Yaolsuv 17
Maqnaqseiq nail jeq-e bhai jaiqbhoil bhoil bhiq-a nail miltsaq
1 Yaolsai nail yaqyov uqbhao aqivq gaq pevq nail Maqnaqseiq nail jeq-e-i mail ya-a nail miltsaq jaiqbhoil juq neq, niil juq pevq nail ngaol. Gillav nail jeq-e nail aqbhu pevq lal-a nail Maqnaqseiq nail uqbhao aqivq Maqkhil nail haqbhoil neq, Gillav nail milkhaoq dai khi, Bhaqsanq nail milkhaoq ya jel-aoq nail ngaol. Khul khi mail dai ngal-aq, Maqkhil neq, genl dev nail phao gee sil nail neema maq aol nail juq pevq nail ngaol.
2 Al heel ngel-i mail, niil aq-il khe bhoil bhiq nail miltsaq juq neq, Maqnaqseiq nail jeq-e jail nail juq aivq nail ildaoq aivq, teevq daoq gil haq teevq daoq nail haqbhoil pevq nail ngaol. Ildaoq al juq neq, Aqbhiqeiqsal, Heiqleil, Aqseiqliqlal, Seiqkhinq, Heiqpheiqlav, Seiqmiqdaq, niil juq ngaol. Al ovqtavq, aqyu juq neq, Yaolsai nail yaqyov Maqnaqseiq nee yavq kha lee thaq nail yaqyov juq pevq khi, aivq nail ildaoq nee aivq teevq daoq gil haq teevq daoq pevq nail ngaol.
3 Seiqloqpheiqhaq neq, Heiqpheiqlav nail yaqyov pevq nail ngaol. Heiqpheiqlav neq, Gillav nail yaqyov pevq nail ngaol. Gillav neq, Maqkhil nail yaqyov pevq nail ngaol. Maqkhil neq, Maqnaqseiq nail yaqyov pevq nail ngaol. Seiqloqpheiqhaq neq, yaqyov maq jaol dai, yaqmiq ngaq gaq jaol nail ngaol. Yaqmiq al ngaq gaq nail aqmil neq, Maqlaq, Nol-avq, Holkhaqlaq, Millaqkhaq khi mail Thillaqsaq niil juq pevq nail ngaol.
4 Yaqmai-aq al ngaq gaq neq, philma Eilleiqaqsaq Nunq nail yaqyov Yaolsuv dai khi aqivq aqtsu juq jaol nail bha moel lal khi, "Heeqphaq Miqyail Maolseiq bhai daoq niail hai bivq-ai thaq nail jiav nail ngaol: Nv juq bhai iqsanl nvjuq nail aqivq jaqbheq yaqyov-aq juq khe-ai jaiqbhoil ya bhoil lavq nail ngaol" dai, ge bhiq lal-a nail ngaol. Al heel ngel-i mail Yaolsuv neq, Heeqphaq Miqyail-i mail daoq bivq-ai thaq nail jiav nail khe-ai, yaqmai-aq al ngaq gaq bhai iqsanl aqyu juq nail aqbhu nail aqivq jaqbheq juq khe-ai miltsaq jaiqbhoil bhoil bhiq-a nail ngaol.
5 Al heel ngel-i mail, Maqnaqseiq nail jeq-e nail haqbhoil neq, Gillav milkhaoq dai khi, Yaoldaq laoljaol nlma dov khoeq phao jiav nail Bhaqsanq milkhaoq taivq-ail maq ngel nail, miltsaq al 10 bhoil bhee dai, gaoq ya-a nail ngaol.
6 Khul khi mail dai ngal-aq, Maqnaqseiq nail jeq-e lavqkhoel khe yaqmiq juq iqsanl yaqyov juq khe-ai, miltsaq jaiqbhoil ya-a nail ngaol. Gillav nail milkhaoq neq, jail nail Maqnaqseiq nail jeq-e teevq pav juq nail haqbhoil iqsanl pevq nail ngaol.
7 Maqnaqseiq nail milkhaiq neq, Aqseiqlav nail jeq-e nail miltsaq nee mail lee khi, Seiqkhinq meenq nail nlma dov khoeq phao jiav nail Milmeiqtal meenq bha lee kev-a nail ngaol. A bhai nee ngal-aq, Milmeiqtal meenq nee mail pul-nvq phao ail kha khi, Einq Taqpuq-aq nail tsaol-aq juq nail miltsaq iqsanl kheq nail ngaol.
8 Taqpuq-aq nail miltsaq neq, Maqnaqseiq nail pevq nail ngaol. Thail hai ngaol-aoq, Maqnaqseiq nail milkhaiq bhai jiav nail Taqpuq-aq nail meenq neq, Eilphaqlaqyinq nail jeq-e nail pevq nail ngaol.
