Yaolsuv 18
Jail nail miltsaq juq bhoil pav bhiq-a nail ganl
1 A bhai nee ngal-aq Ilsaqleiqlav nail tsaol-aq juq neq Sillaol nail meenq bhai jil gil lee khi aq-u khe aqyu juq nail uqhuq thaoq nail haqphal saiqgov cov thul-a nail ngaol. Aqyu juq neq, milkhaoq al juq iqsanl bhai uv thaiq gil-a nail ngaol.
2 Thail hai ngaol-aoq, aqyu juq nail lavqkhoel khe miltsaq jaiqbhoil maq bhoil bhiq haq nail sivq jeq-e, jaol-ai haq nail ngaol.
3 Al heel ngel-i mail, Yaolsuv neq, Ilsaqleiqlav nail tsaol-aq juq bhai niail hai ge bhiq-a nail ngaol: "Nul juq nail aqphiq aqbhal juq nail Heeqphaq Miqyail-i mail nul juq bhai bivq lavq-a nail miltsaq juq bhai maq oil lai dai, khaq mao kev dai, daonq-ai haq nail-aiq.
4 Nul juq nail jeq-e juq nail lavqkhoel khe teevq jeq-e bhai, hail gaq tsel dov khi ngal jaol nail bha khul lavq yaoq. Aqyu juq neq, yovqgavq nail haqbhoil jaiqbhoil pevq nail miltsaq bhai tsaq daiq nail galduq, ngal aqyu juq bhai phaiq gai-aivq la. Miltsaq al khal heel dai, aqyu juq aqmeeq dai gevq thaiq gaq khi mail pultavq, ngal jaol nail bha ya kovq lal nail ngaol.
5 Miltsaq al sivq bhoil ya bhoil nail ngaol. Thail hai ngaol-aoq, Yuldav nail jeq-e neq, aqyu juq nail miltsaq pevq nail pul-nvq phao jaol khi, gaoq jaol dal laivq nail ngaol. Yaolsai nail jeq-e iqsanl aqyu juq nail miltsaq pevq nail pultavq phao gaoq jaol nail ngaol.
6 Miltsaq al sivq bhoil khal heel dai, gevq thaiq gaq haq neq, ngal jaol nail niil niai oil lavq yaoq. Ngal eellaoq bheq nail lav sav khi nul juq iqsanl bhai, ngadao nail Heeqphaq Miqyail nail sivtavq nee bhoil gil bhiq nail ngaol.
7 Thail hai ngaol-aoq, Leiqbhil nail jeq-e neq, nul juq nail lavqkhoel khe miltsaq jaiqbhoil maq ya-ail. Khul khi mail dai ngal-aq, aqyu juq nail haqbhoil, jaiqbhoil pevq nail ganl neq, philma jiovq khi Heeqphaq Miqyail nail haqbhoil ganl ya nl nail ngaol. Gavq nail jeq-e, Lulbheiq nail jeq-e dai khi Maqnaqseiq nail jeq-e teevq pav juq neq, Heeqphaq Miqyail nail yaqkav Maolseiq-i mail bhoil-ail ceevq bhiq-a nail khe-ai, Yaoldaq laoljaol nail nlma dov khoeq phao jiav nail miltsaq jaiqbhoil bhai ya jel-a nail ngaol" dai, ge bhiq-a nail ngaol.
8 Aqyu juq dov-ail khi miltsaq khal heel dai, tsao daiq lai nail dai lainq-u phao, Yaolsuv aqyu juq bhai daoq niail hai bivq-a nail ngaol: "Nul juq miltsaq al bhai khal heel dai, doi dai, tsao daiq nail lavqkhoel nee, aqmeeq-ai gevq thaq gai khi, ngal jaol nail bha kovq lee yaoq. Ngal nuljuq iqsanl nail haqbhoil niil niai Sillaol meenq bhai Heeqphaq Miqyail nail sivtavq nee, eellaoq bheq nail lav sav nail ngaol" dai, ge bhiq-a nail ngaol.
