevq dol lavq-a nail ngaol.
6 Ngal, nul juq nail aqphiq aqbhal juq bhai Iljiltuv nail milkhaoq nee mail hevq dol leevq khi iqyaq iqma aqnela bhai lee kev-u phao, Iljiltuv nail tsaol-aq juq neq, aqyu juq nail moeqphaq nail munl juq bhai maqkhaiq, lavlaoq dai khi a bhai jeenq thaq nail juq bhai maqkhaiq, khoel gai-aivq khi, iqyaq iqma al bhai the kel laivq-a nail ngaol.
7 Thail hai ngaol-aoq, aqyu juq ngaq bhai "Heeqphaq Miqyail-ol, tsao jao-ai lavq-o" dai, gul-a nail ngaol. Aq-u phao, ngal neq aqyu juq dai khi genl dev lal-a nail Iljiltuv nail tsaol-aq juq nail gaiqlaq bhai aqnav bhi nav lai-a nail nee ovqtavq, Iljiltuv nail tsaol-aq juq nail kovtavq bhai neq, iqyaq iqma nail ulcuvq-i mail bhi deq pheeq heivq gil-a nail ngaol. Nul juq iqsanl, ngaq-i mail Iljiltuv nail tsaol-aq juq bhai khal hai nl bhiq-a nail ganl maivneev nee ya moel-a nail ngaol. A bhai nee ngal-aq, nuljuq haqtsoiq haqyal bhai aqyanq mao dai ya jaol-a nail ngaol.
8 Ngal neq nul juq bhai Aqmaolliv nail jeq-e jaol nail Yaoldaq laoljaol nail nlma dov khoeq phao jiav nail miltsaq bha, hevq kel leevq bhiq-a nail ngaol. Aqyu juq nul juq bhai genl dev lal-a nail ngaol. Thail hai ngaol-aoq, ngal aqyu juq bhai nul juq nail aqlavq lavqkhoel-ai av bhiq-a nail ngaol. Ngal aqyu juq bhai nul juq nail sivtavq nee lav luq lav seil gil bhiq khi, nul juq aqyu juq nail miltsaq bhai ya uv thaiq-a nail ngaol.
9 Silphaoq nail yaqyov Bhaqlaqhaq dai khul nail Maolbav nail heeqphaq neq, Ilsaqleiqlav nail tsaol-aq juq bhai genl dev nail dai, khi-u phao, Bheiqaoq nail yaqyov Bhaqlanq bhai khul khi, nul juq bhai iqkhail bhi yavq lal-a nail ngaol.
10 Thail hai ngaol-aoq, ngal, Bhaqlanq nail daoq bhai maq nal daiq-a nail ngel-i mail, aivq nul juq bhai teevq pov gil haq neq, teevq pov geeqlaoq bivq lavq-a nail ngaol. Al ovqtavq, ngal nul juq bhai Bhaqlaqhaq nail aqlavq lavqkhoel nee mail hevq jel bhiq-a nail ngaol.
11 A bhai nee ngal-aq, nul juq neq, Yaoldaq laoljaol ceiv lal khi Yeiqlilkhol nail meenq bha kev lal-a nail ngaol. Yeiqlilkhol nail tsaol-aq juq nul juq bhai genl dev-a nail ngaol. Al hai dul dai, Aqmaolliv nail tsaol-aq juq, Pheiqliqsil nail tsaol-aq juq, Khaqnanq nail tsaol-aq juq, Hiltiv nail tsaol-aq juq, Gillavgaqsil nail tsaol-aq juq, Hilwil nail tsaol-aq juq dai khi Yeiqbhulsil nail tsaol-aq juq iqsanl nul juq bhai genl dev lal-a nail ngaol. Thail hai ngaol-aoq, ngal aqyu iqsanl bhai nul juq nail aqlavq lavqkhoel-ai av bhiq-a nail ngaol.
12 Ngal, nuljuq nail sivtavq nee mail gee sil lal heeq phaq-ail tsaq nail bhaiqtsil nail munl khe-ai, gee sil lal nail phaq iqmoeq bhi lai-a nail ngaol. Al neq, nul juq nail sivtavq nee mail aqyu juq bhai maqkhaiq, Aqmaolliv nail heeqphaq nvq gaq bhai maqkhaiq the ha nail khi mail ngaol. Nuljuq-i mail gaq lai-a nail neq, nul juq nail thaoma dai khi heeqnav bhaq da nee maq ngel-ail.
13 Ngal nul juq-i mail gaq maq hal dov-a nail miltsaq bhai bivq-a nail ngaol. Nuljuq-i mail maq cov-a nail meenq juq iqsanl, nul juq bhai bivq-a nail ngaol. Niil aq-il nul juq al bhai jaol khi, nuljuq-i mail maq kha-a nail aqheeq tsilju nail aqheeq dai khi mail saqloq aqheeq jaq thail thaiq nail ngaol' dai, Heeqphaq Miqyail ge nail ngaol.
