Yaolsuv 22
Nlma dov khoeq phao khe jaol nail jeq-e juq kovq lai-a nail ganl
1 A bhai nee ngal-aq, Yaolsuv neq Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav bhai khul jil khi
2 niail hai ge bhiq-a nail ngaol: "Nuljuq neq, Heeqphaq Miqyail nail yaqkav Maolseiq-i mail daoq khal bivq lavq-a nail khe-ai yaoq phaq yaoq-ao nee nl khi, ngaq-i mail bivq-ai thaq nail daoq bhai iqsanl yaoq phaq yaoq-ao nee, nal daiq lavq-a nail ngaol.
3 Nul juq neq, yovqgavq nail aqivq jaqbheq pevq nail Ilsaqleiqlav nail tsaol-aq juq bhai maq khaonq ha nail nee ovqtavq, Heeqphaq Miqyail-i mail nul juq bhai bhi nl lavq-a nail khe-ai, yovqgavq nail ganl yovqgavq, aqyanq maoq lai khi ngaol-aoq, yanq gaol kev dai nl-a nail ngaol.
4 Niil aq-il, nul juq nail Heeqphaq Miqyail aivq-i mail saljial jaq-ai thaq nail khe-ai, nul juq nail aqivq jaqbheq juq bhai gaq naq bhi naq-a nail ngaol. Al heel ngel-i mail, Yaoldaq laoljaol a phao khe jiav nail nul juq nail jaol duq bha kovq-ail yaoq. Al neq, Heeqphaq Miqyail nail yaqkav pevq nail Maolseiq-i mail nul juq bhai bivq lavq-a nail miltsaq jaiqbhoil pevq nail ngaol.
5 Thail hai ngaol-aoq, bivq-ai thaq nail aoldaoq kovqdaoq dai khi, aolthaq kovqthaq bhai, Heeqphaq Miqyail nail yaqkav Maolseiq-i mail nul juq bhai bivq lavq-a nail khe-ai, aqmeeq-ai tsao the yaoq. Al neq: Naoq nail Heeqphaq Miqyail bhai gaiq-a yaoq. Aivq nail gailkhaol iqsanl bhai tsao the yaoq. Aivq-i mail daoq khal bivq-ai thaq nail phaq iqsanl bhai nl yaoq. Aivq nail lavqkhoel bhai ivq dao dai jaol yaoq. Aivq nail ganl bhai aqhaqlal lavqkhoel nee neema kev khi iqsanl mail nl yaoq" dai, ge bhiq-a nail ngaol.
6 Al heel ngel-i mail Yaolsuv neq aqyu juq bhai geeqlaoq bivq khi mail, aqyu juq nail ilkhaol bha bhi kovq lai-a nail ngaol.
7 Gaq-u, Maolseiq neq, Bhaqsanq nail milkhaoq khe miltsaq Maqnaqseiq nail jeq-e teevq pav bhai bivq-a nail ngaol. Jail nail jeq-e teevq pav bhai neq, aqyu juq nail aqivq jaqbheq juq nee mail teevq gaq khe-ai, Yaolsuv-i mail Yaoldaq laoljaol nl ma ga khoeq phao khe jiav nail miltsaq bivq-a nail ngaol. Yaolsuv aqyu juq bhai ilkhaol bha bhi kovq-ail nail dai khi-u phao, geeqlaoq bivq-a nail lavqkhoel nee,
8 niail hai gaoq ge bhiq-a nail ngaol: "Nul juq kovq-ail-u phao, ildaoq maoqgaiq juq mao dai maqkhaiq, jaiqyaq juq mao dai maqkhaiq, phul juq maqkhaiq, heel juq maqkhaiq, giqheel juq maqkhaiq, hail juq dai khi aqgaq aqdoi juq mao dai maqkhaiq, oil khi mail nul juq nail ilkhaol bha kovq-ail yaoq. Neejiav jiav nail juq khe ya-a nail phul heel ildaoq maoqgaiq al juq iqsanl mail nul juq nail aqivq jaqbheq juq bhai bhoil pav-ail bhiq yaoq" dai, ge bhiq khi bhi kovq ail-a nail ngaol.
9 Al heel ngel-i mail, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav juq neq, Khaqnanq milkhaoq Sillaol meenq bhai jaol nail Ilsaqleiqlav nail tsaol-aq juq nee mail pav-ail khi, Heeqphaq Miqyail-i mail Maolseiq bhai daoq bivq khi bhi bhoil bhiq-a nail yovqgav yovqgavq nail jaol duq pevq nail Gillav milkhaoq bha kovq lee gil-a nail ngaol.