9 Al heel ngel-i mail, aqyu juq dov-ail khi, miltsaq al juq doi dai tsao tsel daiq ail-a nail lavqkhoel nee, al sivq dao khe jiav nail meenq juq bhai khal heel dai, haoqgavq pavqyov lavqkhoel bhai gevq bhoel gai-a nail ngaol. A bhai nee ngal-aq, Yaolsuv Sillaol nail meenq bhai haqphal saiqgov cov khi naq nail bha kovq lal khi ge bhiq gil lal-a nail ngaol.
10 Aq-u phao, Yaolsuv iqsanl Sillaol nail meenq bhai Heeqphaq Miqyail nail sivtavq nee eellaoq bheq nail lav sav khi, Ilsaqleiqlav nail jeq-e jaq-a nail lavqkhoel khe jeq-e yaoq jeq-e yaoq-ao nee bhai miltsaq jaiqbhoil bhoil bhiq-a nail ngaol.
Bheinqyaqminq nail jeq-e bhai jaiqbhoil bhoil bhiq-a nail miltsaq
11 Eellaoq iqmoeq khal moeq khe pov bheq-u phao, Bheinqyaqminq nail jeq-e bhai tsaq lai khi aivq nail ildaoq aivq teevq daoq gil haq teevq daoq, miltsaq jaiqbhoil bhoil bhiq-a nail ngaol. Aqyu juq-i mail ya-a nail milkhaiq neq, Yuldav nail jeq-e nail miltsaq dai khi Yaolsai nail jeq-e nvq jeq-e nail miltsaq gaiqlaq bhai jiav nail ngaol.
12 Aqyu juq nail pultavq phao khe milkhaiq neq, Yaoldaq laoljaol nee mail daq-n khi Yeiqlilkhol nail meenq pultavq phao jiav nail gaoqjaoq phao ail ceiv-a nail nee ovqtavq, nlma ga khoeq phao khe jiav nail gaoqjaoq gaoq dul dav lai khi, Bheiqtaqwinq nail meenq nail aqjail bhai jiav nail tsalhail daikav phao kev ail-a nail ngaol.
13 A bhai nee ngal-aq, Bheiqtaqlav dai iqsanl khul nail Lulsav nail meenq nail pul-nvq phao jiav nail gaoqjaoq bhaqga phao gaoq lai khi, Bheiqtaq Hoqlonq meenq nail pul-nvq phao khe jiav nail gaoqjaoq khe Aqtaqlol Aqdaqlav nail meenq bha yavq kha ail-a nail ngaol.
14 Al ovqtavq, Bheiqtaq Hoqlonq nail meenq nee pul-nvq phao khe jail-nq bhai jiav nail gaoqjaoq nee lai jel khi, pul-nvq phao gaoq kovq lee-a nail ngaol. Al ovqtavq, gaoqjaoq nail nlma khoeq phao ail khi pul-nvq phao ail kha nail ngaol. Daoq loi neq, Khiqlil-avq Yeil-aqlinq dai iqsanl khul nail Khiqlil-avq Bhaqlal meenq bhai loi lai-a nail ngaol. Meenq al meenq neq, Yuldav nail jeq-e nail meenq teevq meenq pevq nail ngaol. Niil neq, nlma ga khoeq phao khe milkhaiq pevq nail ngaol.
15 Pul-nvq phao khe milkhaiq neq Khiqlil-avq Yeil-aqlinq meenq nail nlma ga khoeq phao nee daq-n khi ulcuvq eelbev dov nail Neilthoq-aq bha kev nail ngaol.
