Yaolsuv 19
Silmiqonq nail jeq-e bhai miltsaq jaiqbhoil bhoil bhiq-a nail ganl
1 Eellaoq nvq pov teevq pov bheq-u phao, Silmiqonq nail jeq-e bhai tsaq lai khi yovq gavq nail ildaoq yovq gavq teevq daoq gil haq teevq daoq, miltsaq jaiqbhoil bhoil bhiq-a nail ngaol. Aqyu juq-i mail ya-a nail jaiqbhoil neq, Yuldav nail jeq-e bhai bhoil bhiq-a nail milkhaiq nail lavqkhoel bhai aol nail ngaol.
2 Aqyu juq-i mail ya-a nail miltsaq jaiqbhoil nail lavqkhoel bhai aol nail meenq juq neq, Seiqbhal dai iqsanl khul nail Bheiqaqseiqbhaq nail meenq, Maoqlaqdal meenq,
3 Haqsaqlav Suqlav nail meenq, Bhaqlav nail meenq, Eiqseinq meenq,
4 Eillavtaollav nail meenq, Bheiqthullav nail meenq, Hollaqmaq meenq,
5 Silkaqlav nail meenq, Bheiqtaq Maqkhaqbhoq nail meenq, Haqsaqlav Sulsaq meenq,
6 Bheiqtaq Leiqbhaq-ol nail meenq dai khi, Saqlulheiq nail meenq, meenq niil juq iqsanl mail neq, 13 meenq bhee khi meenq nail teevq jaoq teevq laol jiav nail julgu juq iqsanl kheq nail ngaol.
7 Al ovqtavq, Aqinq nail meenq, Liqmonq nail meenq, Eiqtheillav nail meenq, Aqsanq nail meenq meenq niil juq iqsanl mail liq meenq bhee khi meenq nail teevq jaoq teevq laol jiav nail julgu juq iqsanl kheq nail ngaol.
8 A bhai nee jaiq dai, aqjail aqthao khe jiav nail julgu juq iqsanl aol gil khi, Nilgeiq nail miltsaq bhai jiav nail Laqma dai iqsanl khul nail Bhaqlaqtha Bheqeiq nail meenq bha kev nail ngaol. Miltsaq niil juq iqsanl mail neq, Silmiqonq nail jeq-e-i mail yovqgavq nail ildaoq yovqgavq ya-a nail miltsaq jaiqbhoil juq pevq nail ngaol.
9 Silmiqonq nail jeq-e-i mail ya-a nail miltsaq jaiqbhoil al neq, gaq-u phao, Yuldav nail jeq-e bhai bhoil bhiq-a nail lavqkhoel-ai aol nail ngaol. Thail hai ngaol-aoq, Yuldav nail jeq-e aqyu juq-i mail loq nail nee maqtsil mao jaiq nail ngel-i mail, Silmiqonq nail jeq-e neq, Yuldav nail miltsaq lavqkhoel khe jaiqbhoil ya-a nail ngaol.
Seiqbhullonq nail jeq-e bhai miltsaq jaiqbhoil bhoil bhiq-a nail ganl
10 Eellaoq hail pov teevq pov bheq-u phao, Seiqbhullonq nail jeq-e bhai tsaq lai khi yovqgavq nail ildaoq yovqgavq teevq daoq gil haq teevq daoq miltsaq jaiqbhoil bhoil bhiq-a nail ngaol. Aqyu juq nail milkhaiq neq, Saqlil nail meenq bha kev nail ngaol.
11 Al ovqtavq, nlma ga khoeq phao gaoq lee kha khi, Maqlaqlaq nail meenq bha lee kev-a nail nee ovqtavq, Daqbheiqseil nail meenq bhai lai jel-a nail ngaol. A bhai nee ngal-aq, gaoq ail eeq gai khi, Yaolkaqnanq nail meenq nail nlma dov khoeq phao jiav nail gaoqjaoq nvq gaiqlaq khe laoljaol bhai ail kev-a nail ngaol.
12 A bhai nee ngal-aq, Saqlil nail meenq nee mail nlma dov khoeq phao lai khi, nlma dov lal nail lao tsao Khilsaqloq Thaqbhoq miltsaq nail milkhaiq bha kev lai-a nail ngaol. Al ovqtavq, Daqbheiqlav nail meenq bhai ail kev khi, khi Yaqphaiq nail meenq bha dav lai-a nail ngaol.