Yaoldaq laoljaol aqjail bhai jiav nail laolduq
10 A bhai nee ngal-aq, aqyu juq Khaqnanq milkhaoq khe Yaoldaq laoljaol aqjail bhai jiav nail Gilliq-oq dai khul nail aqduq bhai ail kev-u phao, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav juq neq, Yaoldaq laoljaol al nail aqjail bhai eeq dee dee nail laolduq lav sav-a nail ngaol.
11 Thail hai ngaol-aoq, Ilsaqleiqlav nail tsaol-aq juq neq, aqyu juq nail miltsaq pevq nail Yaoldaq laoljaol nail aqjail khe jiav nail Gilliq-oq dai khul nail aqduq bhai, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav juq neq, laolduq cov thaq nail ganl, ya gaiq-a nail ngaol. Aqduq al duq neq, Khaqnanq milkhaoq bhai aol lai nail aqduq pevq nail ngaol.
12 Aq-u phao, jail nail aqyu juq nail tsaol-aq juq iqsanl mail neq, al juq bhai genl dev nail haqbhoil Sillaol nail meenq bhai jil gil lal khi mail maoq bhaoq nl-a nail ngaol.
13 Al heel ngel-i mail, aqyu juq neq, philma Eilleiqaqsaq nail yaqyov Philneiqhal bhai Gillav miltsaq bha Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav jaol nail bha bhi moel lai nail dai khi, bhi lal-a nail ngaol.
14 Ilsaqleiqlav 10 jeq-e nail lavqkhoel khe teevq jeq-e khe teevq gaq aqivq aqtsu 10 gaq iqsanl, bhi lal-a nail ngaol. Yaoq gaq yaoq-ao nee, yovqgavq nail ildaoq lavqkhoel khe aqivq pevq khi, Ilsaqleiqlav nail jeq-e lavqkhoel khe iqsanl aqivq pevq nail ngaol.
15 Aqyu juq neq, Gillav milkhaoq bha lal kev-u phao, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav bhai niail hai ge bhiq-a nail ngaol:
16 "Jil lal-a nail Heeqphaq Miqyail nail tsaol-aq juq iqsanl mail nul juq bhai niail hai ge nail ngaol: Niil aq-il, khul khi mail nul juq, Ilsaqleiqlav nail Miqyail bhai thail hai pheeq-a nail-aiq. Nul juq khal hai noeq khi Heeqphaq Miqyail bhai haoqnaol naolkovq kovq-a nail-aiq. Al ovqtavq, aivq bhai genl dev nail dai, yovqgavq nail laolduq bhai khul khi mail cov-a nail-aiq.
17 Peiqoqlava nail aqduq bhai ngadao juq-i nl laiq-a nail oeqbal al maq gaq-ai haq-al laiq. Heeqphaq Miqyail neq, aivq nail tsaol-aq juq iqsanl nail kovtavq bhai nal nail goel nail phaq bhi kev lee khi ngaol-aoq, niil aq-il kev dai, ngadao nail aqmaol khe oeqbal al iqsanl mail tsiq haol nail bhai, maq ya daq haq-al.
18 Thail hai ngaol-aoq, niil aq-il nul juq Heeqphaq Miqyail bhai haoqnaol naol kovq kovq-ai haq nail laiq. Nuljuq yaq n n-gaol Heeqphaq Miqyail bhai pheeq haq neq, niaohao aivq ngadao Ilsaqleiqlav nail tsaol-aq juq iqsanl bhai aivq neema phail lal bhiq nail ngaol.
19 Nul juq-i mail uv thaiq nail miltsaq maq meeq maq haol lao haq neq, Heeqphaq Miqyail nail uqhuq thaoq nail haqphal saiqgov jiav nail aivq nail miltsaq phao ceiv lal khi nul juq jaol nail haqbhoil nvjuq nail miltsaq bhai bhoil pav lal yaoq. Thail hai ngaol-aoq, Heeqphaq Miqyail bhai maqkhaiq, nv juq bhai maqkhaiq, pheeq khi yovqgavq nail laolduq thaq cov. Ngadao nail Heeqphaq Miqyail nail laolduq nee jaiq-ail haq neq, yaoq phaq yaoq nail laolduq thaq cov.