9 A bhai nee ngal-aq, pul-nvq phao khe milkhaiq neq, Khaqnanq nail laoljaol bhai ail kev-a nail ngaol. A bhai neq, Maqnaqseiq nail meenq nail gaiqlaq khe jiav nail Eilphaqlaqyinq nail meenq juq iqsanl jiav nail ngaol. Thail hai ngaol-aoq, Maqnaqseiq nail milkhaiq neq, gavqlaovq al nail pultavq phao jiav khi Meildiqtiqlav nail iqyaq iqma bhai daoqloi loi lai-a nail ngaol.
10 Khaqnanq laoljaol nee pul-nvq phao khe miltsaq neq, Eilphaqlaqyinq nail pevq nail nee ovqtavq, pultavq phao khe neq, Maqnaqseiq nail pevq khi Meildiqtiqlav nail iqyaq iqma neq, milkhaiq pevq nail ngaol. Al nail pultavq phao neq, Aqseiqlav nail jeq-e nail miltsaq bha kev khi, nlma dov khoeq phao neq, Ilsaqkhaq nail jeq-e nail miltsaq bhai kev nail ngaol.
11 Maqnaqseiq nail jeq-e neq, Ilsaqkhaq nail jeq-e dai khi Aqseiqlav nail jeq-e nail miltsaq lavqkhoel khe Bheiqtaq Sanq nail meenq, Ilbhaqleiq-anq nail meenq, Naqphoq dai iqsanl khul nail Doqlaq nail meenq, Einqdoqlav nail meenq, Thaqnaq nail meenq, Meiqgiqdaol nail meenq, meenq niil juq dai khi, aqjail aqthao khe jiav nail julgu juq iqsanl ya-a nail ngaol.
12 Thail hai ngaol-aoq, Maqnaqseiq nail jeq-e, meenq al juq bhai genl maq dev gaq nia-a nail ngel-i mail, Khaqnanq nail tsaol-aq juq aqlil khe-ai, a bhai jaol dal laivq-a nail ngaol.
13 Thail hai ngaol-aoq, Ilsaqleiqlav nail tsaol-aq juq gaq kav lal-u phao, Khaqnanq nail tsaol-aq juq bhai aqyu juq nail yaqkav bhi jiovq khi iqsanl mail maq the dov gil bhiq-al.
14 A bhai nee ngal-aq, Yaolsai nail jeq-e pevq nail Eilphaqlaqyinq nail jeq-e dai khi Maqnaqseiq nail jeq-e neq, Yaolsuv jaol nail bha lai khi, "Heeqphaq Miqyail neq, nvjuq bhai geeqlaoq bivq lavq nail ngel-i mail, tsaol-aq al jaiq-ail mao lal-aoq nail ngaol. Khul khi mail naol neq, nvjuq bhai miltsaq jaiqbhoil teevq bhoil taivq-ail bhoil lavq-a nail-aiq" dai, nal daiq bhiq-a nail ngaol.
15 Yaolsuv ge nail: "Nul juq bhai tsaol-aq mao lal-a nail ngel-i mail, Eilphaqlaqyinq nail jeq-e nail galduq bivq-a nail gaoqjaoq bha jiav nail miltsaq maq lovq haq neq, Pheiqliqsil dai khi Leiqphaq-inq nail jeq-e jaq-a juq jaol nail haqtsoiq juq bhai dev phail khi jaol lai yaoq" dai, ge bhiq-a nail ngaol.
16 Aq-u phao, Yaolsai nail jeq-e juq ge nail: "Gaoqjaoq khe jiav nail miltsaq neq, nvjuq jaol nail galduq bhaoq thaiq thaiq jel nail ngaol. Al ovqtavq, Khaqnanq nail tsaol-aq juq neq, hail-i mail lav sav-ai thaq nail moeqphaq lavlaoq juq iqsanl jiav gil nail ngaol. Aqyu juq neq, Bheiqtaqsanq meenq dai khi al nail teevq jaoq teevq laol jiav nail julgu bhai maqkhaiq, Yeiqsaqleiqlav gavqlaovq bhai maqkhaiq, jaol nail ngaol"" dai, ge bhiq-a nail ngaol.
17 Thailhai ngaol-aoq, Yaolsuv neq, Yaolsai nee mail yavq kha lee-a nail Eilphaqlaqyinq nail jeq-e dai khi Maqnaqseiq nail jeq-e bhai niail hai ge kovq bhiq-a nail ngaol: "Nul juq neq, mal dil tsaol-aq mao khi gaq kav nail ngaol. Al heel ngel-i mail, nul juq teevq bhoil taivq-ail maq ya-ail.
18 Gaoqjaoq juq iqsanl nul juq ya nail ngaol. Haqtsoiq juq aqmeeq-ai lav phail khi al juq iqsanl bhai uv thaiq gil yaoq. Khaqnanq nail tsaol-aq juq gaq kav khi, hail-i mail lav sav-ai thaq nail moeqphaq lavlaoq jiav khi ngaol-aoq, nul juq aqyu juq bhai the dov kivq nail ngaol" dai, ge bhiq-a nail ngaol.