13 Meenq al meenq nee mail nlma dov khoeq phao khe Gaqtav Heiqpheq nail meenq dai khi Aiqkhaqsin nail meenq bhai gaoq kev lai-a nail nee ovqtavq, Liqmonq nail meenq bhai iqsanl ail kev khi Neiqaq nail meenq phao gaoq kovq lee-a nail ngaol.
14 A bhai nee ngal-aq, milkhaiq neq, pultavq phao bhil govq lovq dai dav lai khi, Haqnaqthoq nail meenq bhai lai kev-a nail nee ovqtavq, Ilthaqeiqlav gavqlaovq bhai daoqloi loi lai-a nail ngaol.
15 Al ovqtavq miltsaq al nail lavqkhoel bhai neq, Khaltha nail meenq, Naqhaqlav nail meenq, Silmiqlonq nail meenq, Ildaqlaq nail meenq Bhaiqlaiqhaiqa meenq dai khi meenq yaoq meenq yaoq juq iqsanl mail neq, 12 meenq bhee khi meenq nail teevq jaoq teevq laol jiav nail julgu juq iqsanl kheq nail ngaol.
16 Meenq niil juq iqsanl dai khi julgu juq iqsanl mail neq Seiqbhullonq nail jeq-e-i mail yovqgavq nail ildaoq yovqgavq ya-a nail miltsaq jaiqbhoil juq pevq nail ngaol.
Ilsaqkhaq nail jeq-e bhai miltsaq jaiqbhoil bhoil bhiq-a nail ganl
17 Eellaoq liq pov teevq pov bheq-u phao, Ilsaqkhaq nail jeq-e bhai tsaq lai khi yovqgavq nail ildaoq yovqgavq teevq daoq gil haq teevq daoq miltsaq jaiqbhoil bhoil bhiq-a nail ngaol.
18 Aqyu juq nail miltsaq neq, meenq niil juq iqsanl kheq nail ngaol. Yeiqsaqleiqlav nail meenq, Kheiqsuqlov nail meenq, Sulneiq meenq,
19 Haqphaqlaq-inq nail meenq, Silyonq nail meenq, Aqnaqhaqlav meenq,
20 Lalbivq nail meenq, Khiqsil-onq nail meenq, Eiqbheiq meenq,
21 Leiqmeiq nail meenq, Einq Kaqninq nail meenq, Einq Haqdaq nail meenq, dai khi Bheiqtaq Palseiq, meenq niil juq ngaol.
22 Milkhaiq neq Thaqbhoq nail meenq, Saqhaqsulma nail meenq, Bheilseiqmeiq nail meenq thoil juq bhai lai jel khi Yaoldaq laoljaol bhai daoqloi loi lai-a nail ngaol. Meenq al juq iqsanl mail 16 meenq bhee khi meenq nail teevq jaoq teevq laol jiav nail julgu juq iqsanl kheq nail ngaol.
23 Meenq al juq iqsanl dai khi julgu juq iqsanl mail neq, Ilsaqkhaq nail jeq-e-i mail yovqgavq nail ildaoq yovqgavq ya-a nail miltsaq jaiqbhoil juq pevq nail ngaol.
Aqseiqlav nail jeq-e bhai miltsaq jaiqbhoil bhoil bhiq-a nail ganl
24 Eellaoq ngaq pov teevq pov bheq-u phao, Aqseiqlav nail jeq-e bhai tsaq lai khi yovqgavq nail ildaoq yovqgavq teevq daoq gil haq teevq daoq miltsaq jaiqbhoil bhoil bhiq-a nail ngaol.
25 Aqyu juq nail miltsaq neq, meenq niil juq iqsanl mail kheq nail ngaol: Heiqlaqkhal nail meenq, Haqliq nail meenq, Bheiqtheinq nail meenq, Aqkhaqsal meenq,
26 Aqlanqmeiqleiq nail meenq, Aqmav nail meenq dai khi Milsaqlav nail meenq niil juq ngaol. Nlma ga khoeq phao khe milkhaiq neq, Khaqlaqmeiqlav nail meenq dai khi Silhoqlav Lilbhaqnaq nail meenq bha lai jel-a nail ngaol.