20 Seiqlav nail yaqyov Aqkhanq neq, 'Lav cov heeq phaq-ail tsaq nail nlmaoq yalkav bhai thaq oil' dai, ge nail daoq bhai maq nal daiq-a nail ngel-i mail, Miqyail-i mail neema phail nail phaq Ilsaqleiqlav nail tsaol-aq iqsanl nail kovtavq bhai kev lee-a nail maq ngel-ail laiq. Oeqbal bhaq da nee, aivq teevq gaq taivq-ail sil-a nail maq ngel-ail" dai, ge bhiq-a nail ngaol.
21 Aq-u phao, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav juq nail lavqkhoel khe, aqivq aqtsuq juq neq, Ilsaqleiqlav nail aqivq aqtsu juq bhai niail hai ge kovq bhiq-a nail ngaol:
22 "Yawei dai khul nail bhaqaoq eeq nail Miqyail, Yawei dai khul nail bhaqaoq eeq nail Miqyail, aivq heeq nia nail ngaol. Ilsaqleiqlav nail tsaol-aq juq iqsanl heeq kivq yaoq. Nv juq-i mail nl-a nail ganl niil, pheeq-a nail ganl pevq khi, Heeqphaq Miqyail nail daoq bhai maq nal daiq-a nail phaq pevq haq neq, yaq n n-gaol nv juq nail doevqyeel bhai thaq bhi jel-ail lavq.
23 Nv juq yovqgavq nail laolduq lav sav-a nail nee ovqtavq, Heeqphaq Miqyail nee eq-ail nail dai khi, laolduq kovtavq bhai miqjaq kheq poiv khi laol bhiq nail phaq maqkhaiq, govtsail tsail neev-i mail laol bhiq nail phaq maqkhaiq, aqtsaoq tsaoq tavq nail laol bhiq nail phaq maqkhaiq, nv juq nl-a nail ngel lao haq neq, Heeqphaq Miqyail aivq nail aqmaol nv juq bhai yalkhaq dal lavq deiq-eiq.
24 Maq ngel-ail. Nv juq khul khi mail laolduq cov-a nail dai ge haq neq, yaqhao nul juq nee yavq kha lee thaq nail yaq juq neq, nvjuq nail yaq juq bhai, 'Nul juq neq Ilsaqleiqlav nail Heeqphaq Miqyail nee mail khul tavq nail-aiq.
25 Heeqphaq Miqyail neq, nul juq dai khi nv juq nail gaiqlaq bhai Yaoldaq laoljaol nee milkhaiq khaiq pav-aiq thaq nail ngaol. Nul juq Lulbheiq nail jeq-e dai khi Gavq nail jeq-e neq, Heeqphaq Miqyail nee mail khul iqsanl maq tavq-ail' dai, ge lal haq neq, nul juq nee yavq kha lee thaq nail yaq juq, nv juq nee yavq kha lee thaq nail yaq juq bhai Heeqphaq Miqyail bhai gee sil khi maq ev dai, bhi pevq-ail lavq nail ngaol dai, khaoq laol nail ngel-i mail, laolduq ya cov-a nail phaq pevq nail ngaol.
26 Al heel ngel-i mail, nvjuq niail hai ge-a nail ngaol: 'Ngadao juq lainq khi laolduq cov bhel. Cov nail laolduq al neq, miqjaq kheq poiv khi laol bhiq nail phaq maqkhaiq, laol bhiq nail yaoq phaq yaoq maqkhaiq, maq ngel-ail.
27 Thail hai ngaol-aoq, laolduq niil laiq neq, nul juq dai khi nv juq nail gaiqlaq bhai maqkhaiq, yaq hao khe doevq lee nail yaq juq nail haqbhoil maqkhaiq, yaqhao nv juq, Heeqphaq Miqyail nail uqhuq thaoq nail haqphal saiqgov bhai lal khi, miqjaq kheq poiv nail laol bhiq nail phaq maqkhaiq, aqtsaoq tsaoq tavq nail laol bhiq nail phaq maqkhaiq, laol bhiq nail yaoq phaq yaoq maqkhaiq, nl kivq dai, salkhil pevq nail ngaol. Al heel ngel-i mail yaqhao nul juq nee yavq kha lee-a nail yaq juq neq, nv juq nee mail yavq kha lee-a nail yaq juq bhai, "Nul juq neq, Heeqphaq Miqyail nee mail khul iqsanl maq tavq-ail' dai, maq ge nial-ail" dai, ge bhiq-a nail ngaol.