16 A bhai nee ngal-aq, Leiqphaq-inq nail gavqlaovq pultavq phao jiav nail Bheinq Hilnonq gavqlaovq nail jail-nq phao khe gaoqjaoq daoqthaoq bha yavq kha lee-a nail ngaol. Al ovqtavq, Yeiqbhulsil nail meenq pul-nvq phao nee lai jel khi, Hilnonq gavqlaovq phao iqsanl lai jel-a nail nee ovqtavq, Einq Loqkeiqlaq nail meenq bha lai kev-a nail ngaol.
17 A bhai nee, pultavq phao gaoq kovq lai khi, Einq Seilmeiq nail meenq bha gaoq lai-a nail nee ovqtavq, gaoqjaoq nvq gaiqlaq bhai jiav nail Alduqminq nail gailkhaol jail-nq phao jiav nail Gilliq-oq nail meenq bha gaoq kev lai-a nail ngaol. A bhai nee ngal-aq, Lulbheiq nail yaqyov Bhoqhanq nail lovmav kha thul-ai thaq nail bha, gaoq yavq kha lee-a nail ngaol.
18 A bhai nee ngal-aq, pultavq phao khe Bheiqtaq Aqlaqbhaq nail meenq nail gaoqjaoq lao tsao-ail gaoq ail kha khi, Aqlaqbhaq bhai kev ail-a nail ngaol.
19 Al ovqtavq, Bheiqtaq Haolgaqlav meenq nail gaoqjaoq bhaqga pultavq lao tsao gaoq-ail khi, cavqdevq nail iqyaq iqma pul-nvq phao khe khaoqbhaoq jail-nq bhai, il bhoel nail Yaoldaq laoljaol nail pultavq teevq dao bhai dov lal-a nail ngaol. Niil neq, pul-nvq phao khe milkhaiq pevq nail ngaol.
20 Yaoldaq laoljaol neq, nlma dov khoeq phao khe milkhaiq pevq nail ngaol. Niil neq, teevq daoq gil haq teevq daoq, yovqgavq nail ildaoq yovqgavq Bheinqyaqminq nail jeq-i mail ya-a nail miltsaq jaiqbhoil dai khi milkhaiq juq pevq nail ngaol.
21 Bheinqyaqminq nail jeq-e-i mail aivq nail ildaoq aivq ya-a nail meenq juq neq, Yeiqlilkhol nail nail meenq, Bheiqtaq Haolgaqlav nail meenq, Eiqmeiq Kheiqsil nail meenq,
22 Bheiqtaq Aqlaqbhaq nail meenq, Seiqmaqlaqinq nail meenq, Bheiqtaqlav nail meenq,
23 Aqwil nail meenq, Paqlaq nail meenq, Aolphaqlaq nail meenq,
24 Kheiqphaq Aqmolnil nail meenq, Aolphaqnil nail meenq dai khi Geiqbhaq nail meenq meenq niil juq iqsanl 12 meenq bhee khi meenq nail teevq jaoq teevq laol khe jiav nail julgu juq iqsanl, kheq nail ngaol.
25 Al ovqtavq, Gilbhiqonq nail meenq, Laqmaq nail meenq, Bheiqloqtav nail meenq,
26 Milsaqbhaq nail meenq, Kheiqphillaq nail meenq, Molsav nail meenq,
27 Leiqkhainq nail meenq, Illaqpeiqlav nail meenq, Taqlaqlav nail meenq,
28 Seiqlav nail meenq, Haqeiqleiq nail meenq, Yeiqlulsaqlaiq nail meenq dai iqsanl khul nail Yeiqbhulsil nail meenq, Gilbhiq-aq nail meenq dai khi Kiqlilyaq nail meenq niil juq iqsanl mail neq, 14 meenq bhee khi meenq nail teevq jaoq teevq laol jiav nail julgu juq iqsanl kheq nail ngaol.
Al juq iqsanl mail neq, Bheinqyaqminq nail jeq-e-i mail yovqgavq nail ildaoq yovqgavq, teevq daoq gil haq teevq daoq ya-a nail miltsaq jaiqbhoil juq pevq nail ngaol.