27 A bhai nee ngal-aq nlma dov khoeq phao gaoq kovq lal khi Bheiqtaq Daqkonq nail meenq bha lai kev-a nail nee ovqtavq, Seiqbhuqlunq nail jeq-e nail miltsaq dai khi Ilthaqeiqlav gavqlaovq nee mail lai jel khi pultavq phao khe jiav nail Bheiqtaq Eiqmeiq nail meenq dai khi Neiqyiqlav nail meenq bha lai kev nail ngaol. Al ovqtavq, lavqtsel phao jiav nail Khaqbhuq nail meenq bhai gaoq lai jel khi,
28 Aqbhaqdonq nail meenq, Leiqhovq nail meenq, Haqmonq nail meenq, Khaqnanq nail meenq al juq nee lai jel khi, Sildoq nail meenq meenq ma bha lai kev-a nail ngaol.
29 A bhai nee ngal-aq, Laqmaq nail meenq phao kovq lee khi, meenq nail khainl kaovq jaoq-ai thaq nail Dulluv nail meenq bha lai kev nail ngaol. Al ovqtavq, Holsav nail meenq phao kovq lai khi Meildiqtiqlav nail iqyaq iqma laoljaol bhai loi lai-a nail ngaol. Miltsaq niil juq nail lavqkhoel bhai neq Meiqbheiqlav nail meenq, Alkhaqsil meenq,
30 Uqmav nail meenq, Aqpheil nail meenq, Leiqhol nail meenq dai khi meenq yaoq meenq yaoq juq iqsanl mail 22 meenq bhee khi meenq nail teevq jaoq teevq laol jiav nail julgu juq iqsanl kheq nail ngaol.
31 Meenq al juq iqsanl dai khi julgu juq iqsanl mail neq Aqseiqlav nail jeq-e bhai yovqgavq nail ildaoq yovqgavq ya-a nail miltsaq jaiqbhoil juq pevq nail ngaol.
Naqtaqlil nail jeq-e bhai miltsaq jaiqbhoil bhoil bhiq-a nail ganl
32 Eellaoq kovq pov teevq pov bheq-u phao, Naqtaqlil nail jeq-e bhai tsaq lai khi, yovqgavq nail il daoq yovqgavq teevq daoq gil haq teevq daoq, miltsaq jaiqbhoil bhoil bhiq-a nail ngaol.
33 Aqyu juq nail milkhaiq juq neq, Heiqleiv nail meenq dai khi Saqnaqninq nail meenq aqjail bhai doevq nail aqbhaol bhaol ma nee mail daq-n khi, Aqdaqmil Nilgeiq nail meenq ail pav-a nail nee ovq tavq, Yaqbhaqneiqlav nail meenq nee mail Lalkhunq nail meenq bhai lai kev khi, Yaoldaq laoljaol bhai daoqloi loi lai-a nail ngaol.
34 Nlma ga khoeq phao khe milkhaiq neq, Aqsaqnoq Thaqbhoq nail meenq nee mail lai jel khi Hulkaovq nail meenq bhai kev nail ngaol. Pul-nvq phao khe milkhaiq neq Seiqbhullonq nail jeq-e nail miltsaq bhai lai jel khi, nlma ga khoeq phao khe milkhaiq neq, Aqseiqlav nail jeq-e nail miltsaq bhai lai jel nail nee ovqtavq, nlma dov khoeq phao khe milkhaiq neq, Yaoldaq laoljaol bhai lai jel-a nail ngaol.
35 Al nail lavqkhoel khe khainl jaoq-ai thaq nail meenq juq neq niil juq pevq nail ngaol: Sildinq nail meenq, Seqlav nail meenq, Haqmav nail meenq, Lalkha nail meenq, Khinqneiqleivq meenq,
36 Aqdaqmaq nail meenq, Laqmaq nail meenq, Haqsaoqlav meenq,
37 Keiqdeiqsav nail meenq, Eillilyil nail meenq, Einq Haqsoq meenq,
38 Illoq nail meenq, Milkaqdaqlaq-aiq nail meenq, Holleinq nail meenq, Bheiqtaqnav meenq dai khi Bhaiqseiqmaiv nail meenq, meenq niil juq iqsanl mail neq, 19 meenq bhee khi meenq nail teevq jaoq teevq laol jiav nail julgu juq iqsanl kheq nail ngaol.
