Yaolsuv 20
Tsaoq uvq nail meenq juq
1 A bhai nee ngal-aq, Heeqphaq Miqyail, Yaolsuv bhai niail hai ge bhiq-a nail ngaol:
2 "Ngal, Maolseiq bhai juq khi daoq bivq-a nail khe-ai, Ilsaqleiqlav nail tsaol-aq juq bhai tsaoq-uvq nail meenq juq tsel dov yaoq dai, ge bhiq ail yaoq
3 Teevq gaq ga nav tsaol-aq lav heivq nail dai, maq noeq nail bhai maq il maq lal-ail, lav heivq haq neq, meenq al juq bhai tsaol-aivq khi jaol-ail kivq nail ngaol. Al neq, aivq bhai nl kovq movq nail juq nail aqlavq lavqkhoel nee ya jel-ail nail galduq pevq nail ngaol.
4 Aivq, meenq al juq nail lavqkhoel khe teevq meenq ga nav bhai tsaol-aivq u phao, meenq nail lolgov bhai thul phaol khi meenq khe aqivq aqtsu juq bhai, khal pevq lal thaq nail ganl iqsanl mail ya ge bhiq gil nail ngaol. Al hai nl khi mail pultavq, meenq khe aqivq aqtsu juq neq, aivq bhai meenq nail lavqkhoel-ai ya bhi aol lal khi, jaol duq ya hal pov bhiq nail ngaol.
5 Nl kovq movq nail juq, meenq al meenq bhai the kel leevq-u phao, tsaol leevq thaq nail al gaq bhai aqyu juq nail aqlavq lavqkhoel bhai maq ya av bhiq-ail. Khul khi mail dai ngal-aq, aivq neq aivq nail ilkhaiq tavq tsaoq bhai maq il maq lal-ail heivq nail dai, haq-eiv nail phao, maq noeq-ai thaq nail bhai heivq-a nail ngaol.
6 Aivq neq meenq yaq juq jil lai nail sivtavq bhai yalkhaq maq dal gaq-u kev dai maqkhaiq, aivq-i mail ganl pevq-u khe philma jiovq lao nail al gaq sil-u kev dai maqkhaiq, meenq al meenq nail lavqkhoel bhai jaol kivq nail ngaol. Al hai gil haq neq, aivq-i mail tsaoq dol leevq-a nail meenq aqlil bha kovq lai kivq nail ngaol" dai, ge bhiq-a nail ngaol.
7 Al bhaq da nee, aqyu juq-i mail tsaoq-uvq nail meenq dai tsel dov bhi jiav-a nail meenq juq neq, niil juq pevq nail ngaol. Gaqliqlail nail milkhaoq lavqkhoel khe Naqtaqlil nail jeq-e nail gaoqjaoq juq phao jiav nail Keiqdeiqsav nail meenq, Eilphaqlaqyinq nail gaoqjaoq juq phao jiav nail Seiqkhinq nail meenq, Yuldav nail jeq-e nail gaoqjaoq juq phao jiav nail Heiqbhonq dai iqsanl khul nail, Khiqlil-avq Aqlaqbhaq nail meenq,
8 Yeiqlilkhol nail meenq nail jail-nq khe Yaoldaq laoljaol nl ma dov khoeq phao jiav nail, Bheiqseiqla nail meenq. Beiqseiqla nail meenq neq, Lulbheiq nail jeq-e nail gaoqjaoq lao tsao khe haqtsoiq haqyal bha jiav nail ngaol. Gavq nail jeq-e nail miltsaq Gillav nail lavqkhoel khe jiav nail Laqmol nail meenq dai khi Maqnaqseiq nail jeq-e nail miltsaq, Bhaqsanq nail milkhaoq lavqkhoel khe jiav nail Gaollanq nail meenq niil juq pevq nail ngaol.
9 Meenq al juq iqsanl mail neq, Ilsaqleiqlav nail tsaol-aq juq nail haqbhoil maqkhaiq, aqyu juq nail lavqkhoel bhai jaol nail yu nail jeq-e jaq-a juq nail haqbhoil maqkhaiq, pevq nail ngaol. Al neq, maq il maq lal-ail tsaol-aq bhai lav heivq-a nail juq, meenq yaq juq nail sivtavq-ai yalkhaq maq dal nail iqmoeq nl kovq movq nail juq-i mail maq ya bhi heivq nail galduq, tsaoq-uvq khi jaol kivq nail haqbhoil pevq nail ngaol.