14 Al heel ngel-i mail, niil aq-il nul juq neq, Heeqphaq Miqyail bhai ev khi aivq nail ganl bhai saljial ivq nail lavqkhoel nee neema kev khi nl yaoq. Pheqlaqtaq nail laoljaol a phao lelkhel khe dai khi Iljiltuv nail milkhaoq bhai nul juq nail aqphiq aqbhal juq-i mail uqhuq thaoq-a nail miqyail juq bhai liv ha khi Heeqphaq Miqyail nail ganl bhai taivq-ail nl yaoq.
15 Thail hai ngaol-aoq, nul juq Heeqphaq Miqyail bhai uqhuq thaoq nail neekhaol maq sil haq neq, yaq n n-gaol naol khaq sil gaq bhai uqhuq thaoq nail-aiq dai, tsel yaoq. Nul juq nail aqphiq aqbhal juq-i mail Pheqlaqtaq laoljaol a phao lel khel khe uqhuq thaoq khal leevq-a nail miqyail juq bhai laiq. Maq ngel haq neq, niil aq-il nul juq-i mail jaol thail thaiq nail Aqmaolliv nail tsaol-aq juq nail miqyail juq bhai laiq. Thail hai ngaol-aoq, ngaq nail aqmaol dai khi ngaq nail phaqyaq mayaq juq neq, Heeqphaq Miqyail bhai taivq-ail uqhuq thaoq nail ngaol" dai, ge bhiq-a nail ngaol.
16 Aq-u phao tsaol-aq al juq iqsanl mail, niail hai ge nail ngaol: "Ganl al juq iqsanl mail nv juq nail eqyal bha bhi jiav deiq-eiq. Nv juq neq Heeqphaq Miqyail bhai maq khaonq ha-ail. Miqyail yaoq gaq yaoq bhai iqsanl, uqhuq maq thaoq-ail.
17 Nvjuq nail Miqyail pevq nail Heeqphaq Miqyail, Miqyail niil gaq neq, nvjuq nail aqphiq aqbhal juq dai khi nv juq bhai yaqkav jiovq nail Iljiltuv nail milkhaoq nee mail hevq dov lavq-a nail ngaol. Nv juq nail sivtavq nee aivq neq, eeq dee dee nail noeq-u maq dov nail phaq nl daiq lavq-a nail ngaol. Aivq neq, nv juq haqtsoiq haqyal bhai gailkhaol dov-u phao, gailkhaol teevq lao tsaoq yu nail jeq-e jaq-a nee bhi jel-ail lavq khi hel daiq phail lavq-a nail ngaol.
18 Al ovqtavq, Heeqphaq Miqyail neq, nv juq-i mail jaol thail thaiq nail milkhaoq niil khaoq nail lavqkhoel nee yu nail jeq-e jaq-a juq iqsanl bhai the ha gil khi, Aqmaolliv nail tsaol-aq juq bhai iqsanl the dov-a nail ngaol. Al heel ngel-i mail nv juq iqsanl, Heeqphaq Miqyail bhai taivq-ail, uqhuq thaoq nail ngaol. Khul khi mail dai ngal-aq, Heeqphaq Miqyail neq nv juq nail Miqyail pevq nail ngaol" dai, ge kovq bhiq-a nail ngaol.
19 Aq-u phao, Yaolsuv neq tsaol-aq al juq bhai niail hai ge kovq bhiq-a nail ngaol: "Nuljuq Heeqphaq Miqyail bhai uqhuq maq thaoq nia-ail. Aivq neq, meeq nail haol nail Miqyail pevq khi, neekhaol maq sil nail Miqyail pevq nail ngaol. Aivq neq, nul juq-i mail pheeq-a nail ganl bhai dai khi oeqbal nl-a nail ganl bhai maq phaiq lavq-ail.
20 Nuljuq Heeqphaq Miqyail bhai khaonq ha khi miqyail yaoq juq yaoq bhai uqhuq thaoq-ail haq neq, aivq nul juq jaol nail phao tsiq phaol kovq-ai lavq khi, nul juq bhai khoeq lavq jiovq lavq nail nee ovqtavq, lav luq lav seil gil lavq nail ngaol. Aivq neq, nul juq bhai khaqmao iqsanl meeq lavq khi ngaol-aoq, aivq al hai nl lavq nail ngaol" dai, ge bhiq-a nail ngaol.
21 Thail hai ngaol-aoq, tsaol-aq al juq ge nail: "Al hai maq ngel-ail. Nv juq neq, Heeqphaq Miqyail bhai taivq-ail uqhuq thaoq nail ngaol" dai, Yaolsuv bhai ge bhiq-a nail ngaol.
22 Aq-u phao, Yaolsuv iqsanl, "Nuljuq Heeqphaq Miqyail bhai taivq-ail uqhuq thaoq naol dai, tsel-a nail al neq, nul juq yovqgavq nail aqmaol bhai yovqgavq phee thaiq-a nail salkhil teevq laiq pevq nail ngaol" dai, ge bhiq-u phao, aqyu juq gail, "Ngel naol, nv juq nail aqmaol salkhil pevq nail ngaol" dai, ge kovq bhiq-a nail ngaol.