39 Meenq al juq iqsanl dai khi julgu juq iqsanl mail neq, Naqtaqlil nail jeq-e yovqgavq nail ildaoq yovqgavq ya-a nail miltsaq jaiqbhoil juq pevq nail ngaol.
Danq nail jeq-e bhai miltsaq jaiqbhoil bhoil bhiq-a nail ganl
40 Eellaoq sivq pov teevq pov bheq-u phao Danq nail jeq-e bhai tsaq lai khi yovqgavq nail ildaoq yovqgavq teevq daoq gil haq teevq daoq, miltsaq jaiqbhoil bhoil bhiq-a nail ngaol.
41 Aqyu juq-i mail jaiqbhoil ya-a nail miltsaq juq neq, meenq niil juq iqsanl kheq nail ngaol. Sollaq nail nail meenq, Eilsaqthaq-oq nail meenq, Illaqseiqmeiq nail meenq,
42 Saqlalbhinq nail meenq, Aqyillonq nail meenq, Iqthalla nail meenq,
43 Eillonq nail meenq, Tilmaqnav nail meenq, Eilkaqlonq nail meenq,
44 Eilloqtheiqkheiq nail meenq, Kivqbheiqthonq nail meenq, Bhaqlaqtha nail meenq,
45 Yeiqhul nail meenq, Bheiqneiq Bheiqlal nail meenq, Gaqtav Liqmonq nail meenq,
46 Meiq Yaqlaqkhonq nail meenq, Lalkhonq nail meenq dai khi Yilphuq nail meenq nee mail jail-nq phao jiav nail miltsaq juq iqsanl aol nail ngaol.
47-48 Meenq al juq iqsanl dai khi julgu juq iqsanl mail neq, Danq nail jeq-e bhai yovqgavq nail ildaoq yovq gavq bhoil bhiq-a nail miltsaq jaiqbhoil juq pevq nail ngaol. Thailhai ngaol-aoq, Danq nail jeq-e neq, yovqgavq-i mail jaiqbhoil ya-a nail miltsaq bhai, yu-i mail ya bhi oil-aivq nail ngaol. Al heel ngel-i mail, aqyu juq pultavq phao dav lai khi, Leiqseiq nail meenq bhai genl ya dev lai-a nail nee ovqtavq, meenq yaq juq iqsanl mail bhai heivq gil khi meenq al meenq bhai ya jaol lai-a nail ngaol. Aq-u phao, Leiqseiq nail meenq bhai aqyu juq nail jeq-e nail aqmil khe-ai, Danq dai mil phal bhiq nail ngaol.
Yaolsuv bhai miltsaq jaiqbhoil bhoil bhiq-a nail ganl
49 Ilsaqleiqlav nail tsaol-aq juq neq, jeq-e yaoq jeq-e yaoq-ao nee yovqgavq nail miltsaq yovqgavq bhoil pav gaq-al nee ngal-aq, Nunq nail yaqyov Yaolsuv bhai iqsanl aqyu juq nail sivtavq nee miltsaq jaiqbhoil teevq tsaol bhoil bhiq-a nail ngaol.
50 Heeqphaq Miqyail-i mail daoq bivq-ai thaq nail khe-ai, Yaolsuv-i mail hal-a nail Eilphaqlaqyinq gaoqjaoq juq khe jiav nail Tilmaqnav Seiqlav nail meenq, aivq bhai bivq-a nail ngaol. Aivq a bhai meenq cov meeq khi jaol-a nail ngaol.
51 Miltsaq al juq iqsanl mail neq, Philma Eilleiqaqsaq, Nunq nail yaqyov Yaolsuv dai khi Ilsaqleiqlav nail jeq-e yaoq jeq-e yaoq-ao nee nail lavqkhoel khe aqivq aqtsu juq-i mail Sillaol nail meenq bhai Heeqphaq Miqyail nail sivtavq, uqhuq thaoq nail haqphal saiqgov nail govkhoiq bhai eellaoq bheq khi, miltsaq bhoil pav bhiq-a nail ngaol. Al hai khi, aqyu juq miltsaq jaiqbhoil bhoil pav-a nail ganl gaq gil lai-a nail ngaol.