28 Al ovqtavq, nv juq niail hai gaoq ge-a nail ngaol: 'Aqyu juq al hai nv juq bhai maqkhaiq, nv juq nee yavq kha lee thaq nail yaq juq bhai maqkhaiq, ge lal lao haq neq, "Heldaiq yaoq, nvjuq nail aqphiq aqbhal juq neq, Heeqphaq Miqyail nail laolduq kheel laolduq teevq laiq lav sav-ail ceevq-a nail ngaol. Laolduq al laiq neq, laol bhiq nail haqbhoil maqkhaiq, miqjaq kheq poiv khi laol bhiq nail haqbhoil maqkhaiq, maq ngel-ail. Thail hai ngaol-aoq nuljuq dai khi nv juq nail gaiqlaq bhai salkhil bhi pevq nail haqbhoil ngaol" dai, ge kovq bhiq kivq nail galduq pevq nail ngaol.
29 Heeqphaq Miqyail bhai pheeq nail phaq iqsanl mail, mal dil nv juq nail eqyal bha bhi jiav lavq dei-eiq. Yaq n n-gaol nv juq Heeqphaq Miqyail bhai haoqnaol naol kovq kovq khi miqjaq kheq poiv nail laolduq maq lav sav-ail. Nvjuq miqjaq kheq poiv khi laol bhiq nail phaq, govtsail tsail neev-i mail laol bhiq nail phaq dai khi, laol bhiq nail yaoq phaq yaoq nail haqbhoil laolduq lav sav khi laol bhiq-a nail iqsanl maq ngel-ail. Nv juq neq, nvjuq nail Heeqphaq Miqyail nail uqhuq thaoq nail haqphal saiqgov nail sivtavq bhai jiav nail laolduq khe-ai dul lai nail laolduq maq lav sav-ail" dai, ge kovq bhiq-a nail ngaol.
30 Philma Philneiqhal dai khi, Ilsaqleiqlav nail tsaol-aq juq nail lavqkhoel khe aqivq aqtsu juq neq, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav juq-i mail al hai ge nail bhai ya gaiq-u phao, neekhaol sil nail ngaol.
31 Aq-u phao, Eilleiqaqsaq nail yaqyov philma Philneiqhal neq, Lulbheiq nail jeq-e, Gavq nail jeq-e dai khi Maqnaqseiq nail jeq-e bhai niail hai ge bhiq-a nail ngaol: "Heeqphaq Miqyail neq, ngadao juq nee mail jaol-ail nial dai, Yaq n n-gaol nv juq heeq kivq-ao nail ngaol. Khul khi mail dai ngal-aq, nul juq ganl niil ganl nee tavq lai khi Heeqphaq Miqyail bhai saljial maq pheeq-al. Niil aq-il nul juq neq, Ilsaqleiqlav nail tsaol-aq juq, Heeqphaq Miqyail nail aqlavq nee ya jel-ail dai, nl lavq-a nail ngaol" dai, ge bhiq-a nail ngaol.
32 A bhai nee ngal-aq, Eilleiqaqsaq nail yaqyov philma Philneiqhal dai khi aqivq aqtsu juq neq Lulbheiq nail jeq-e dai khi Gavq nail jeq-e jaol nail Gillav milkhaoq nee mail Khaqnanq milkhaoq bha kovq kev lee khi Ilsaqleiqlav nail tsaol-aq juq bhai aqyu juq-i mail khal nl-ail ceevq-a nail ganl ge bhiq gil-a nail ngaol.
33 Ganl al juq iqsanl bhai Ilsaqleiqlav nail tsaol-aq juq ya gaiq-u phao, lavqkhiq tsail nail lavqkhoel nee, Miqyail bhai tsiqeeq-a nail ngaol. Aq-u phao, aqyu juq neq, Lulbheiq nail jeq-e dai khi Gavq nail jeq-e nail milkhaoq bhai genl dev khi lav luq lav seil nail ganl bhai, maq ge dai naq lai-a nail ngaol.
34 Lulbheiq nail jeq-e dai khi Gavq nail jeq-e neq, laolduq al duq nail aqmil bhai, 'Heeqphaq Miqyail neq, Miqyail pevq nail ngaol dai, ngadao nvq phao nail gaiqlaq bhai salkhil pevq nail ngaol' dai, mil bhiq-a nail ngaol.