23 Yaolsuv gaoq ge nail: "Thail hai phal-iq neq, nul juq nail lavqkhoel khe jiav nail yu nail jeq-e jaq-a nail miqyail yaoq gaq yaoq bhai liv ha khi, Ilsaqleiqlav nail Heeqphaq Miqyail bhai naoq nail neema iqsanl mail bivq yaoq" dai, ge bhiq-a nail ngaol.
24 Aq-u phao, tsaol-aq al juq Yaolsuv bhai niail hai ge bhiq-a nail ngaol. "Nv juq iqsanl mail nv juq nail Miqyail pevq nail Heeqphaq Miqyail bhai taivq-ail uqhuq thaoq khi aivq nail daoq bhai nal daiq nail ngaol" dai, saljial jaq-a nail ngaol.
25 Al heel ngel-i mail Yaolsuv neq, aq-u n-gaol Seiqkhinq nail meenq bhai tsaol-aq al juq nee mail daoqma saljial jaq khi, aqyu juq-i mail ya tsao the nail ganl juq dai khi aolthaq kovqthaq ge gaiq bhiq-a nail ngaol.
26 Yaolsuv neq, ganl al juq iqsanl bhai Miqyail nail aolthaq kovqthaq gevq-ai thaq nail haoqgavq phaldoiq lavqkhoel bhai gevq bhoel gai-a nail ngaol. A bhai nee ngal-aq, aivq neq, lovmav heeq ma teevq heeq doeq khi Heeqphaq Miqyail nail uqhuq thaoq nail haqphal saiqgov nail aqjail bhai doevq nail ceevqkav aqbhaol nail daoqthaoq bhai doeq thaq gai-a nail ngaol.
27 Yaolsuv, tsaol-aq al juq iqsanl bhai niail hai ge bhiq-a nail ngaol: "Hel daiq yaoq. Lovmav niil heeq neq ngadao juq bhai phee thaiq-ai thaq nail salkhil pevq nail ngaol. Lovmav niil heeq neq, Heeqphaq Miqyail-i mail ngadao juq bhai khal ge lavq-a nail daoq yaoq daoq yaoq-ao nee bhai, gaiq gil nia nail ngaol. Al heel ngel-i mail nul juq nail Miqyail bhai khaonq ha haq neq, lovmav niil heeq neq nul juq nail haqbhoil salkhil pevq nail ngaol" dai, ge bhiq-a nail ngaol.
28 A bhai nee ngal-aq, Yaolsuv neq, tsaol-aq al juq iqsanl bhai yovqgavq-i mail jaiqbhoil ya-a nail miltsaq bha bhi kovq lai-a nail ngaol.
Yaolsuv dai khi Eillaqsaq sil-a nail ganl
29 A bhai nee ngal-aq, Heeqphaq Miqyail nail yaqkav pevq nail Nunq nail yaqyov Yaolsuv neq, aivq nail aqkovq 110 kovq bhee lal khi mail sil-a nail ngaol.
30 Aivq nail aqmaol bhai neq, Eilphaqlaqyinq nail gaoqjaoq juq khe aol nail Gaqsav nail gaoqjaoq pultavq phao jiav nail Tilmaqnav Seiqlav meenq bhai, aivq-i mail jaiqbhoil ya-a nail miltsaq-ai duq pheeq bhiq-a nail ngaol.
31 Yaolsuv-i mail aqdoevq khal doevq-u phao kev dai, Ilsaqleiqlav nail tsaol-aq juq neq, Heeqphaq Miqyail bhai uqhuq thaoq gil-a nail ngaol. Heeqphaq Miqyail-i mail aqyu juq bhai nl bhiq-a nail ganl yaoq phaq yaoq-ao nee bhai ya moel-a nail, Yaolsuv nee maqtsil yeel heel jaiq-a nail aqivq aqtsu juq aqdoevq doevq nail aqyanq bhai kev dai iqsanl, Heeqphaq Miqyail bhai uqhuq thaoq-a nail ngaol.
32 Ilsaqleiqlav nail tsaol-aq juq-i mail Iljiltuv nail milkhaoq khe oil dol lavq-a nail Yaolsai nail haqeeq bhai neq, Seiqkhinq nail meenq khe miltsaq bhai duq pheeq bhiq-a nail ngaol. Miltsaq al neq, Yaqkov-i mail Seiqkhinq nail aqbhul Haqmaoq nail yaqyov juq khe 100 bavq nee mail ul-a nail miltsaq pevq khi, Yaolsai nee mail yavq kha lee thaq nail yaq juq mail ya-a nail miltsaq jaiqbhoil juq nail lavqkhoel bhai aol nail ngaol.
33 A bhai nee ngal-aq, Aqlonq nail yaqyov Eilleiqaqsaq gail, sil khi aivq nail aqmaol bhai neq, aivq nail yaqyov Philnaqhal bhai jaiqbhoil bhoil bivq-a nail Eilphaqlaqyinq gaoqjaoq juq khe jiav nail Gilbhiq-aq nail meenq bhai duq pheeq bhiq-a nail ngaol.